محمدعدنان

نیو یارک میں بیونسے اور جے زی کی شادی کے لائسنس کے لیے درخواست دے دی گئی ہے۔
ان دونوں نے پچھلے ماہ مینہیٹن میں ایک شاندار پارٹی دی تھی۔ تاہم انہوں نے اس بات کی تصدیق نہیں کی کہ ان کی شادی ہو گئی ہے۔

نیویارک کے سکارشڈیل کے ضلعی انتظامیہ کے دفتر میں ڈونا کونکلنگ کا کہنا ہے کہ شادی کے لائسنس کے حوالے سے درخواست موصول ہوئی ہے۔

بیونسے اور جے زی نے سنہ دو ہزار دو سے اپنے تعلقات کو کبھی تسلیم نہیں کیا۔

کونکلنگ نے اس بات کی بھی تصدیق کی کہ لائسنس پر شادی کی رسم کرنے والےاہلکار کی بھی دستخط موجود ہے۔

امریکی میڈیا کے مطابق چار اپریل کو جے زی کے فلیٹ پر منعقد کی گئی پارٹی میں اداکارہ گوینتھ پالٹرو، کیلی رولینڈ اور مشیل ولیمز نے شرکت کی۔

سفید پھول اور فانوس فلیٹ پر پہنچائے گئے جب کہ چھت پر سفید شامیانہ لگایا گیا تھا۔

چھبیس سالہ بیونسے اور اڑتیس سالہ جے زی جن کا اصل نام شون کارٹر ہے نے کئی گانوں پر اکٹھے کام کیا ہے۔ اطلاعات کے مطابق جے زی سو ملین ڈالر کے لائیو نیشن کانسرٹ کے معاہدے پر بات چیت کر رہے ہیں۔

__________________