امریکی محکمۂ دفاع کا کہنا ہے کہ پاکستان کے قبائلی علاقے شمالی وزیرستان میں پاکستانی سکیورٹی چوکی سے’ایساف‘ کے جن ہیلی کاپٹروں پر فائرنگ کی گئی وہ امریکی ہیلی کاپٹر تھے۔
پینٹاگون کے ترجمان برائن وٹمین نے واشنگٹن میں ذرائع ابلاغ کو ایک بریفنگ میں اس واقعے کو’ بدقسمتی اور غلط فہمی کا نتیجہ‘ قرار دیتے ہوئے بتایا کہ ’وہ امریکی ہیلی کاپٹر تھے اور ان کے فضائی راستے میں کہیں بھی پاکستانی حدود میں داخل ہونا شامل نہیں تھا‘۔

ایساف حکام کا بھی کہنا ہے کہ یہ ہیلی کاپٹر افغان حدود میں تھے اور دورانِ پرواز پاکستانی علاقے میں داخل نہیں ہوئے۔ تاہم پاکستانی فوج کے شعبۂ تعلقاتِ عامہ نے ایک بیان میں کہا ہے کہ جمعرات کو دوپہر ساڑھے تین بجے شمالی وزیرستان کے علاقے غلام خان سیکٹر میں سیدگئی کے مقام پر دو ہیلی کاپٹر داخل ہوئے تھے اور پاکستانی فوج کی وارننگ فائرنگ کے بعد جوابی فائرنگ کرتے ہوئے واپس لوٹ گئے۔

آئی ایس پی آر کا کہنا ہے کہ اس معاملے کو افغانستان میں موجود کثیرالملکی امن فوج کے ساتھ اٹھایا گیا ہے۔ اس سے قبل امریکی محکمۂ دفاع کے ترجمان نے بھی کہا تھا کہ امریکی اور نیٹو حکام پاکستانی حکام سے رابطے میں ہیں تاکہ اس واقعے کی تفصیلات حاصل کی جائیں اور اس امر کو یقینی بنانے کے لیے کہ ایسا واقعہ دوبارہ پیش نہ آئے۔برائن وٹمین کے مطابق’پاکستانیوں کو بہتر انداز میں وضاحت کرنا ہوگی کہ یہ واقعہ کیوں پیش آیا‘۔

اس سے قبل افغانستان میں تعینات کثیرالملکی امن فوج نے دعوٰی کیا تھا کہ پاکستانی سکیورٹی فورس کی چوکی سے ان کے ہیلی کاپٹروں پر فائرنگ کی گئی ہے۔ بی بی سی کے ہارون رشید کے مطابق ایساف کی جانب سے کابل میں جاری کردہ بیان میں کہا گیا ہے کہ یہ واقعہ افغانستان کے صوبے خوست کے ضلع تنائی میں سرحد پر معمول کی پرواز کے دوران پیش آیا۔ یہ علاقے پاکستان کے شمالی وزیرستان سے ملتا ہے۔