عبدالقدوس

کراچی ( رپورٹ : جاوید رشید ) بالی ووڈ کے سالانہ اجلاس میں بالی ووڈ کے اداکاروں، فلمسازوں اور ہدایتکاروں نے پاکستان کے نجی ٹی وی چینل جیو کی بندش پر افسوس کا اظہار کیا ہے۔ جنگ نے اس سلسلے میں بالی ووڈ کے سینئر فنکاروں سے جیو ٹی وی کے بارے میں انکے خیالات معلوم کیے ہیں۔ مہش بھٹ نے کہا کہ میری سوچ ہے کہ میڈیا کو آزاد ہونا چاہئے اگر حکومت کو ٹی وی چینل والوں سے کوئی شکایت ہے تو اس کے لیے ضابطہ اخلاق بنا دیا جائے لیکن بندش خلاف قانون عمل ہے۔ انہوں نے بھارتی ٹی وی چینل من مت کی بندش پر افسوس کا اظہار کیا ہے۔ فلم انڈسٹری کے نامور فنکاروں ونود کھنہ کا کہنا ہے کہ آزادی بہرحال آزادی ہے سچ کو سننے کا حوصلہ ہونا چاہئے۔ حکومت کو صبر و تحمل کا اظہار ہرحال میں کرنا ہوتا ہے۔ جیو ٹی وی ایک اچھا چینل ہے شکایت کو دور کرنے کے اور بہت سے راستے ہوتے ہیں اور حکومت راستوں سے واقف ہوتی ہے بالی ووڈ کے اداکار نے کہا کہ جیو چینل تو اچھا کام کررہا تھا اس پر پابندی اچھا اقدام نہیں ہے۔ اداکار ہیما مالنی کا کہنا ہے میڈیا سے سب کو شکایت ہوتی ہیں لیکن شکایت کو دور کرنے کے لیے بات چیت کا راستہ اختیار کرنا چاہئے۔ اخبار ٹی وی کی بندش میری نظر میں کوئی دانش مندی کا فیصلہ نہیں ہے۔ اداکار ریکھا نے کہا کہ میں نے جیو کی نشریات دیکھی ہیں مجھے اس سے پاکستان کے بارے میں بہت کچھ معلوم ہوا ہے۔ بھارتی ٹی وی چینلز کے مقابلے کا یہ چینل بھارت میں بھی مقبول ہے اس کی نشریات کو بندکرنا نامناسب عمل ہے۔ حکومت اس پر نظرثانی کرے اور اس کی نشریات کو بحال کرے۔

__________________