کسی جنگل میں ایک ننھی چیونٹی اپنی بوڑھی ماں کے ساتھ رہتی تھی۔ ماں چیونٹی جب تک صحت مند تھی وہ اپنے اور اپنی ننھی بیٹی کے لیئے مزے مزے کے دانے لاتی تھی۔ جب وہ بوڑھی اور کمزور ہوگئی تو کھانے لانے اور جمع کرنے کی ذمہ داری ننھی چیونٹی کے کاندھوں پر آپڑی۔ ماں چیونٹی نے اپنی بیٹی کو نصیحت کی کے بارش کے ہونے سے پہلے بہت ساری خوراک جمع کرنا ضروری ہے تاکہ برسات کے دنوں میں آرام رہے اور خوراک کی تلاش میں بل سے باہر بھی نہ جانا پڑے۔

ننھی چیونٹی دیگر چیونٹیوں کے ہمراہ دانے جمع کرنے کے لیئے گھر سے نکلی پہلے دن جمع ہونے والے دانے بہت کم تھے۔ ماں چیونٹی نے ننھی چیونٹی سے کہا کہ یہ خوراک تو بہت کم ہے اس سے سردیوں اور برسات کے دنوں میں کچھ بھی نہیں ہوگا۔ ننھی چیونٹی ہمت ہار چکی تھی وہ بولی "امی میں تو ایک ننھی سی چیونٹی ہوں بھلا میں اتنی ساری خوراک کس طرح جمع کرسکتی ہوں؟"۔
دوسرے دن ننھی چیونٹی کی خالہ اُن کے گھر آئیں اور اُنہوں نے ننھی چیونٹی کو اپنے ساتھ خوراک جمع کرنے کے لیئے چلنے کو کہا۔ ننھی چیونٹی نے دیکھا کے چھوٹی چیونٹیاں ننھے ننھے دانے اُٹھائے تیزی سے اپنے بلوں کی جانب جا رہی ہیں اور بڑی چیونٹیاں بڑے دانوں کو لادے آہستہ آہستہ چل رہی ہیں، ننھی نے سوچا کہ کاش وہ بھی بڑے بڑے دانے اُٹھا سکتی کیوں کے اس طرح وہ کم وقت میں ذیادہ خوراک جمع کرسکتی تھی۔ خالہ اُس کے دل کی اس بات کو سمجھ گئیں اور اُنہوں نے ننھی چیونٹی کو پیش کش کی کے اگر وہ اُن کے گھر میں ننھے دانے جمع کرے تو خالہ اُس کے گھر میں بڑے بڑے دانے پہنچا دیں گی۔ ننھی چیونٹی یہ سُن کر بہت خوش ہوئی اور فوراً راضی ہوگئی۔
دن گزرتے گئے اور ننھی چیونٹی ہر روز پابندی سے ننھے دانے اپنی خالہ کے گھر پہنچانے لگی۔ یہ سلسلہ چلتا رہا یہاں تک کے برسات کے موسم کے آنے کا وقت آ پہنچا۔ ننھی چیونٹی اپنی گھر میں خالہ کے لائے ہوئے خوراک کے بڑے بڑے دانوں کو دیکھ کر بہت خوش تھی اُس نے سوچا کہ کیوں نہ خالہ جان کا شکریہ ادا کیا جائے چناچہ وہ اپنی امی کے ساتھ خالہ کے گھر جا پہنچی اور خالہ کا شکریہ ادا کیا۔ خالہ نے ننھی کی بات سُن کر مُسکراتے ہوئے کہا کہ شکریہ تو مجھے تمھارا ادا کرنا چاہیئے کیونکہ تمھارے لائے ہوئے چھوٹے چھوٹے دانے میرے لائے ہوئے بڑے بڑے دانوں سے مقدار میں کہیں ذیادہ ہیں۔ ننھی یہ بات سُن کر حیران ہوگئی۔
خالہ نے اُسے اپنے گھر کے گودام میں پڑے ہوئے سینکڑوں ننھے دانے دیکھاتے ہوئے کہا کہ "تمھاری مسلسل کی جانی والی کوشش اور محنت دراصل بڑی چیونٹیوں کی محنت ہی کے برابر تھی۔ یادرکھو محنت اور کام کو باقاعدگی سے کرنے میں ہی کامیابی ہے!"

__________________
میں‌تمھارے اس حق کے لیئے کہ تم مجھ سے "اختلاف" کرسکو، آخری وقت تک لڑوں‌گا!