عبدالقدوس

غزل کے معروف گائک غلام عباس نے کہا ہے کہ ہمارے نوجوان گلوکار بلاشبہ آج بہت فعال ہیں اور انہیں شہرت بھی حاصل ہے۔ لیکن گائیکی ایسا شعبہ ہے جس میں محض شہرت کامیابی کا معیار نہیں، فن اور کارکردگی میں مہارت اصل چیز ہے۔ ہمارے نوجوان پاپ سنگرز کی گائیکی میں وہ ذوق و شوق مفقود ہے، جو بنیادی ضرورت ہے۔ اسی لئے بہت شہرت حاصل کرنے والے سنگرز جلد ہی اسکرین سے آؤٹ ہو جاتے ہیں۔ ان کا کوئی ایک فن پارہ بھی لوگوں کے ذہن میں محفوظ نہیں رہتا جبکہ ہمارے میوزک کے اہم ناموں میں ملکہ ترنم نور جہاں، مہدی حسن، فریدہ خانم، اقبال بانو، احمد رشدی اور دیگر کے بہت سے گیت اور غزلیں آج بھی روشن اور تازہ ہیں۔ خود میرے بہت سے گیت اور غزلیں میرا حوالہ بن چکے ہیں۔ لیکن گائیکی کا سفر تو جاری ہے۔ یہ باتیں انہوں نے جنگ سے غیر رسمی گفتگو میں کیں۔ ایک سوال کے جواب میں گلوکار غلام عباس نے کہا کہ پڑوسی ملک کے چینلز پہ میوزیکل شوز میں ایک دوڑ لگی ہے۔ مگر وہاں محنت اور ریاضت پر مسلسل توجہ کی جاتی ہے۔ ہم ایسا نہیں کر سکتے کیونکہ ہمارے وسائل محدود ہیں۔ لیکن اپنے نو آموز ٹیلنٹ کو مستحکم راہ تو دکھائی جا سکتی ہے۔ کسی بھی شعبہ میں کامیابی محض شہرت یا دولت کما کر حاصل نہیں کی جا سکتی۔ اس کے لئے مسلسل محنت اور کام کی ضرورت ہے۔ ہمارے نوجوان گلوکاروں کو پائیدار مقبولیت کے حصول کے لئے اچھے گیتوں کا انتخاب کرنا چاہئے۔ اچھی شاعری کو سمجھ کر پر فارم کر کے وہ بھرپور شہرت حاصل کریں۔ غلام عباس نے کہا کہ ہم سینئرز کے لئے کوئی اچھی آواز خطرہ نہیں ہے بلکہ جو با صلاحیت گائیک آئے انہیں سن کر خوشی ہوتی ہے اور جی چاہتا ہے کہ گلوکاری میں جدید رجحان اور انداز کو اپنانے کے بجائے اساتذہ کی راہ اختیار کریں۔ گلوکار غلام عباس نے مزید کہا کہ کسی آرٹسٹ میں اعتماد اس وقت آتا ہے جب وہ باقی سب کے مقابلے میں اپنی صلاحیتوں کا فنی لحاظ سے بہتر اظہار کرے۔ گلوکار غلام عباس نے مزید کہا کہ چینلز کی بہتات میں با صلاحیت لوگوں کو آگے آنا چاہئ

__________________