چیف جسٹس آف پاکستان جسٹس افتخار محمد چودھری کی درخواست کی سماعت کرنے والے فل بنچ کے سربراہ جسٹس خلیل الرحمان رمدے کا کہنا ہے کہ عدالت سے اپنی مرضی کا فیصلہ حاصل نہیں کیا جا سکتا۔
اس سے قبل فل کورٹ بینچ کے سامنے چیف جسٹس کے وکیل بیرسٹر اعتزار احسن نے اپنے دلائل میں کہا کہ اگر کسی بھی جج کے خلاف ریفرنس دائر کیا جاتا ہے تو اس دوران اسے عدالتی ذمہ داریاں نبھانے سے نہیں روکا جا سکتا۔
اس پر بینچ کے رکن جسٹس فقیر محمد کھوکر نے کہا کہ اگر چیف جسٹس کے خلاف ریفرنس آئے اور وہ خود عدالت میں ہو تو وہ اپنی مرضی کا بینچ تشکیل دے گا۔

جسسٹس فقیر کھوکر کے ریمارکس پر بیرسٹر اعتزاز احسن نے کہا کہ جسٹس کھوکر یہ کہہ رہے ہیں کہ چیف جسٹس اپنی مرضی کا بینچ بنا کر اپنے حق میں فیصلہ کروا سکتے ہیں جبکہ چیف جسٹس جسٹس افتخار چودھری کا تو پہلے دن سے یہی مؤقف رہا ہے کہ ان کا مقدمہ سننے کا مجاز صرف فل بینچ ہے۔

اس موقع پر جسٹس خلیل الرحمان رمدے کا کہنا تھا کہ کوئی بھی ججوں سے اپنی پسند کا فیصلہ نہیں لے سکتا اور یہ کہنا کہ چیف جسٹس مرضی کا بینچ بنا کر اپنے حق میں فیصلہ کروا سکتے ہیں ججوں پر عدم اعتماد کا اظہار ہے اور اس سے یہ بھی سمجھا جا سکتا ہے کہ جج انصاف کرنے کے اہل نہیں اور چیف جسٹس کے کہنے پر اس کے حق میں فیصلہ دے دیں گے۔

جسٹس رمدے کا کہنا تھا کہ فاضل جج نے اس حوالے سے جو کچھ کہا وہ ان کی طرف سے وہ الفاظ واپس لیتے ہیں۔ تاہم اس موقع پر ریمارکس دینے والے جج جسٹس فقیر کھوکر خاموش رہے۔

عدالت کی کارروائی اور دلائل کا سلسلہ جاری ہے۔

بی بی سی اردو