وہ کوئی بیس، بائیس سال کے لگ بھگ ہوگی ۔ جو میرے ڈرائنگ روم میں اس وقت نظریں جھکائے بیٹھی تھی ۔ اس کے چہرے سے کرب کے آثار نمایاں نظر آتے تھے۔ لگتا تھا کہ وہ کسی بہت بڑے امتحان سے گزر رہی ہے ۔ اس کے ہاتھ میں ایک فائل تھی جس کو اس نے اپنی گود میں رکھ لیا تھا ۔

میں اس کے سامنے صوفے پر بیٹھی اس کے بولنے کا انتظار کررہی تھی اور جاننا چاہتی تھی کہ وہ کون ہے اور میرے گھر کیوں آئی ہے؟

اس نے کہنا شروع کیا ۔ میرا نام صائمہ ہے اور میرے والد کا نام امجد ۔ میں اپنے ماں باپ کی اکلوتی اولاد ہوں ۔ میرے والد کا دوسال ہوئے انتقال ہوچکا ہے ۔ میری والدہ نے میرے والد کے انتقال کے بعد بہت ہمت سے وقت گزارا لیکن وہ کچھ بیمار رہنے لگیں تھیں ۔ کل ان کو برین ہیمرج ہوگیا ۔ جس کی وجہ سے ان کا آدھا جسم فالج زدہ ہوگیا ہے ۔ میرے ماں باپ نے اپنی تمام جمع پونجی سے ایک گھر بنایا تھا ۔ یہی گھر میرے ماں باپ کی کل جائیداد ہے ۔

آج میری ماں نے وکیل کو بلا کر یہ گھر آپ کے نام کردیا ہے اور مجھے ہدایت کی ہے کہ میں خود آپ کو یہ کاغذات دے کر آؤں ۔ یہ کہتے ہوئے اس کی آنکھوں میں بے اختیار آنسو آگئے جو اس نے کمال ضبط کا مظاہرہ کرتے ہوئے پی لیے ۔

اور وہ فائل میری طرف بڑھادی ۔

میں نے اس سے فائل لے کر سامنے میز پر رکھ دی اور حیران ہوکر صائمہ کو دیکھنے لگی ۔

میری کچھ سمجھ نہیں آرہا تھا کہ جن لوگوں کو میں جانتی نہیں، اس لڑکی کو آج میں نے پہلی بار دیکھا، اس نے اپنے والد کا جو نام بتایا وہ میرے لیے بالکل اجنبی تھا اور اس کی ماں نے اپنا آشیانہ اوراپنی بیٹی کے سر کی چھت میرے نام کردی ۔

میں نے غیر یقینی کے عالم میں اس سے کہا کہ میں تمھاری ماں سے ملنا چاہتی ہوں ۔

صائمہ نے اثبات میں سر ہلاکر کہا اس کے لیے آپ کو گھر چلنا پڑے گا۔

میرے بیٹے نے سارا قصہ دروازہ پر کھڑے ہوکر سن لیا۔ میں جب اندر چادر اوڑھنے گئی تو میرے بیٹے نے مجھ سے کہا امی آپ بھی کن لوگوں کی باتوں میں آرہی ہیں ۔ آجکل کے زمانے میں ایسا ہوتا ہے کیا ۔ ضرور یہ لڑکی جھوٹ بول رہی ہے اور آگے کوئی بڑا دھوکہ نہ دے ۔
میں نے اپنے بیٹے کی طرف دیکھا اور کہا بیٹا تم نے اس کی آنکھیں نہیں دیکھیں ۔ میرا دل کہتا ہے کہ لڑکی جھوٹ نہیں بول رہی ہے ۔

میرے بیٹے نے میرے سامنے ہتھیار ڈالتے ہوئے کہا کہ میں بھی آپ کے ساتھ چلوں گا ۔

ہم اس لڑکی کے ہمراہ اس کے گھر پہنچے ۔ یہ گھر شہر کے ایک امیر علاقے میں واقع تھا ۔ اور گھر کیا پانچ سو گز کی کوٹھی تھی ۔ جو دیکھنے سے ہی لگ رہا تھا کہ بنانے والے نے اسے بہت ارمان اور شوق سے بنایا ہے ۔

میں ایک غریب بیوہ جس نے اپنی پوری زندگی دو کمروں کے کرائے کے فلیٹ میں گزاری ۔ اور بحیثت ایک اسکول ٹیچرمحنت کرکے اپنے بیٹے کو پڑھا لکھا کر جوان کیا ۔

کسی نے اتنا بڑا گھر میرے نام کردیا ۔ یہ بات میرے لیے کسی عجوبے سے کم نہ تھی ۔

صائمہ ہم کو گھر کے اندر لے کر گئی ۔
ہم پہلے ڈرائنگ روم ، پھر لاؤنچ سے ہوتے ہوئے ایک بیڈروم میں آگئے، جہاں ایک نحیف سی خاتون بستر پر سو رہی تھی ۔ چہرے پر نور ہی نور تھا ۔ میں اس خاتون کو دیکھتے ہی، نا چاہتے ہو ئے بھی ماضی میں چلی گئی۔۔۔۔۔۔

میرے شوہر کی اچانک کار ایکسڈنٹ میں موت نے مجھے جیسے ہوش وحواس سے بے گانہ کردیا تھا۔

مجھے ہوش اس وقت آیا جب میرے شوہر کے سوئم کے دوسرے دن میرے ساس سسر میرے کمرے میں آئے ۔ اس وقت میری گود میں میرا دوسال کا بیٹا سو رہا تھا ۔
میری ساس نے زبردستی میرے بیٹے کو مجھ سے چھین لیا اور سسر نے میرے سامنے ایک فائل رکھی اور کہا کہ اگر تم اس گھر سے اپنے بیٹے کو اپنے ساتھ لے جانا چاہتی ہو تو ان کاغذات پر دستخط کردو ۔

وہ ُاس گھر سے لاتعلقی کے کاغذات تھے ، جو گھر میرے شوہر نے اپنی فیملی کے لیے بڑے ارمان اور شوق سے بنایا تھا ، جو میرا آشیانہ اور میرے بیٹے کا سائبان تھا۔

میرے ساس سسر کے پیچھے میری غیر شادی شدہ چھوٹی نند آنسو بہاتی کھڑی تھی اور اپنے ماں باپ سے ان کے اس ظلم کے خلاف احتجاج کررہی تھی ، اور اس کو یہ کہہ کر ڈانٹ دیا جارہا تھا کہ تم بڑوں کے بیچ میں نہیں بولو۔

میں نے اپنی چھوٹی نند کو اپنی چھوٹی بہن بلکہ اپنی بیٹی جیسا پیار دیا تھا ۔ جس کا وہ حق ادا کرنے کی کوشش کررہی تھی ۔

میں نے ان کاغذات پر خاموشی سے دستخط کردیے ۔

مجھے اس گھر سے اپنے بیٹے کے علاوہ کچھ بھی لے جانے کی اجازت نہ تھی ۔

جب میں وہاں سے جارہی تھی تو بس پیچھے سے اپنی چھوٹی نند کی آواز آرہی تھی جو دوڑتی ہوئی میرے پیچھے آرہی تھی اور بھابی بھابی پکار رہی تھی ۔

اور پھر میں نے اس دن کے بعد کبھی واپس پلٹ کے نہیں دیکھااور اپنی اور اپنے بیٹے کی زندگی بنانے میں مصروف ہوگئی۔

آج میری پیاری نند میرے سامنے بستر پر لیٹی موت و زیست کی کشمکش میں اپنے ماں باپ کے گناہوں کا کفارہ ادا کرنے کی کوشش کررہی تھی۔

میری آنکھوں سے بے اختیار آنسو جاری ہوگئے ۔ میں نے آگے بڑھ کر اپنی پیاری بہن جیسی نند کے ماتھے پر پیار کیا، میرے آنسو اس کے گال پر گرے تو اس کی آنکھ کھل گئی۔ آج بھی اس کی آنکھوں میں میرے لیے بے تحاشا پیار موجزن تھا ۔

اس نے اپنی لڑکھڑاتی ہوئی زبان سے کہا

بھابی

میرے ماں باپ کو معاف کردیں

__________________
اے اللہ
میرے ہر فیصلے میں تیری رضا ہو شامل
جو تیرا حکم ہو وہ میرا ارادہ کردے