عبدالقدوس

لاہور (کلچرل ڈیسک) جیو فلمز کی نئی پنجابی فلم ”محبتاں سچیاں“ نے کامیاب نمائش کے 8 دن مکمل کر لئے واضح رہے کہ یہ فلم عیدالفطر پر نمائش کیلئے پیش کی گئی تھی اور اسے عوام و خواص نے ایک معیاری پاکستانی پنجابی فلم قرار دیا ہے۔ شہزاد رفیق کی زیرہدایت بننے والی مذکورہ فلم دیکھنے والے شائقین کی اکثریت خواتین اور نوجوانوں پر مشتمل ہے جبکہ آئندہ کئی دنوں تک کیلئے اس فلم کے درجنوں شوز کی ایڈوانس بکنگ بھی ہو چکی ہے۔ شائقین کے علاوہ فلم سمیت دیگر شعبہ ہائے زندگی سے تعلق رکھنے والی شخصیات نے بھی فلم کی کہانی، میوزک اور وینا ملک، عدنان، ببرک شاہ اور زاہد سلیم کی اداکاری کو سراہا ہے۔ شائقین کا کہنا ہے کہ ہم حیرت زدہ ہیں کہ پاکستان میں ایک ایسی فلم بنائی گئی جسے پورے اعتماد کے ساتھ مہنگی ترین انڈین فلموں کے مقابلے میں نمائش کیلئے پیش کیا جا سکتا ہے جبکہ فن کاروں کا خیال ہے کہ یہ فلم خالصتاً پاکستانی فلم ہے اور اس پر ہم فخر کر سکتے ہیں اور اس فلم کی مقبولیت نے نہ صرف سینما بینی کے رجحان میں اضافہ کیا ہے بلکہ فلمی صنعت سے لگاؤ رکھنے والوں کو ایک نیا حوصلہ دیا ہے جس سے یہ امید ہو چلی ہے کہ اب فلموں پر سرمایہ کاری کرنے کیلئے سنجیدہ طبقہ بھی آگے آئے گا۔

__________________