محمدعدنان

اترپردیش میں ریاستی حکومت نے ہندی فلم ’آجا نچلے‘ میں دلتوں کے لیے مبینہ توہین آمیز الفاظ کے استعمال کی شکایت کے بعد فلم پر پابندی لگادی ہے۔
جمعہ کو ریلیز ہونے والی اس فلم پر ریاست کی مایاوتی حکومت نےاسی روز پابندی لگادی اور وزیراعظم منموہن سنگھ کو ایک مکتوب لکھ کر اس فلم پر پورے ملک میں پابندی لگانے کا مطالبہ کیا ہے۔

فلم کے ایک گانے کے ’بول‘ پر اعتراض کیا جارہا ہے۔ فلم کے ٹائٹل گیت کی دو سطریں ہیں’محلے میں کیسی مارا ماری ہے ، بولے موچی بھی خود کو سنار ہے‘۔

اعتراض کرنے والوں کا کہنا ہےکہ لفظ ’موچی‘ دلتوں کے لیے توہین آمیز ہے۔

اترپردیش کے انفارمیشن سیکرٹری شیلش کرشن کا کہنا ہے’ فلم میں ایک قوم کے خلاف توہین آمیز لفظ کا استعمال کیا گيا ہے جو غیر آئینی ہے، اس لیے فلم پر پابندی لگا دی گئی ہے‘۔

ریاست کے داخلہ سیکرٹری جے این چینبر کا کہنا ہے کہ اس فلم سے ایک ریاست کے ایک بڑے طبقے کے جذبات مجروح ہورہے تھے اور اس سے ریاست میں امن و امان کو خطرہ لاحق تھا، اس لیے یہ فیصلہ کیا گيا ہے۔

فلم کے ڈائریکٹر انیل مہتا نے بی بی سی کو بتایا’ ان کا ارادہ کسی کے جذبات کو مجروح کرنا نہیں تھا اور اگر فلم کے اس ’بول‘ سے کسی کے جذبات مجروح ہوتے ہیں تو وہ گانےکی ان سطروں کو واپس لے لیں گے‘۔

ان کا کہنا تھا: ’میں سمجھتا ہوں کہ اگر کسی سطرکو لیکر ریاست کی حکومت فلم پر پابندی کا قدم اٹھا چکی ہے تو بہتر ہوگا کہ فلم سے ان سطروں کو ہٹا دیا جائے‘۔

ان کا یہ بھی کہنا تھا کہ سبھی تقسیم کاروں کو ہدایت جاری کی جا چکی ہے کہ وہ ٹائٹل گیت کی اس سطر کو ہٹا دیں جس پر اعتراض کیا جارہا ہے۔

حکومت کے فیصلے سے قبل فلم دیکھنے والے ناظرین نے پابندی کو غیر مناسب قرار دیا۔ ایک شخص کا کہنا تھا کہ ’موچی‘ اور’ سنار‘ کسی ذات کے خلاف توہین آمیز لفظ اب نہیں رہے اور ان پر اعتراض غلط ہے۔ بعض ناظرین کا کہناہے کہ مایاوتی نے سیاست کے دباؤ میں یہ پابندی لگائی ہے۔

وزیر اعلی مایاوتی کے پرنسپل سیکرٹری شیلیش کرشنا کا کہنا ہے کہ سنیما مالکان اگر اس گانے کی قابل اعتراض سطریں نکال دیں، تو فلم دکھائی جاسکتی ہے۔

مسٹر کرشنا کے مطابق سطریں نکالنے کے بعد مقامی انسپکٹروں سے ایک سرٹفکیٹ حاصل کیا جاسکتا ہے۔

’آجا نچلے‘ مشہور بالی وڈ اداکارہ مادھوری دکشت کی نئی فلم ہے اور اس فلم کے ذریعے وہ کئی برسوں کے بعد بالی وڈ میں واپس آئی ہیں۔ شادی کے بعد وہ امریکہ چلی گئی تھیں اور فلموں میں کام کرنا بند کردیا تھا۔

__________________