محمدعدنان

فلمی اداکارہ میرا نے اپنے خلاف درج مقدمے کے اخراج کے لیے وزیر اعلٰی پنجاب کے شکایات سیل سے رجوع کرلیا ہے۔

ان کا کہنا ہے کہ وہ پنجاب کی بیٹی ہیں اور وزیر اعلٰی شہباز شریف انہیں انصاف دلائیں۔

سوموار کو اداکارہ میرا وزیر اعلٰی شکایات سیل پہنچیں اور متعلقہ حکام کو داد رسی کے لیے تحریری درخواست دی جس میں کہاگیا کہ انہیں جان سے مارنے کی دھمکیاں دی جا رہی ہے اس لیے انہیں تحفظ فراہم کیا جائے۔

وزیر اعلیْ شکایت سیل کے ڈایریکٹر شاہد قادر نے بی بی سی کو بتایا کہ اداکار میرا کی درخواست پر سٹی چیف پولیس آفیسر کو ہدایت کردی گئی ہے کہ اگر اداکارہ میرا دھمکیاں دی جارہی ہیں تو انہیں تحفظ فراہم کیا جائے ۔ ان کے بقول پولیس کو یہ ہدایت کی گئی ہے کہ وہ میرا پر قاتلانہ حملے کے الزام میں مقدمہ کے اندراج کے لیے درخواست پر جائزہ لے کر قانون کے مطابق کارروائی کریں۔

میرا اور ان کے گھر والوں کے خلاف چوری کے الزام میں مقدمہ درج ہے اور یہ مقدمہ فیصل آباد کے ایک ایسے کاروباری شخصیت عتیق الرحمان نے درج کرایا ہے جو ان اداکارہ کا شوہر ہونے کے دعویدار ہیں۔

لاہور کی مقامی عدالت نے سنیچر کو اداکارہ میرا کی ضمانت منظور کرتے ہوئے انہیں گرفتار نہ کرنے کا حکم دیا تھا۔

اداکارہ میرا کا مؤقف ہے کہ ان کے خلاف جو چوری کا مقدمہ درج کیا گیا ہے وہ بے بیناد ہے اور یہ تمام ڈرامہ عقیق الرحمان نامی شخص نے بھارتی ہدایتکار فیصل سیف کے ایما پر رچایا ہے۔ ان کا کہنا ہے کہ یہ کیسے ممکن ہے کہ وہ اپنے ہی گھر میں چوری کریں۔ انہوں نے استدعا کی کہ ان کے خلاف جو جھوٹا مقدمہ درج کیا گیا ہے اسے خارج کیا جائے۔ ان کے بقول انہیں دھمکیاں دی جا رہی ہیں اس لیے انہیں تحفظ فراہم کیا جائے۔

میرا کا کہنا ہے کہ ایک فنکار کی حیثیت سے انہوں نے پاکستان کا نام روشن کیا ہے اور آج وہ انصاف اور تحفظ کے لیے وزیراعلٰی شکایات سیل آئی ہیں اورانہیں امید ہے کہ ان کی دادرسی کی جائے گی۔

دوسری جانب لاہور کی مقامی عدالت نے اداکارہ میرا کی ایک درخواست پر سماعت مکمل کرلی ہے جس میں یہ کہاگیا کہ ان پر قاتلانہ حملہ کیا گیا ہے لیکن پولیس مقدمہ درج نہیں کررہی۔ درخواست میں یہ استدعا کی گئی کہ پولیس کو ہدایت کی جائے کہ وہ ان پر ہونے والے حملے کا مقدمہ درج کرے۔

وزیر اعلٰی شکایت سیل کے ڈایریکٹر شاہد قادر نے بی بی سی کو بتایا کہ اداکار میرا کی درخواست پر سٹی چیف پولیس آفیسر کو ہدایت کردی گئی ہے کہ اگر اداکارہ میرا کو دھمکیاں دی جارہی ہیں تو انہیں تحفظ فراہم کیا جائے۔ ان کے بقول پولیس کو یہ ہدایت کی گئی ہے کہ وہ میرا پر قاتلانہ حملے کے الزام میں مقدمہ کے اندراج کے لیے درخواست پر جائزہ لے کر قانون کے مطابق کارروائی کریں۔