قربانی کرنے کے بجائے سیلاب زدگان کی مدد ۔۔۔؟

سوال : ایک ادارے کا سربراہ یہ کہتا ہے کہ ہمارے ملک میں لوگ سیلاب کا شکار ہیں ، اس سال عید الضحٰی کے موقع پر قربانی کرنے کے بجائے یہ رقم سیلاب زدگان کو بطور امداد دے دی جائے تاکہ ان کی مشکلات میں کمی ہوسکے ، وہ یہ بھی کہتا کہ علماء کرام نے یہ فتوٰی دیا ہے کہ لوگ حج و عمرے کے بجائے یہ رقم سیلاب زدگان پر خرچ کریں تو انہیں کئی حج اور عمروں کا ثواب ملے گا ، مزید یہ کہ حج صاحب استطاعت پر فرض ہے اور قربانی سنت ، اس سلسلے میں راہنمائی فرمائیں ۔

جواب: اس مسئلے کے حل سے پہلے جاننا ضروری ہے کہ دین میں قربانی کی حیثیت کیا ہے ، کیا اس کا مقام یہی ہے کہ اسے ہر شخص*کی صوابدید پر چھوڑ دیا جائے کہ جو چاہے ، جب چاہے ، اپنی مرضی سے اس کے حکم کو باطل کردے یا نافذ کردے ۔ قربانی ہر صاحب نصاب بالغ ومرد و عورت پر واجب ہے ۔
ارشاد باری تعالٰی ہے : اپنے رب کی نماز پڑھیے اور قربانی کیجیے (سورۃ کوثر 2 )
ام المومنین حضرت عائشہ صدیقہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے ارشاد فرمایا :قربانی کے دن بنی آدم کا کوئی بھی عمل (خیر) اللہ تعالٰی کے نزدیک (قربانی کے جانور کا) خون بہانے سے زیادہ محبوب نہیں ہے ، اور قربانی کے یہ جانور قیامت کے دن اپنے سینگوں ، بالوں اور کھروں کے ساتھ (اللہ تعالٰی کے حضور) آئے گا ، اور (قربانی کے جانور کا ) خون زمین پر گرنے سے پہلے اللہ تعالٰی کی بارگاہ میں قبولیت کا درجہ پالے گا ۔ پس (اے مومنو ) تم خوش دلی سے قربانی کیا کرو۔
حضرت ابوہریرہ رضی اللہ عنہ بیان کرتے ہیں کہ رسول کریم صلی اللہ علیہ وسلم نے ارشاد فرمایا جس شخص کے پاس گنجائش ہو اور وہ قربانی نہ کرے تو وہ ہماری عید گاہ میں نہ آئے ۔
قربانی نہ کرنے پر وعید کا لاحق ہونا ، اسی صورت میں ہوسکتا ہے جب قربانی واجب ہو ۔
حضرت جندب بن سفیان بیان کرتے ہیں کہ میں عید الاضحی کے دن رسول کریم صلی اللہ علیہ وسلم کے ساتھ تھا ، جب آپ صلی اللہ علیہ وسلم لوگوں کو نماز پڑھاکر فارغ ہوئے تو آپ صلی اللہ علیہ وسلم نے ذبح کی ہوئی بکری کو دیکھا اور فرمایا : جس شخص نے نماز سے پہلے قربانی کی ہے وہ اس کی جگہ دوسری کرے اور جس نے ابھی تک نہیں کی وہ اللہ کا نام لیکر کرے ۔
مزکورہ بالا آیات اور احادیث میں قربانی کا امر (حکم) کیا ہے اور امر وجوب کے لیے ہوتا ہے ، جس حدیث میں رسول پاک صلی اللہ علیہ وسلم نے قربانی کو حضرت ابراہیم علیہ السلام کی سنت فرمایا ہے اس سے مراد یہ ہے کہ قربانی دین میں حضرت ابراہیم علیہ السلام کا طریقہ ہے اور یہ وجوب کی نفی نہیں کرتا ۔
امام برہان الدین علی المرغینانی لکھتے ہیں کہ ہر آزاد ، مسلمان ، مقیم ، مالدار پر ایام قربانی (10 تا 12 ذوالحجہ ) میں اپنی طرف سے اور اپنی نابالغ اولاد کی طرف سے قربانی کرنا واجب ہے ۔
مذکورہ شخص*کا یہ کہنا غلط ہے کہ علما نے فتوٰی دیا ہے کہ لوگ حج وعمرہ کے بجائے یہ رقم سیلاب زدگان پر خرچ کریں تو انہیں کئی حج اور عمروں کا ثواب ملے گا ، دراصل اس شخص نے علما کا موقف کو صحیح نہیں سمجھا ۔ علما کا بیان یہ تھا کہ فرض حج تو کسی طور پر بھی ساقط نہیں ہوتا البتہ نفلی حج کو مؤخر کرکے یہ رقم سیلاب زدگان پر خرچ کی جاسکتی ہے ، کیوں کہ اہل پاکستان پر ایک بہت بڑی آزمائش ہے اور عمرہ اپنی اصل کے اعتبار سے ہی ایک نفلی عبادت ہے ۔ لیکن واجب قربانی کو نہ تو ترک کیا جاسکتا ہے اور نہ ساقط کیا جاسکتا ہے ، البتہ مالی حیثیت والے لوگ اگر اپنے روز مرہ کے مصارف یا تعیشات میں کمی کرکے کچھ رقم سیلاب زدگان کی مدد پر صرف کریں تو یہ ان کی دینی اور اخلاقی ذمہ داری بھی ہے اور اعلی انسانی قدر بھی ۔
قربانی بھی ضرورت مند انسانوں کی خدمت کا ایک ذریعہ ہے ، مویشی پالنے والے لوگ بھی اسی آس پر جانور پالتے ہیں کہ ایام قربانی میں انہیں فروخت کرکے اپنی ضروریات پوری کریں گے ، پھر قربانی کے گوشت سے بھی غریبوں اور ناداروں کی مدد کی جاتی ہے اور کھال بھی ناداروں کی مدد کا ایک ذریعہ ہے ، نیز قربانی اسلام کا ایک شعار ہے ۔ حضرت ابراہیم و اسماعیل اور امام الانبیاء حضرت محمد رسول اللہ صلی اللہ علیہ وسلم کی سنت جلیلہ ہے اور اس کی بےشمار شرعی حکمتیں اور برکات ہیں ۔

مفتی منیب الرحمان صاحب
روزنامہ ایکسپریس
15 اکتوبر 2010

__________________
یکے آنکہ در خویش خود بیں مباش
دوم آنکہ در غیر بد بیں مباش