انسانی معاشرہ کی تعمیر و تشکیل میں ہر فرد اپنی صلاحیت کے لحاظ سے بلاشبہ کردار ادا کرتا ہے۔ بعض افراد کسی خاص شعبہ میں ایسی بے مثال خدمات سرانجام دیتے ہیں کہ وہی خدمت ان کی پہچان بن جاتی ہے۔ لقب در حقیقت ان خدمات کا لفظی اعتراف ہوتا ہے۔ لقب اس انسان کے حقیقی نام کے علاوہ اس کی پہچان ہوتا ہے۔ ابن الجوزی کے بقول الالقاب جمع لقب، وہو اسم یدعی بہ الانسان سوی الاسم الذی سمی بہ۔ (زاد المسیر، دار الکتب العلمیۃ بیروت ۲۰۰۲، جلد: ۲، ص:۲۰۸)

لقب کسی آدمی کی قدرو منزلت اور شخصی اوصاف کا آئینہ دار ہوتا ہے۔ فیروز آبادی کا نقل کردہ یہ شعر بات کو مزید واضح کرتا ہے:

وقلَّما أبْصَرَتْ عیناکَ ذالقبٍ

اِلاَّ و معناہ أن فتّشتَ فی لَقَبِہ

تم نے کسی صاحب لقب کو نہیں دیکھا ہو گا مگر ذرا تلاش کرنے پر اس کے اوصاف اس کے لقب میں مل سکتے ہیں۔

قرآن کریم نے وَلَا تَنَابَزُوْا بِالْاَلْقَاب(الحجرات:۱۱) کے ذریعہ کسی کو برے القاب سے یاد کرنے سے منع فرمایا۔ اس سے یہ نتیجہ واضح ہے کہ اچھا لقب ضرور رکھا جا سکتا ہے۔ یہی وجہ ہے کہ نبی کریم صلی اللہ علیہ وسلم کی عادت مبارکہ تھی کہ کبار صحابہ میں سے جس میں جو وصف اور کمال دوسرے سے زائد ہوتا اس کو اسی لقب سے ملقب فرماتے۔ امین الامت ابوعبیدۃ بن الجراح کا تذکرہ کرتے ہوئے علامہ عینی نے اسی بات کو ان الفاظ میں بیان کیا ہے:

والنبی صلی اللّٰہ علیہ وآلہ وسلم خص کل واحد من کبار الصحابۃ بفضیلۃ واحدۃ وصَفَہٗ بہا فاشعر بقدر زائد فیہا علی غیرہ۔ ( مکتبہ رشیدیہ کوئٹہ، جلد۸، ص:۲۳۸، فتح الباری جلد۷، ص:۹۳ پر بھی یہ الفاظ موجود ہیں)

مفسرین نے ان القاب کی درج ذیل مثالیں بھی بیان کی ہیں:

امام قرطبی لکھتے ہیں:

الا تری ان النبی صلی اللّٰہ علیہ وآلہ وسلم لقب عمر بالفاروق، وأبابکر بالصدیق وعثمان بذی النورین وخزیمۃ بذی الشہادتین وأباہریرۃ بذی الشمالین وبذی الیدین فی اشباہ ذلک۔

ایک روایت نقل کرنے کے بعد امام موصوف لکھتے ہیں:

وحمزۃ باسد اللّٰہ و خالداً بسیف اللہ۔

(الجامع لاحکام القرآن جلد۸، ص:۳۳۰؍ زمخشری، الکشاف عن حقائق غوامض التنزیل دار الکتب العربی، بیروت، جلد۴، ص:۳۷۰)

علامہ آلوسی کے مطابق حضرت علی رضی اللہ عنہ کا لقب کرم اللہ وجہہٗ بھی ہے۔

(روح المعانی، دار الکتب العلمیۃ بیروت، ۱۹۹۴، جلد۱۳، ص:۳۰۶)

امام قرطبی نے اس حقیقت کو بھی بیان فرمایا کہ آپ جس صحابی کے لیے کسی وصف کو بیان فرما دیتے وہ اس کے لیے عظیم ترین اعزاز ہو جاتا۔

وقد وصف رسول اللہ صلی اللہ علیہ وآلہ وسلم عددا من اصحابہ بأوصاف صارت لہم من أجل الالقاب۔( الجامع لاحکام القرآن، دار احیاء التراث العربی بیروت، جلد۸، ص:۳۳۰)

یہ القاب مفرد اور مرکب دونوں قسم کے ہیں جیسے صدیق، سید اور امین ہذہ الامہ وغیرہ؛ گروہ سے بھی تعلق رکھتے ہیں اور فرد سے بھی جیسے مہاجرین و انصار اور حواری رسول وغیرہ، صحابہ کرام کے علاوہ آپ صلی اللہ علیہ وآلہ وسلم نے بعض صحابیات کو بھی ان کے مقام و مرتبہ، خدمت خلق اور ذاتی شرف کے پیش نظر القاب عطا فرمائے۔ آپ صلی اللہ علیہ وآلہ وسلم کے بعد علمائے امت نے بھی بعض صحابہ کرام کو ان کے اوصاف حسنہ اور خدمات جلیلہ کے عوض اچھے القاب سے یاد کیا ہے، جیسے ساقی الحرمین اور ذوالنورین وغیرہ۔ ذیل میں صحابہ و صحابیات کے چند القاب مع پس منظر ووجۂ تسمیہ و لقب کے درج کیے جاتے ہیں:

(الف) ایسے القابات جو کسی گروہ؍جماعت صحابہ کے ہیں:

صحابی:

نبی کریم صلی اللہ علیہ وآلہ وسلم سے براہِ راست فیض یاب ہونے والی جماعت کا معروف ترین لقب ’’صحابی‘‘ ہے۔ رضوان الٰہی کا مژدہ جانفزا اِسی گروہ کو سنایا گیا۔ تورات اور انجیل میں اسی برگزیدہ گروہ کے اوصاف و کمال کا ذکر کیا گیا۔(سورۃ الفتح:۲۹)

صحابی کا لقب خود نبی کریم صلی اللہ علیہ وسلم کا عطا کردہ ہے۔ حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وآلہ وسلم قبرستان تشریف لے گئے اور فرمایا: السلام علیکم اے مومنو! ہم بھی ان شاء اللہ تمھارے پاس آنے والے ہیں۔ میری خواہش ہے کہ ہم اپنے دینی بھائیوں کو دیکھیں صحابہ نے عرض کی او لسنا اخوانک یا رسول اللہ کہ کیا ہم آپ کے دینی بھائی نہیں ہیں۔ آپ صلی اللہ علیہ وآلہ وسلم نے فرمایا: انتم اصحابی واخواننا الذین لم یاتوا بعد تم میرے صحابہ ہو اور ہمارے دینی بھائی وہ لوگ ہیں جو ابھی پید نہیں ہوئے۔

نبی کریم صلی اللہ علیہ وآلہ وسلم نے صحابہ کو امت کے لیے امان قرار دیا۔( صحیح مسلم، کتاب فضائل الصحابہ، باببیان ان بقاء النبی صلی اللہ علیہ وآلہ وسلم امان لاصحابہ و بقاء۔۔۔)

آپ نے ان لوگوں کے بارہ میں خیر امتی فرمایا۔(نفس مصدر)

ان ہی فضائل و کمالات کی بنا پر صحابہ کا خرچ کیا ہو ایک کلو گرام دوسروں کے احد پہاڑ کے سونے سے بھی بہتر ہے۔ اسی علوِّشان کی وجہ سے سبّ وشتم صحابہ کو جرم قرار دیا۔(نفس مصدر)

فضائل و مناقب صحابہ کے اس تذکرہ کے بعد صحابی کی تعریف سمجھنا بھی ضروری ہے۔ ابن حجر کے نزدیک اس کی صحیح ترین تعریف یہ ہے کہ جس نے نبی کریم صلی اللہ علیہ وآلہ وسلم کی حالت ایمان میں زیارت کی اور اسی حالت پر اسے موت آئی۔

ان الصحابی من لقی النبی صلی اللہ علیہ وآلہ وسلم مومنا بہ و مات علی الاسلام۔(الاصابۃ فی تمیز الصحابۃ، دار صادر بیروت ۱۳۲۸ھ جلد اول ص:۷)

صحابی کی معرفت کے ذرائع درج ذیل ہیں ان تفصیلات کے لیے ملاحظہ فرمائیے: تدریب الراوی ، المکتبۃ العلمیۃ، مدینہ منورہ، ۱۳۹۲، جلد۲، ص:۲۱۳۔ ۲۱۴)

(۱)

تواتر

: حضرت ابوبکر، حضرت عمر رضی اللہ عنہما اور عشرہ مبشرہ کے بارے میں تواترسے معلوم ہے کہ وہ صحابی ہیں۔

(۲)

استفاضہ:

وہ صحابہ جن کی شہرت تواتر سے کم درجہ کی ہو جیسے ضمام بن ثعلبہ اور عکاشہ بن محصن رضی اللہ عنہما۔

(۳)

صحابی کا قول

:کوئی صحابی یہ گواہی دے کہ فلاں شخص صحابی ہے۔ حضرت حممۃ بن ابو حممۃ الدوسی اصفہان رضی اللہ عنہما میں پیٹ کی بیماری سے فوت ہوئے۔ آپ کے بارے میں حضرت ابو موسیٰ اشعری نے شہادت دی کہ نبی کریم صلی اللہ علیہ وآلہ وسلم نے فرمایا تھا کہ یہ شہید ہوں گے۔

(۴)

تابعی کی خبر

:کوئی تابعی بتائے کہ فلاں شخص صحابی ہے۔

(۵) کوئی شخص بشرط ثبوت و دلائل صحابی ہونے کا دعویٰ کرے مگر نبی کریم صلی اللہ علیہ وآلہ وسلم کے وصال کے سو سال بعد کسی کا دعوائے صحابیت قبول نہ ہو گا۔

علماء نے صحابہ کے بارہ طبقات کی تقسیم اس طرح کی ہے:

(۱) وہ اصحاب جنھوں نے مکہ میں اسلام قبول کرنے میں پہل کی جیسے خلفائے اربعہ۔

(۲) وہ اصحاب جنھوں نے دار الندوہ میں کفار کے اجلاس سے پہلے اسلام قبول کیا۔

(۳) حبشہ کی طرف ہجرت کرنے والے۔

(۴) اصحاب بیعت عقبہ اولی۔

(۵) اصحاب بیت عقبہ ثانیہ۔

(۶) اولین مہاجرین جو قباء میں نبی کریم صلی اللہ علیہ وآلہ وسلم سے مدینہ منورہ میں داخلہ سے پہلے ملے۔

(۷) اہل بدر

(۸) غزوہ بدر اور صلح حدیبیہ کے درمیان ہجرت کرنے والے۔

(۹) بیعت رضوان کے شرکاء

(۱۰) صلح حدیبیہ کے بعد اور فتح مکہ سے پہلے ہجرت کرنے والے۔

(۱۱) فتح مکہ میں اسلام قبول کرنے والے۔

(۱۲) وہ بچے جنھوں نے حجۃ الوداع کے موقع پر آپ صلی اللہ علیہ وآلہ وسلم کی زیارت کی۔(مقدمہ الاستیعاب جلد اول ،ص:۹۳)

مہاجرین:

یہ صحابہ کرام کے اس گروہ کا لقب ہے جنھوں نے نبی کریم صلی اللہ علیہ وآلہ وسلم کے لیے اپنا وطن اور قبیلہ چھوڑ مدینہ کی جانب ہجرت کی، اور مدینہ میں جنھوں نے ان کی مدد کی انھیں انصار کا لقب دیا گیا۔ جس کی تفصیل آئندہ سطروں میں آرہی ہے۔ اللہ تعالیٰ نے مہاجرین و انصار میں سے سابقین اولین اور ان کے پیروکاروں کے لیے اپنی رضا، جنت اور فوز عظیم کی خوشخبری سنائی۔

وَالسَّابِقُوْنَ الْاَوَّ لُونَ مِنَ الْمُہَاجِرِیْنَ وَالْاَنْصَارِ وَالَّذِیْنَ اتَّبَعُوْہُمْ بِاِحْسَانٍ رَّضِیَ اللّٰہُ عَنْہُمْ وَ رَضُوْا عَنْہُ وَاَعَدَّ لَہُمْ جَنّٰتٍ تَجْرِیْ تَحْتَہَا الْاَنْہٰرُ خَالِدِیْنَ فِیْہَا اَبداً ذٰلِکَ الْفَوْزُ الْعَظِیْمُ۔(توبہ:۱۰۰)

مہاجرین اور انصار میں سے سبقت کرنے والے اور جنھوں نے اچھائی کے ساتھ ان کی پیروی کی اللہ ان سے راضی ہوئے اور اللہ نے ان کے لیے جنتیں تیار کیں جن کے نیچے دریا جاری ہیں وہ ہمیشہ ہمیشہ ان میں رہیں گے یہ عظیم کامیابی ہے۔

علامہ غلام رسول سعید ی نے لکھا ہے کہ مہاجرین اولین کا مرتبہ انصار مدینہ سے کئی وجہ سے افضل ہے۔

(۱) مہاجرین سابقین انصار اور باقی مسلمانوں سے اس لیے افضل ہیں کہ وہ سب سے پہلے ایمان لائے اور ان کا ایمان لانا ہی تمام فضیلتوں کا مبدأ اور منبع ہے۔

(۲) مہاجرین اولین مسلسل تیرہ سال کفار قریش کی زیادتیوں اور ظلم و ستم کا شکار ہوتے رہے اور تمام سختیوں پر صبر کرتے رہے۔

(۳) انھوں نے اسلام اور رسول اللہ کی خاطر اپنا وطن، عزیز و اقارب، گھر بار، تجارت اور باغات غرض سب کچھ چھوڑا اور اسلام ہی کی خاطر تمام طرح کے مصائب برداشت کیے۔

(۴) رسول اللہ کے پیغام اور شریعت کو قبول کرنے کا دروازہ مہاجرین اولین نے کھولا۔انصار نے ان کی اقتدا کی اور ان کی مشابہت اختیار کی اور مقتدیٰ مقتدی سے افضل ہوتا ہے۔

(تبیان القرآن، فرید بک اسٹال لاہور، ۲۰۰۰ء جلد۴، ص:۷۰۸۔ ۷۰۹)

اس سلسلہ میں علامہ طیبی کی عبارت درج ذیل ہیں:

ولکن لا یبلغون رتبۃ المہاجرین السابقین الذین اخرجوا من دیارہم، و قطعوا عن احبابہم و اقاربہم وحرموا اوطانہم و اموالہم وہم رضوان اللہ علیہم ما بالوا بذلک بآلۃ لاجل رضی اللہ ورضی رسولہ، واعلاءً لدین اللہ وسنۃ رسولہ۔(الکاشف عن حقائن السنن، جلد۱۱، ص:۳۳۲ )

انصار:

صحابہ میں وہ خوش بخت انفاس جنھوں نے مدینہ منورہ میں خاتم المرسلین اور مہاجرین کی مہمان نوازی کا شرف حاصل کیا انھیں انصار کا لقب عطا ہوا۔

قرآن کریم نے درج ذیل الفاظ میں ان کی نصرت و اعانت کا تذکرہ کیا اور ساتھ ہی یہ بھی واضح کر دیا کہ ایسے مدد گاروں کو اللہ تعالیٰ کی طرف سے خصوصی رزق ملتا ہے:

وَالَّذِیْنَ اٰوَوْاوَ نَصَرُوْا اُوْلٰءِکَ ہُمُ الْمُؤْ مِنُوْنَ حَقًا لَہُمْ مَّغْفِرَۃٌ وَّ رِزْقٌ کَرِیْمٌ۔(الانفال:۷۲)

ترجمہ: اور جن لوگوں نے (مہاجرین کو) جگہ دی اور ان کی نصرت کی یہی لوگ حقیقت میں مومن ہیں ان کے لیے بخشش اور عزت والی روزی ہے۔

حضرت انس رضی اللہ عنہ فرماتے ہیں کہ انصار نام خود اللہ تعالیٰ نے رکھا ہے۔(صحیح بخاری، کتاب المناقب۔)

انصار کے فضائل و مناقب آقا کریم صلی اللہ علیہ وآلہ وسلم نے خود بیان فرمائیے۔ انصار سے اظہار محبت ان الفاظ میں فرمایا:

انتم من أحب الناس الیّ۔( صحیح مسلم، کتاب فضائل الصحابۃ باب فضائل الانصار)

ترجمہ: مجھے لوگوں میں سب سے زیادہ تم محبوب ہو۔

لطف و کرم اور محبت کا یہ انداز بھی ملاحظہ ہو،’’ اگر انصار کسی میدان یا گھاٹی میں چلیں تو میں بھی ان کے ساتھ میدان اور گھاٹی میں چلوں۔‘‘و لولا الہجرۃ لکنت امراأ من الانصار(صحیح بخاری، کتاب المناقب ، باب مناقب الانصار) ترجمہ: ’’اور اگر ہجرت نہ ہوتی تو میں بھی انصار کا فرد ہوتا۔‘‘

علامہ طیبی کے بقول یہ انصار کی عزت افزائی ہے اور آپ صلی اللہ علیہ وآلہ وسلم نے لوگوں کو ان کے اکرام و احترام کی رغبت دلائی ہے۔ ( الکاشف عن حقائق السنن ، کراچی ،۱۴۱۳ھ،جلد ۱۱،ص:۳۳۲) ان کے لیے دعائے مغفرت کی تو سحاب جود و کرم ہی برسا دیا:

اللہم اغفر للأنصار ولأبناء الأنصار وأبنآء أبنآء الأنصار۔(نفس مصدر)

ترجمہ: اے اللہ! انصار، ان کے بیٹوں اور ان کے پوتوں کی مغفرت فرما۔

ایک روایت میں ولموالی الانصار یعنی انصار کے غلاموں کی بھی مغفرت فرما۔(نفس مصدر)

آپ نے انصار کو اپنا معتمد خاص قرار دیا اور ان کے جذبہ ایثار و قربانی کی قدر کرتے ہوئے امت کو یہ نصیحت کی:

’’ مسلمان بڑھتے رہیں گے اور انصار کم ہوتے رہیں گے۔ تم ان کی نیکیوں کو قبول کرنا اور ان کی لغزشوں سے درگزر کرنا۔‘‘(نفس مصدر)

آپ صلی اللہ علیہ وآلہ وسلم کا ارشاد ہے کہ’’انصار کے تمام گھرانوں میں خیر ہے۔ ‘‘وفی کل دور الانصار خیر۔(نفس مصدر)

مگر اس کے باوجود ان کی فضیلت کی ترتیب یہ ارشاد فرمائی۔ خیر دور الانصار بنو النجار۔سب سے بہتر گھر بنو نجار کا ہے پھر بنو عبد الاشھل ، پھر بنو الحارث بن خزرج اور بنو ساعدہ۔

چونکہ’’ انصار کی محبت ایمان اور ان سے بغض نفاق کی علامت ہے۔‘‘(صحیح مسلم ، کتاب الایمان ، باب ان حب الانصار وعلی رضی اللہ عنہم من الایمان)اس لیے صحابہ انصار کا حد درجہ احترام کرتے اس کا اندازہ اس سے لگایا جا سکتا ہے کہ خادم رسول حضرت انس بن مالک اور حضرت جریر بن عبد اللہ البجلی رضی اللہ عنہما اکٹھے سفر کر رہے تھے اور جریر، حضرت انس کی خدمت کر رہے تھے۔ حضرت انس رضی اللہ عنہ نے انھیں یہ کہہ کر خدمت گزاری سے منع کیا کہ میں جب سے انصار کو رسول اللہ صلی اللہ علیہ وسلم کی خدمت کرتے ہوئے دیکھا ہے تو میں نے قسم کھائی کہ جب بھی کسی انصاری کے ساتھ جاؤں گا اس کی خدمت کروں گا۔(صحیح مسلم، کتاب فضائل الصحابہ)

عشرہ مبشرہ:

یہ وہ دس خوش نصیب صحابہ ہیں جن کو آنحضرت صلی اللہ علیہ وآلہ وسلم نے ایک ہی مجلس میں جنت کی نوید سنائی۔ سعید بن زید سے روایت ہے:

کان رسول اللّٰہ صلی اللّٰہ علیہ وآلہ وسلم عاشر عشرۃ فقال:ابوبکر فی الجنۃ، وعمر فی الجنۃ، وعثمان فی الجنۃ، وعلی فی الجنۃ، وطلحۃ فی الجنۃ، والزبیر فی الجنۃ وعبد الرحمن فی الجنۃ فقیل لہ من التاسع قال انا۔(سنن ابن ماجہ، دار احیاء الکتب العربیۃ ، ۱۹۵۲جلد اول، ص:۴۸،رقم الحدیث ۱۳۳۰)

حضرت شیخ عبد الحق لکھتے ہیں:

’’ابوبکر و عمر و عثمان وعلی و طلحہ وزبیر و سعد ابن وقاص و عبد الرحمن ابن عوف و ابی عبیدۃ بن الجراح و سعید بن زید ایں دہ تن از صحابہ مشہور ند بہ عشرۂ مبشرہ از جہت بشارت دادن آنحضرت صلی اللہ علیہ وآلہ وسلم ایشاں رابجنت۔‘‘

(اشعۃ اللمعات، مکتبہ نوریہ رضویہ سکھر، جلد۴، ص:۶۷۱ )

اہل البیت:

اہلِ بیت تین طرح کے ہیں

(۱) اہل بیت ولادت: یعنی بنات طاہرات اور ان کی آل

(۲) اہل بیت سکنیٰ :ازواج مطہرات

(۳) اہل بیت نبنو ہاشم

اصحاب بدر:

حق و باطل کے پہلے معرکہ (۲ ہجری) میں جن ۳۱۳(تعداد کے بارہ میں مختلف روایات کے لیے ملاحظہ فرمائیے: فتح الباری، دار نشر الکتب الاسلامیہ لاہور ۱۹۸۱ء جلد۷ ص:۲۹۱۔ ۲۹۲) اصحاب رسول نے حق کی نمائندگی کرتے ہوئے اس دن کو یوم الفرقان بنایا، ان کی جاں نثاری کا رسول اکرم صلی اللہ علیہ وآلہ وسلم نے یہ صلہ دیا:

اعملوا ما شئتم وجبت لکم الجنۃ او فقد غُفِرَت لکم۔(صحیح بخاری، کتاب المغازی، باب فضل من شہد بدراً)

ترجمہ: اے اہل بدر! اب تم جو بھی کرو تمہارے لیے اللہ تعالیٰ نے جنت واجب کر دی ہے یا تمھیں معاف کر دیا ہے۔

حافظ ابن حجر’’اعملو‘‘کی وضاحت کرتے ہوئے لکھتے ہیں:للتشریف والتکریم والمراد عدم اخذۃ بما یصدر عنہم بعد ذلک۔ (فتح الباری جلد۷، ص:۴۴۰ دیکھیے)

اس غایت درجہ تعظیم و تکریم کی بنا پر خود آپ صلی اللہ علیہ وآلہ وسلم اور ان ۳۱۳ نفوس قدسیہ کو اصحاب بدر کے لقب سے یاد کیا جاتا ہے۔ اس کے علاوہ نبی کریم صلی اللہ علیہ وآلہ وسلم نے اصحاب بدر کو افضل المسلمینبھی قرار دیا ہے۔(نفس مصدر، ص:۳۱۲)

جاری ہے

__________________

میرا بلاگ۔ صدائےقلندرhttp://saifikhan011.blogspot.com/