راجہ اکرام

السلام علیکم و رحمۃ اللہ
عابد بھائی جزاک اللہ

تھوڑی سی مزید اگر تشریح ہو جائے تو میرے لئے مفید ہو گا

واجب کو ہم سنت کہہ سکتے ہیں؟
اگر ہاں تو پھر سنت مؤکدہ اور غیر مؤکدہ کی تقسیم کو کسیے سمجھا جائے
یا غیر مؤکدہ کو مستحب کے زمرے میں سمجھا جائے؟

اس حوالے سے اگر کچھ عنایت فرما د یں تو نوازش ہو گی

طالب دعا

__________________
محتاج اصلاح و دعا

آبی ٹوکول

وعلیکم السلام بھائی !
لفظ سنت کن کن معنٰی میں استعمال ہوتا ہے اسکی تفصیل تو ہم یہاں بیان کرچکے مگر آپ کے حکم کے مطابق تھوڑی سی وضاحت مزید کیئے دیتا ہوں ۔ ۔ آپ کے سوال کی اگر فلسفیانہ تشریح کروں تو ہر وہ فعل جو کہ نبی کریم صلی اللہ علیہ وسلم نے انجام دیا چاہے شرع میں اسکا تعین فرض یا وجوب کا ہی کیوں نہ ہو وہ ایک طرح کی سنت ہی کہلائے گا کہ اس عمل پر نبی کریم صلی اللہ علیہ وسلم کا فعل اسے سنت بنانے پر دلالت کرتا ہے مگر حاکم شرعی کے نزدیک مذکورہ فعل کی طلب اسکے فرض واجب یا مستحب ہونے کی حیثیت کو واضح کرتی ہے ہم یہاں چونکہ فقہی اعتبار سے اصطلاحات شریعہ کو بیان کررہے ہیں لہزا سنت کی فقہی تعریف کو بیان کردیتا ہوں
دین میں سنت اس طریقہ جاریہ کو کہتے ہیں جو کہ فرض یا واجب نہ ہو اور وہ رسول کریم صلی اللہ علیہ وسلم کے قول یا فعل سے ثابت ہو ۔

سنت کا حکم :- شارع کا اپنے مکلفین کو سنت کے کرنے کا ایسا مطالبہ کرنا کہ جس میں فرض یا واجب والی سختی نہ پائی جائے مگر چونکہ سنت کو زندہ رکھنے کا حکم دیا گیا ہے اس لیے اس کا ترک باعث عتاب ضرور ہے لہزا اسکو کرنے پر ثواب اور ترک پر ملامت ہے ۔
پھر اسکی مختلف جہات و اقسام ہیں کہ جنکی تفصیل درج زیل ہے ۔ ۔

فقہی اعتبار سے سنت کی اقسام :-
بنیادی طور پر سنت دو طرح سے تقسیم ہوتی ہے
باعتبار تاکید
باعتبار تکلیف

پھر باعتبار تاکید سنت کی مزید دو اقسام ہیں

سنت مؤکدہ
سنت غیر مؤکدہ

سنت مؤکدہ کی تعریف ، حکم اور مثال :-
جسکو رسول اکرم صلی اللہ علیہ وسلم نے ( فرضیت یا وجوب سے بچنے کے لیے ) ایک دو مرتبہ کے ترک کے سوا ہمیشہ بطور عبادت اپنایا ہو اور اسکی اقامت تکمیل دین کی خاطر ہو اور ترک باعث اساءت و کراہت ہو ۔ حکم اس کا یہ ہے کہ اس کو ترک کرنا باعث ملامت ہے کیونکہ یہ طلب فعل میں بالکل وجوب کی مانند ہے مگر حکما اس سے جدا ہے لہزا کہہ سکتے ہیں کہ واجب کی قائم مقام ہے ۔ لہزا اذان و اقامت اور نماز باجماعت وغیرہ اسکی مثالیں ہیں ۔

سنت غیر مؤکدہ تعریف حکم اور مثال :-اس سے مراد وہ امور ہیں کہ جنکو کبھی نبی کریم صلی اللہ علیہ وسلم نے کیا اور کبھی چھوڑ دیا حکم اس کا یہ ہے کہ اس کا کرنا باعث ثواب اور چھوڑنا کسی بھی عتاب کا باعث نہیں اور مثال اسکی عصر اور عشاء سے قبل کی چار سنتیں ہیں ۔ ۔ ۔

تکلیف کے اعتبار سے سنت کی تقسیم
تکلیف کے اعتبار سے بھی سنت کی دو قسمیں ہیں
سنت عین
سنت کفایہ

سنت عین تعریف اورمثال :-ایسی سنت کی جس کی بجا آوری تمام مکلفین کے لیے بطور سنت مسنون ہو مثلا نماز تراویح کہ ہر ایک کے اپنے عمل سے ہی یہ سنت بجا آور ہوگی کسی دوسرے کے کرنے سے ادا نہ ہوگی ۔

سنت کفایہ :- جسکی بجا آوری کا مطالبہ شارع ہر کسی سے نہ کرے بلکہ چند مکلفین کی ادائگی ہی سب کی طرف سے کفایت کرجائے جیسے رمضان میں محلے کی مسجد میں چند احباب کا اعتکاف بیٹھ جانا سارے محلے کی طرف سے کفایت کرجائے گا ۔ ۔

امید کرتا ہوں آپکی تشنگی دور ہوگئی ہوگی وگرنہ ان معاملات میں کافی تفصیل اور بھی ہے ۔ ۔ ۔والسلام

مہتاب

بہت اچھی کاوش ہے
آپ کا بہت بہت شکریہ