اکثر لوگوں کی عادت ہوتی ہے کہ وہ پل میں تولہ اور پل میں ماشہ سی کیفیت اختیار کر لیتے ہیں اور اکثر خواتین کے متعلق ہی دیکھنے میں آتا ہے کہ وہ یہاں کچھ کہیں گی تو وہاں کچھ اور کہتی نظر آئیں گی۔ ایسی ہی کچھ کیفیات کا ادراک ہمیںا پنی کچھ عزیز اور رشتے دار خواتین کی حرکات و سکنات کا جائزہ لینے کے بعد ہوا۔

ہماری ایک عزیزہ اپنی دونوں بچیوں سمیت شرعی پردے کا اہتمام کرتی ہے۔ ہم سب ان کو رشک کی نگاہ سے دیکھتے تھے کہ اس زمانے میں جب عورت کو ہر کام کے لئے خود باہر نکلنا پڑتا ہے شرعی پردے کا اہتمام کرنا واقعتاً ایک خوشگوار احساس پیدا کرتا ہے اور ایسی خواتین کو رشک کی نگاہ سے دیکھا جاتا ہے۔ ایک شادی کے دوران جب کھانا کھلا تو مرد ویٹروں کی آمدورفت کے ساتھ ہی ہماری یہ عزیزہ اپنی دونوں بچیوں کو لے کر ہال کے کونے میں موجود دلہن کے چھوٹے سے کمرے میں شفٹ ہو گئیں۔ کسی اور عزیزہ نے ان کو چھیڑا:”ارے اٹھو ورنہ کھانا ختم ہو جائے گا چلو ہمت کرو بھئی۔“ یہ سننا تھا کہ ہماری ان عزیزہ کو غصہ آگیا اور انہوں نے کہا:”آپ لوگوں سے برداشت نہیں ہوتا اگر ہم لوگ پردہ کرتی ہیں تو....ایک دن کھانا نہیں کھائیں گے تو مر نہیں جائیں گے۔ روز تو کھاتے ہیں آج اگر نہ کھایا تو قیامت نہیں ٹوٹ پڑے گی۔“ دوسری والی عزیزہ نے فوراً اپنی خوبصورت انداز میںبے عزتی کرا لینے کے بعد چپ سادھ لی۔

ہماری بہنوں نے ان عزیزہ اور ان کی بیٹیوں کو دلہن کے کمرے میں کھانا پہنچایا تو ان کی زبان ”جزاک اللہ“ کہتے نہ تھکتی تھی۔ لیکن ایک عجیب بات جو ہم نے دیکھی کہ جب خواتین کے پورشن میں دلہے میاں کو لا کر دلہن کے پہلو میں بٹھایا یا تو ہماری ان عزیزہ نے پردہ کیا نہ ہی ان کی دونوں بچیوں نے....تعجب تو ہمیں تب اور بھی زیادہ ہوا جب ان کی دونوں بچیوں نے ہمارے استفسار پر برملا اظہار کیا کہ دلہے کو انہوں نے اپنا بھائی بنا یا ہوا ہے لہٰذا ان سے پردہ نہیں کرتیں۔ لو جی کر لو گل!

قرآن پاک کا ترجمہ پڑھتے ہوئے ایک جگہ حضرت موسیٰ علیہ السلا م کی قوم بنی اسرائیل کے متعلق پڑھا تھا کہ یہ لوگ دین کی باتیں سننے اور سیکھنی کے لئے اپنے بڑے بڑے عالم فاضل لوگوں کو حضرت موسیٰ علیہ السلام مے پاس بھیجتے تھے اور وہ عالم فاضل لوگ صرف وہی باتیں واپس آکر بتاتے تھے جن پر عمل کرنا آسان ہوتا تھا۔ آج ہم بھی اسی سرکش قوم کے نقشِ قدم پر چل رہے ہیں کہ جو چےز ہمیں آسان لگتی ہے اس پر تو فوراً عمل کر لیتے ہیں اور جو بات سمجھ نہیں آتاسے چھوڑ دیتے ہیں۔

ہماری ایک اور عزیزہ ہر معاملے خود کو دوسروں سے برتر سمجھتی ہیں۔ان کا تکیہ کلام ہے”چپ کر کے بیٹھ جاﺅ“ ۔ان کے خیال میں اسلام کا درست علم صرف انہی کو ہے اگر ہم ان کے علم میں کبھی اضافہ کرنا چاہیں تو فوراً تنک کر کہتی ہیں:”چپ کر کے بیٹھ جاﺅ،تمہیں کیا پتہ۔مجھے پتہ ہے۔میں سب جانتی ہوں۔“ہماری یہ عزیزہ اپنے اور اپنی بیٹی کے گورے رنگ پر بہت ناز کرتی ہیں اور دوسروں کے سانولے پن کا مضحکہ اڑاتی اکثر نظر آتی ہیں۔ لو بھلا بتاﺅ کون سا اسلامی عمل کہتا ہے کہ رنگ کا مذاق اڑانا جائز ہے۔ جبکہ اللہ تبارک و تعالیٰ نے خود ہمارے پیارے نبی حضرت محمد مصطفیﷺ کی مبارک زبان سے یہ الفاظ جارہ کروادئیے کہ کسی عربی کو کسی عجمی پر کسی عجمی کو عربی ہر کسی گورے کو کالے پر اور کسی کالے کو گورے پر کوئی فوقیت حاصل نہیں ہے اور اسلام تو تقویٰ کی بنیاد پر عمل کی بنیاد پر اور نیتیوں کی بنیاد پر فیصلہ کرتا ہے کہ کون کس سے برتر ہے۔جبکہ سب مسلمان آپس میں ایک دوسرے کے برابر ہیں پھر نہ جانے کہاں سے یہ لوگ ایسی عجیب و غریب قسم کی باتیں اسلام کے ساتھ منسوب کر دیا کرتے ہیں۔

ہمارے یہی عزیز رشتے دار دنیا بھر کے لوگوں کی غیبتیں کرتے نظر آتے ہیں اس وقت نہ جانے ان کااسلامی علم برقعہ اوڑھے کس کونے میں سو پڑتا ہے۔ ہماری ہی ایک اور عزیزہ کا ذکر ہے کہ جب انہوں نے اپنے بیٹے کی شادی کروائی تو سوئے اتفاق ان کی بہو ابتدا میں بیمار رہنے لگی۔اب ان عزیزہ نے ہر آنے جانے والے کو کہنا شروع کر دیا :”ہائے ہائے نجانے کونسا بدلہ نکالا ہے موئے سسرالیوں نے.... بیمار لڑکی اٹھا کر دے دی ہے۔اللہ پوچھے گا ان لوگوں سے....میرا بیٹا تو بس دوائیں خریدنے سے ہی فارغ نہیں ہوتا“ تھوڑا عرصے مےں بہو تو ٹھیک ہو گئیں کیونکہ ان کو کوئی بیماری نہیں تھی بس نئے لوگوں اور نئے ماحول کی وجہ سے طبیعت میں گرانی رہتی تھی لیکن ساس کوئی موقع ہاتھ سی جانے کہاں دیتیں؟

اب ساس صاحبہ کا یہ حال ہے کہ شوگر ارو دل کے امراض میں مبتلا ہونے کے ساتھ ساتھ جوڑوں کے مرض اور وزن کی زیادتی کا بھی شکار ہیں۔لیکن مجال ہے جو ان کے تکبر اور خودپسندی میں زرا جو کمی آئی ہو۔ بڑے دھڑلے سے ہر آتے جاتے کو اپنی دوائیں دکھادکھا کر کہتی ہیں: ”ایک ایک ٹیبلٹ ہزار ہزار روپے کی ہے۔ کوئی معمولی آدمی تو یہ ٹیبلٹ افورڈ بھی نہیں کر سکتا“ اب کون سمجھائے ان کو کہ عام انسان تو تکبر بھی افورڈ نہیں کر سکتا کیونکہ ہم،ارے سامنے ابلیس کی مثال موجود ہے جس نے تکبر کیا اور شیطان بنا۔

ہمارے پیارے نبی حضرت محمد مصطفی ﷺ نے فرمایا تھا کہ دوزخ میں زیادہ تعداد عورتوں کی ہو گی کیونکہ وہ صبر اور شکر نہیں کرتیں۔ یہ بات سو فیصد درست ہے کیونکہ واقعی یہ دو ہتھیار ہی انسان کی زندگی میں سکون لاتے ہیں اور کہتے ہیں کہ ایک کامیاب مرد کے پیچھے ایک عورت کا ہاتھ ہوتا ہے اور ناکام مرد کے پیچھے دو عورتوں کا ہاتھ ہو تا ہے۔ میرے خیال سے یہ یوں ہونا چاہئے کہ ایک کامیاب مرد کے پیچھے ایک صابرو شاکر عورت کا ہاتھ ہوتا ہے جبکہ ایک ناکام مرد کے پیچھے ایک ناشکری، غیر صابر ارو لالچی عورت کا ہاتھ ہوتا ہے

(سائرہ غفار)

بشکریہ: http://karachiupdates.com

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر