ان لوگوں نے سو جوتے بھی کھائے اور سو پیاز بھی اور ایسا ان کے ساتھ کئی بار ہوا لیکن خدا جانے ہمارے سیاستدان کس ڈھیٹ مٹی کی پیداوا ر اور پیشکش ہیں کہ اتنے رگڑوں کے بعد بھی انہیں نہ عقل آئی نہ تمیز… آج کل بدکلامی، بدتمیزی، بدزبانی کا جو میسج جاری ہے، اسے دیکھ کر جی چاہتا ہے کہ اپنے ان ”قائدین“ کی خدمت میں ترجمے بلکہ آسان ترجمے کے ساتھ کچھ ضرب الامثال پیش کروں کہ ہر ضرب المثل کے پیچھے صدیوں کا تجربہ ہوتا ہے۔ میں جانتا ہوں کہ ان ڈھیٹوں پراس کا کوئی اثر ہرگز ہرگز نہیں ہوگا لیکن قارئین ضرور لطف اندوز ہوں گے…ملاحظہ فرمایئے!
”کتا راج بٹھایا، چکی چاٹنے آیا“… یعنی جبلی خصلت کبھی تبدیل نہیں ہوتی۔
”نٹنی بانس پر چڑھی تو پھر پردہ کیسا“ یعنی جب بے حیائی کو ہی پیشہ سمجھ لیا تو پھر شرم کیسی۔
”جو بلاؤ (اودبلاؤ والا) اپنے بچے نہ چھوڑے، وہ چوہا کیسے چھوڑے گا؟“ یعنی اپنوں پر رحم نہیں کرتا وہ غیروں پرکب رحم کرے گا۔
”موری کی اینٹ چوبارے لگی“ یعنی کمینے آدمی کو رتبہ مل گیا۔
”سسکتی گئی بلکتی آئی“ یعنی ابتدا اور انتہا دونوں ہی المناک۔
”جو درخت سامنے آئے وہی اونٹ کا چارہ“ ایسے شخص بارے کہا جاتا ہے جو ہر برے بھلے کولوٹ لے۔
”باسی قورمہ بھی تازہ دال سے اچھا“ یعنی شریف کنگال بھی کمینے لیڈ ر سے بہتر ہوتا ہے۔
”ایک آوے کے برتن ہیں“ یعنی یہ سب کے سب ایک جیسے ہیں۔
”اونٹ مکے کی طرف ہی بھاگتا ہے“ یعنی ہر شے اپنے اصل کی طرف پلٹتی ہے۔
”کیمیا کا عمل سکھادوں گا لیکن بندر کا خیال دل میں نہ آئے“ یعنی اپنے مخصوص مقاصد حاصل کرنے کے لئے ناممکن العمل شرائط پیش کرنا۔
”تین ٹانگ کی گدھی نو من کی لادی“ اوقات بساط سے زیادہ بکھیڑے پالنا۔
”حلق سے نکلی خلق میں پہنچی“ مطلب یہ کہ بکواس کرنے اور ہذیان اگلنے سے پہلے سوچ لینا چاہئے کہ یہ عوام تک پہنچ ہی جائے گی۔
”دبی بلی چوہوں سے کان کٹائے“ یعنی دباؤ کے تحت زبردست بھی زیردست ہونے پر مجبور ہو جاتا ہے۔
”بھائی بھی بھاؤ کا ورنہ اپنے داؤ کا“ یعنی مطلب ہو تو اور نہ ہو تو اور“ (ووٹ لینا ہو تو اور… بعد میں اور)۔
”جہاں کانسہ وہاں سانسہ“… جہاں مال وہاں چور اچکے۔
”پسے موئی پکائے موئی، خود رہے بھوکی کھا جائے کوئی“ یعنی کسی کی محنت سے فائدہ کوئی اور اٹھالے (یہی ہمارے سیاستدانوں کا اصل پیشہ ہے کہ عوام کی محنتوں کے پھل یہی تو کھاتے ہیں)
”پھٹا ہوا دودھ کبھی نہیں جمتا“… یعنی دلی کدورتیں کبھی دور نہیں ہوسکتیں جیسے پی پی پی اور ن لیگ کا غلیظ ترین ڈرامہ۔
”مچھر، مکھی، کھٹمل، جوں…ان کو مالک بنایا کیوں؟“ سیاستدانوں میں بھی کوئی مچھر ہے، کوئی مکھی، کوئی کھٹمل کوئی جوں ان کو مالک بنایا کیوں؟
”سرہانے سوؤ یا پائنتی، کمر تو درمیان ہی رہے گی“ یعنی کچھ بھی ہو جائے عوام کا انجام ویسا ہی رہے گا۔
”تو کو نہ مو کو چولہے میں جھوکو“ یعنی متنازع چیزوں کانجام مثبت نہیں ہوتا۔
”نہ شِیر شتر نہ دیدارِ عرب “… بدترین قسم کے مطلب پرستوں بارے کہا جاتا ہے۔
”حرام کھانا اور وہ بھی شلغم“ معمولی باتوں پر ایمان کا سودا کرنا۔
”بلاؤ گے تو کیا کھلاؤ گے؟ آؤ گے تو کیا لاؤ گے؟“ ہر حالت میں اپنا مطلب ہی مدنظر رکھنا۔
”سانپ لمبا گوہ چوڑی“ یعنی ہر صورت حساب برابر رکھنا۔
”سیاہ رنگ پر کوئی رنگ نہیں چڑھتا“ مطلب یہ کہ سیاہ دلوں اور دماغوں پر کوئی اور رنگ چڑھانا ممکن ہی نہیں۔ جتنی مرضی چھترول اور لترول ہو، ہمارے سیاستدان کبھی کچھ نہ سیکھیں گے۔
”گٹھڑی حلال بقچہ حرام“ یعنی تھوڑے میں ایمانداری لیکن زیادہ میں جی بھر کے بے ایمانی۔
”حجرے بھی اور مجرے بھی“… متقی پوز کرکے موجیں اور مستیاں کرنا۔ اشارہ مذہبی سیاستدانوں کی طرف ہے۔
”ملّا کی داڑھی تبرک میں گئی“ یعنی ظاہر میں عزت افزائی لیکن درحقیقت تکلیف، ذلت اور رسوائی۔
”سوگز داروں، گز بھرنہ پھاڑوں“ یعنی لینا دینا کچھ بھی نہیں صرف زبانی جمع خرچ سے ٹالنا ہے۔
”ایک نے کہی دوجے نے مانی، دونوں جانو بڑے گیانی“ یعنی عقل مند ہمیشہ اتفاق سے رہتے ہیں (میثاق جمہوریت کی دھجیاں اڑا کربھی شرمندہ نہیں ہوتے)
”دونوں گئے پانڈے، حلوا ملا نہ مانڈے“… ہر طرف سے ناکامی و نامرادی۔
”کہیں چور سونے کہیں ڈھور سونے“ یعنی کہیں چوروں کو بیل نہیں ملتے تو کہیں بیل تو ہوتے ہیں لیکن چور نہیں ہوتے (لوٹوں پر فٹ بیٹھتا ہے کہ ”یونی فکیشن بلاک“ کو وزارتوں کے نہ ملنے کا سارا حال میں مکمل تفصیلات کے ساتھ جانتا ہوں لیکن یہ رپورٹر کالم نگاروں کا کام ہے)
”چار دنوں کی کوتوالی اس کے بعد پھر کھرپا جالی“ یعنی چند روزہ حکومت کے بعد پھر ذلیل و خوار ہی ہونا ہے۔
”ساری رات ممیائی، اک بچہ جنیائی“ پھرتیاں اور آنیاں جانیاں زیادہ لیکن فائدہ نہ ہونے کے برابر (دُرفٹے منہ ایسی جمہوریت کے)
”چاکری میں آکری کیا“ یعنی ملازمت میں خودداری ممکن نہیں۔ ہمارا ہر سیاستدان اپنی ٹاپ لیڈر شپ کا چاکر اور غلام ہے اور ان کے لیڈ کچھ اور طاقتوں کے چاکر اور غلام۔
”چوہدری ہو یا راؤ کام نہ آئے تو بھاڑ میں جاؤ“ یعنی کوئی بڑے سے بڑا بھی کام نہ آئے تو نکما ہے اسے بھاڑ میں جھونکو، اس پر لعنت بھیجو۔



”سیاسی ضرب الامثال“...چوراہا …حسن نثار

__________________
محتاج اصلاح و دعا