جن چیزوں سے روزہ نہیں ٹوٹتا
اس بات میں کوئی شک نہیں کہ اللہ تعالیٰ نے دین کو آسان بنایا ہے۔ جیسا کہ اللہ تعالیٰ کا فرمان ہے “یرید اللہ بکم الیسر و لا یرید بکم العسر” یعنی “اللہ تمہارے ساتھ آسانی (کا معاملہ) کرنا چاہتا ہے اور تم پر سختی نہیں چاہتا”۔ چنانچہ روزے کی حالت میں کئی کاموں کی اجازت دی گئی جن کے کرنے سے روزہ نہیں ٹوٹتا۔ اہم امور کا تذکرہ ذیل میں دیا جاتا ہے۔
1۔ جنابت کی حالت میں روزہ رکھنا
جنابت کی حالت میں سحری کرنا جائز ہے۔ لیکن فجر کی نماز سے قبل پاکی حاصل کر کے جماعت کے ساتھ شامل ہونا ضروری ہے۔
أَنَّ عَائِشَةَ وَأُمَّ سَلَمَةَ أَخْبَرَتَاهُ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ كَانَ يُدْرِكُهُ الْفَجْرُ وَهُوَ جُنُبٌ مِنْ أَهْلِهِ ثُمَّ يَغْتَسِلُ وَيَصُومُ (صحیح بخاری کتاب الصوم باب الصائم یصبح جنبا)
“ایمان والوں کی مائیں عائشہ اور ام سلمہ رضی اللہ عنہما بتاتی ہیں کہ رسول اللہ صلی اللہ علیہ و علی آلہ وسلم اپنی بیویوں سے (صحبت کی وجہ سے) حالت جنابت میں ہوتے اور فجر کا وقت ہو جاتا۔ پھر غسل کرتے اور روزہ رکھتے”
2۔ مسواک کرنا
ابوہریرۃ رضی اللہ عنہ بیان کرتے ہیں کہ رسول اللہ صلی اللہ علیہ و علی آلہ وسلم نے فرمایا:
لَوْلَا أَنْ أَشُقَّ عَلَى أُمَّتِي لَأَمَرْتُهُمْ بِالسِّوَاكِ عِنْدَ كُلِّ وُضُوءٍ (صحیح البخاری کتاب الصوم باب سواک الرطب و الیابس للصائم)
"اگر میری امت پر دشوار نہ ہوتا تو میں انہیں ہر وضو کے ساتھ مسواک کرنے کا حکم دیتا”
اس ترغیب میں روزہ دار اور غیر روزے دار سب شامل ہیں۔ اور یہ کسی بھی وقت کی جا سکتی ہے
3۔ زبان سے کوئی چیز چکھنا
زبان پر کسی چیز کا ذائقہ محسوس ہونے سے روزہ نہیں ٹوٹتا جب تک وہ حلق میں نہ اترے۔
4۔ سرمہ لگانے سے روزہ نہیں ٹوٹتا۔
5۔ سر پر ٹھنڈا پانی بہانے، کلی کرنے وغیرہ سے روزے پر کوئی فرق نہیں آتا۔
6۔ زوجین کا ایک دوسرے کے ساتھ لیٹنا یا بوس و کنار سے روزہ نہیں ٹوٹتا۔ لیکن جس کو اپنے اوپر قابو نہ ہو اس کے لیے یہ اجازت نہیں ہے۔
7۔ احتلام سے روزہ نہیں ٹوٹتا چاہے دن کے وقت ہو۔
وقت کی کمی کی وجہ سے کچھ مسائل کے دلائل ذکر نہیں کر سکا۔ ان شاء اللہ جلد ہی ترمیم کر کے اضافہ کر دوں گا۔