عبدالقدوس

کراچی (اسٹاف رپورٹر) ممتاز دانشور اور ماہر تعلیم پروفیسر اعجاز احمد فاروقی نے کہا ہے کہ فن چہار بیت برصغیر کے مسلمانوں کا تاریخی، تہذیبی اور ثقافتی ورثہ ہے۔ ان خیالات کا اظہار انہوں نے لانڈھی میں بزم تاج کراچی کی جانب سے جشن تاج پوشی، رسم دستار بندی اور محفل چہار بیت کے موقع پر بحیثیت مہمان خصوصی اپنے خطاب میں کیا۔ انہوں نے کہا کہ یہ ایک زندہ فن ہے جو لوگوں کو اپنی طرف راغب کرنے کی بھرپور صلاحیت رکھتا ہے۔ انہوں نے کہا کہ میں فن چہار بیت کو اسلامی ثقافت سمجھتا ہوں اس لئے کہ اس میں صرف دف استعمال کیا جاتا ہے۔ صدر تقریب معروف علمی و ادبی شخصیت اسحاق ہاشمی نے کہا کہ یہ برصغیر کے ان مسلمانوں کا ثقافتی ورثہ ہے جو ہجرت کرکے پاکستان آئے۔ اس فن کی ترویج پاکستان میں بھی ہونی چاہئے اگر پرنٹ میڈیا اور الیکٹرونک میڈیا اس فن پر توجہ دے تو یہ فن بھی ترقی کی منازل طے کرسکتا ہے۔ تقریب سے مہمان اعزازی، ممتاز قانون داں اور شاعر توقیر اے خان ایڈووکیٹ، معروف ماہر تعلیم سید جواد حیدر نقوی، ناظم یوسی6 لانڈھی عمران احمد خان، عزیز الرحمان خان، اختر سعیدی، رشید خان رشید اور سعید الرحمان نے بھی خطاب کیا۔ قبل ازیں بزم تاج کی جانب سے پروفیسر اعجاز احمد فاروقی نے بزم کے استاد محمد جمیل خان کی خدمات کے اعتراف میں تاج پوشی کی۔ بعد ازاں اسحاق ہاشمی نے بزم تاج کے مین پرفارمر محمد وزیر خان کی خدمت میں کمال فن ایوارڈ پیش کیا۔ بعد ازاں استاد محمد جمیل خان ٹونکی نے اپنے جانشین حافظ طفیل محمد خان اور اپنے چار خلفاء انیس الرحمان نجم، ایاز محمد خان، محمد صادق اور کلیم اختر کی رسم دستار بندی بھی ادا کی۔

__________________