چاند رات کا لفظ ہی اتنا پر کشش ہے کہ ادا کرتے ہو ئے دل کھنچ جا تا ہے۔

یادوں کا دریچہ کھلتا ہے۔
منظر ایک چھت کا ہے۔ چھت کچی مٹی کی ہے اور ارد گر د سب چھتیں کچی ہیں۔ ہر چھت پر لوگ ہیں ، بچے ہیں ۔ سامنے چھوٹی چھوٹی پہاڑیوں میں ابھی ابھی سورج ڈوبا ہے۔ ان پہاڑیوں سے ذرا پیچھے اونچے پہاڑوں کا ایک لمبا سلسلہ ہے۔ کچھ لوگوں کی نظریں ادھر گڑی ہیں ۔ مگر۔۔۔۔ کچھ لوگوں کی نظریں۔۔۔ گڑی نہیں ہیں ۔۔ آپس میںلڑی ہیں ۔۔
ہر کسی کے اپنے اپنے " چا ند " ہیں ۔۔۔
اور ہر کوئی اپنا " چاند " دیکھ رہا ہے۔۔۔
ہلکی ہلکی میٹھی ٹھنڈی ، خوشبووں سے لبریز ہوا
معصوم، نازک، انجانے ، ان چھوئے ، ان دیکھے جذبوں سے لبریز ڈھرکتے دل۔۔۔۔۔۔۔
کیا یہی چاند رات ہے۔۔۔

اچانک کہیں سے آواز آئی " وہ چاند نظرآگیا"
اور پھر آوازوں کا ایک تانتا بندھ گیا۔
" ہاں مجھے بھی نظر آگیا "
" کدھر ہے ۔ مجھے بھی دکھا و"
" ہاں وہ رہا "
اور پھر
ایک فائر کی آواز فضا میں گونجی ۔۔۔
دوسری ۔۔۔ تیسری۔۔اور تانتا بندھ گیا
اور پھر اس شور میں بہت سے چا ند جیسے چہرے گم ہو گئے۔۔۔
۔۔۔۔۔۔۔۔۔۔۔۔۔۔۔۔۔۔۔
کچی چھتوں پر ننگے پاوں چلتے ہو ئے کچھ جانے پہچانے چہرے ۔۔۔
دھیمی باتیں۔۔۔
سرگوشیاں۔۔
کیا یہی چاند رات ہے۔

ایک اور دریچہ کھلتا ہے۔۔
میلوں دور تک پھیلے ہوئے سر۔۔۔۔
لگتا ہے سروں کی سڑک بن گئی ہو۔۔۔
کھوے سے کھوا چل رہا ہے۔۔۔
ہر دوکان میں لوگوں کا رش ۔۔۔
کہیں ہلڑ بازی ۔۔۔
کہیں فقرے بازی
کہیں قہقہے ، کہیں گالیاں۔۔۔
بازار ہی بازار
خریدار ہی خریدار
روشنی ہی روشنی
رنگ ہی رنگ
۔۔۔۔۔۔۔۔۔۔۔۔۔۔۔
کیا یہی چاند رات ہے۔۔۔۔۔۔۔۔۔۔