قائدِاعظم محمد علی جناح نے 25 دسمبرکو اس دُنیا میں آنکھ کھولی ۔کس عُمرمیں اُنہوں نے کون تعلیم مکمل کی، کتنی تعلیم حاصل کی ، پاکستان کیلئے اُنہوں نے کیا کچھ نہیں کیاوغیرہ۔ہم پرائمری سے مڈل اورایف اے کے نصاب تک قائدِ اعظم کے بارے میں وہی رٹی رٹائی باتیں پڑھتے اورمضامین میں لکھتے چلے آرہے ہیں لیکن آج یہاں وہی باتیں لکھنا اُس عظیم لیڈر کی ذات کو ایک اوربار رٹہ لگاکردُہرانے کے مُترادف ہوگا۔بلکہ اب ہمیں یہ جاننا چاہیے کہ آزادی کے بارے میں اُن کے نظریات کیا تھے؟ ذات پات کی اہمیت اُنکی نظرمں کس حد تک تھی؟ کس کس موقع پر اُنہوں نے قوم کوکیسا سبق دیا؟ مختصراًاب ہمیں قائدِاعظم کو جاننایا اُنکے بارے میں جاننا نہیں ہے بلکہ خودکوتھوڑی دیرکیلئے اُس جگہ پر موجودرہ کراُنکی حیات کا گہرا مشاہدہ کرنا ہے، اُنکی تقاریرکوکو یوں پڑھنا ہے گویاآج وہ ہم سے خود محوِگفتگوہوں تبھی ہم اس عظیم لیڈرکی حیات ِزندگی کے مقصد کو جان سکتے ہیں اورتبھی اِس دِن کی اہمیت کا اندازہ لگاسکتے ہیں کہ وہ ہمارے لئے کیا تھے۔

آج ہم ایک آزادقوم ہیں، ہماری اپنی ایک پہچان ہے، اس آزاد فضاء میں ہم اپنی مرضی سے سانس لے سکتے ہیں۔ یہ آزادی و پہچان اُس عظیم اِنسان کی مرہون منت ہے جس نے دیوانے کے خواب کو پوراکرنے کیلئے کیا کچھ نہیں کیا۔ یہ اللہ کا احسان ہی تو ہے جس نے ایک بہادر، نڈر، باکرداراور با ہمت قائدکو ہمارے لئے آزادی کا پروانہ بنا کر بھیجااورجس کے بارے میں خود مہاتماگاندھی نے کہاتھا، "بلاشُبہ جناح اعلیٰ اوصاف کے مالک تھے۔وہ سیرت وکردار کی ان بلندیوں پر تھے جہاں کوئی لالچ خوف یا غصہ انہیں اپنے راستے سے ہٹا نہیں سکتا تھا۔ کوئی امارت و ثروت ان کی راہ میں حائل ہوئی نہ حکومت کا جاہ و جلال انھیں مرعوب کر سکا۔محمد علی جناح کو مسلم عوام پرکافی قابو حاصل تھا"۔

مارچ 1948 میں ڈھاکہ یونیورسٹی میں آزادی کے بارے میں قائدنے کہا۔
"آزادی کا مطلب بے لگام ہو جانا نہیں ہے۔ آزادی کا مفہوم یہ نہیں کہ دوسرے لوگوں اور مملکت کے مفادات کو نظراندازکرکے آپ جو چاہیں کرتے رہیں۔ آپ پربہت بڑی ذمہ داری عائد ہوئی ہے اورپہلے سے کہیں ذیادہ۔ اب یہ ضروری ہے کہ آپ ایک منظّم وہ منضبط قوم کی طرح کام کریں۔ اس وقت ہم سب کو چاہیے کہ تعمیری جذبہ پیدا کریں۔ جنگِ آزادی کے دِنوں کی جنگجوئی کی اب ضرورت نہیں رہی۔ آزادی حاصل کرنے کیلئے جنگ جُویانہ جذبات اور جوش و خروش کا مظاہرہ آسان ہے اورملک و ملّت کی تعمیرکہیں زیادہ مشکل"۔

اگرغور کریں تو معلوم ہوگا کہ اِس تقریرکا ایک ایک لفظ موجودہ صورتحال کی عکاسی کرتا ہے۔ فرق صرف اِتنا ہے کہ یہاں ہمیں اپنے ہی حُکمران سے اپنے بقا کی جنگ لڑنا پڑرہی ہے تو کہیں سروائیوکرنے کیلئے خود سے لڑنا پڑ رہا ہے۔ اپنے اندرہی ایک جنگ جاری کر رکھی ہے ہم نے لیکن اُس جنگ میں جوش و خروش نہیں غم و غصہ اورفکروتفکر ہے جب ایسے عناصراِنسان کے اندرجنگ میں مشغول ہوں توملک و ملت کی تعمیرکہاں سے ہو گی؟اگرجناح کو اپنے مقصد میں کامیابی حاصل ہوئی ہے توا س کی وجہ صرف یہ ہے کہ وہ ایک سچے مسلمان تھے جنہوں نےقوم کے مفاد کا فریضہ نہ صرف بڑی تندہی سے انجام دیا بلکہ ہمیشہ انصاف اور دیانت کے مسلک پر قائم رہے۔

"نومبر1940 میں علی گڑھ یونیورسٹی میں خطاب کرتے ہوئے آپ نے فرمایا، "چھوت چھات صرف ہندو مذہب اورفلسفے میں جائز ہے۔ ہمارے ہاں ایسی کوئی بات نہیں ہے۔ اِسلام اِنصاف، مساوات اوررواداری کا حامل ہے، اگرغیرمسلم ہماری حفاظت میں آجائیں تو یہ اُنکے ساتھ بھی فیاضی روارکھتا ہے۔ یہ لوگ ہمارے بھائی ہیں لہذٰا اس ریاست میں وہ شہریوں کی طرح رہیں گے"۔

آج دیکھیں تو ہم لوگ علاقوں، صوبوں، ذات پات میں بٹ گئے ہیں۔ہم یہ نہیں کہتے کہ پورا پاکستان ہی ہمارا ہے بلکہ ہم لاہوریے، کراچی، سندھی، بلوچی و پٹھان بن کر رہ گئے ہیں۔ ہمارے علاقے ہماری پہچان بن گئے ہیں، ہمارے مسلک ہماری شناخت ہیں۔ ۔ اِسلام کی بات کریں تو میں سُنی وہ شیعہ ہے یہ نہیں کہتے کہ ہم مُسلمان ہیں۔


ہمارے قائدکی زندگی کے باب کا ایک ایک صفحہ اُنکی جرات، بہادری اور پاکستان بنانے کیلئے اُنکے جذبوں کا گواہ ہے۔ اُنکی شخصیت غیروں کیلئے بھی متاثرکُن تھی جتنی ہم سب کیلئے ہے۔

مسٹر جناح اپنے ارادے اور رویے کے سخت تھے۔ یہ یقین سے کہا جاسکتا ہے کہ مسٹر جناح کسی قیمت پر بھی برطانیہ کے آلہ کا ر نہیں بنے۔ان کے متعلق بڑے سے بڑے سیاسی لیڈر کو بھی یہ تسلیم کرنا پڑتا ہے کہ وہ کسی قیمت پر بھی خریدے نہیں جا سکتے۔ (ڈاکٹرامبی کر)

جناح کسی بھی طاقت کے آگے جھکنا نہیں جانتے تھے۔ انھوں نے ہر محاذ پر انگریزوں اور ہندؤں کو شکست فاش دی۔ (جگت نارائن)

محمد علی جناح کسی فریق سے سمجھوتا کرتے تو جھک کریا بزدلانہ انداز میں نہیں،بلکہ وہ مردانہ وار سمجھوتا کرتے تھے۔ (لارڈماؤنٹ بیٹن)

جناح کے لیے یہ بات کہنا غلط نہ ہوگی کہ وہ ایک ایسی تاریخ ساز شخصیت تھے، جو کہیں صدیوں میں جا کرہی پیدا ہوتی ہے۔ (مسولنی)

اُن کے بارے میں جتنا بھی لکھا جائے کم ہے۔ قائدِاعظم جیسا لیڈر، رہنمااورمخلص اِنسان صدیوں میں جا کر پیدا ہوتا ہے۔ اُنکا ہم پر احسان ہے کہ ہم آزادہیں، ایک قوم ہیں یہ اور بات ہے یہ پاکستان اب وہ پاکستان نہیں رہا جوقائد کا تھا لیکن ہم اِسے اب بھی وہ پاکستان بنا سکتے ہیں بس ہمت و استدلال کی ضرورت ہے خاص کرایسے عظم کی جو قائد اعظم میں تھا۔

والسلام
زارا

__________________