اللہ تعالیٰ کا ارشاد گرامی ہے:

’’ اے وہ لوگو جو ایمان لائے ہو! میرے اور خود اپنے دشمنوں کو اپنا دوست نہ سمجھو تم تو محبت کی بنیاد ڈالنے کے لئے ان کی طرف پیغام بھیجتے ہو اور وہ اس حق کے ساتھ جو تمہارے پاس آ چکا ہے کفر کرتے ہیں، رسول صلی اللہ علیہ وسلم کو اور خود تمہیں بھی محض اس وجہ سے جلا وطن کرتے ہیں کہ تم اپنے پروردگار اللہ پر ایمان رکھتے ہو ، اگر تم میری راہ میں جہاد اور میری رضا مندی کی طلب میں نکلتے ہو (تو ان سے دوستیاں نہ کرو) تم ان کے پاس محبت کا پیغام پوشیدہ پوشیدہ بھیجتے ہو مجھے خوب معلوم ہے جو تم نے چھپایا، اور وہ بھی جو تم نے ظاہر کیا ، تم میں سے جو بھی اس کام کو کرے گا وہ یقینا راہ راست سے بہک جائے گا۔ اگر انہیں تم پر کوئی دسترس کا موقع مل جائے تو وہ تمہارے کھلے دشمن ہو جائیں اور برائی کے ساتھ تم پر دست درازی اور زبان درازی کرنے لگیں اور دل سے چاہنے لگیں کہ تم بھی کفر کرنے لگ جاؤ۔ تمہاری قرابتیں ، رشتہ داریاں اور اولادیں تمہیں قیامت کے دن کام نہ آئیں گی، اللہ تعالیٰ تمہارے درمیان فیصلہ کر دے گا اور جو کچھ تم کر رہے ہو اسے اللہ تعالیٰ خوب دیکھ رہا ہے ۔‘‘
(الممتحنہ 60/ 2،1)

تفسیر ابن کثیر میں یہ واقعہ تفصیلاً موجود ہے کہ صحابی رسول حاطب بن ابی بلتعہ رضی اللہ تعالی کے بارے میں اس سورت کی شروع والی آیتیں نازل ہوئی ہیں ۔ واقعہ یہ ہوا کہ حاطب رضی اللہ تعالی مہاجرین میں سے تھے ۔ بدر کی لڑائی میں بھی آپ رضی اللہ تعالی نے مسلمانوں کے لشکر میں شرکت کی تھی ان کے بال بچے اور مال و دولت مکہ میں ہی تھا اور یہ خود قریش میں سے نہ تھے۔ صرف حضرت عثمان رضی اللہ تعالی کے حلیف تھے ، اس وجہ سے مکہ میں انہیں امن حاصل تھا ۔ اب یہ رسول اللہ صلی اللہ علیہ وسلم کے ساتھ مدینہ شریف میں تھے۔ یہاں تک کہ جب اہل مکہ نے عہد توڑ دیا اور رسول اللہ صلی اللہ علیہ وسلم نے ان پر چڑھائی کرنی چاہی تو آپ صلی اللہ علیہ وسلم کی خواہش یہ تھی کہ انہیں اچانک دبوچ لیںتا کہ خونریزی نہ ہونے پائے اور مکہ پر باآسانی قبضہ ہو جائے۔ اسی لئے آپ صلی اللہ علیہ وسلم نے اللہ تعالیٰ سے دعا بھی کی کہ باری تعالیٰ ہماری تیاری کی خبریں ہمارے مکہ پہنچنے تک اہل مکہ کو نہ پہنچیں ۔ ادھر آپ صلی اللہ علیہ وسلم نے مسلمانوں کو تیاری کا حکم دیا۔ حضرت حاطب رضی اللہ تعالی نے اس موقعہ پر ایک خط اہل مکہ کے نام لکھا اور ایک قریشیہ عورت کے ہاتھ اسے چلتا کیا جس میں رسول اللہ صلی اللہ علیہ وسلم کے اس ارادے اور مسلمانوں کی لشکر کشی کی خبر درج تھی۔ آپ رضی اللہ تعالی کا ارادہ اس سے صرف یہ تھا کہ میرا کوئی احسان قریش مکہ پر رہ جائے جس کے باعث وہاں میرے بال بچے اور مال و دولت محفوظ رہیں ۔ چونکہ حضور صلی اللہ علیہ وسلم کی دعا قبول ہو چکی تھی لہٰذا یہ ناممکن تھا کہ قریش کو کسی ذریعہ سے بھی اس ارادے کا علم ہو جائے اس لئے اللہ تعالیٰ نے اپنے رسول صلی اللہ علیہ وسلم کو اس پوشیدہ راز سے مطلع فرما دیا اور آپ صلی اللہ علیہ وسلم نے اس عورت کے پیچھے اپنے سوار بھیجے، راستے میں اسے روکا گیا اور خط اس سے حاصل کر لیا گیا۔ یہ مفصل واقعہ صحیح احادیث میں بھی پوری طرح بیان کیا گیا ہے۔

مسند احمد میں ہے حضرت علی رضی اللہ تعالی نے فرمایا مجھے اور زبیر رضی اللہ تعالی کو اور حضرت مقداد رضی اللہ تعالی کو رسول اللہ صلی اللہ علیہ وسلم نے بلوا کر فرمایا تم یہاں سے فوراً کوچ کرو روضہ خاخ میں جب تم پہنچو گے تو تمہیں ایک سانڈنی سوار عورت ملے گی جس کے پاس ایک خط ہے تم اسے قبضہ میں کرو اور یہاں لے آئو۔ ہم تینوں گھوڑوں پر سوار ہو کر بہت تیز رفتاری سے روانہ ہو گئے روضہ خاخ نامی جگہ میں جب پہنچے تو فی الواقع ہمیں ایک سانڈنی سوار عورت دکھائی دی ۔ ہم نے اس سے کہا کہ جو خط تیرے پاس ہے وہ ہمارے حوالے کر ، اس نے صاف انکار کر دیا کہ میرے پاس کوئی خط نہیں ۔ ہم نے کہا غلط کہتی ہے تیرے پاس خط یقینا ہے اگر تو راضی خوشی نہ دے گی تو ہم جامہ تلاشی کر کے جبراً وہ خط تجھ سے چھینیں گے۔ اب تو وہ عورت سٹ پٹائی اور آخرکار اس نے اپنی چٹیا کھول کر اس میں سے وہ پرچہ نکال کر ہمارے حوالے کیا۔ ہم اسی وقت وہاں سے واپس روانہ ہوئے اور حضور صلی اللہ علیہ وسلم کی خدمت اقدس میں اسے پیش کر دیا ۔ پڑھنے پر معلوم ہوا کہ حضرت حاطب رضی اللہ تعالی نے اسے لکھا ہے اور یہاں کی خبر رسانی کی ہے، حضور صلی اللہ علیہ وسلم کے ارادوں سے کفار مکہ کو آگاہ کرنے کی کوشش کی ہے۔ آپ صلی اللہ علیہ وسلم نے کہا حاطب یہ کیا حرکت ہے؟ حضرت حاطب رضی اللہ تعالی نے فرمایا یارسول اللہ صلی اللہ علیہ وسلم جلدی نہ کیجئے میری بھی سن لیجئے میں قریشیوں میں ملا ہوا تھا خود قریشیوں میں سے نہ تھا، پھر آپ صلی اللہ علیہ وسلم پر ایمان لا کر آپ صلی اللہ علیہ وسلم کے ساتھ ہجرت کی۔ اور جتنے بھی مہاجرین ہیں ان سب کے قرابت دار مکہ میں موجود ہیں جن کے بال بچے وغیرہ مکے میں رہ گئے ہیں وہ ان کی حمایت کرتے ہیں لیکن میرا کوئی رشتہ دار وہاں نہیں جو میرے بچوں کی حفاظت کرے ، اس لئے میں نے چاہا کہ قریشیوں کے ساتھ کوئی سلوک و احسان کر دوں جس سے وہ میرے بچوں کی حفاظت کریں اور جس طرح اوروں کے نسب کی وجہ سے ان کا تعلق ہے میرے احسان کی وجہ سے میرا تعلق ہو جائے گا۔یا رسول اللہ صلی اللہ علیہ وسلم میں نے کوئی کفر نہیں کیا نہ اپنے دین سے مرتد ہوا ہوں نہ اسلام کے بعد کفر سے راضی ہوا ہوں بس اس خط کی وجہ صرف اپنے بچوں کی حفاظت کا حیلہ تھا۔

آنحضرت صلی اللہ علیہ وسلم نے فرمایا لوگو تم سے جو واقعہ حاطب رضی اللہ تعالی بیان کرتے ہیں وہ بالکل حرف بحرف سچا ہے کہ نفع کی خاطر ایک غلطی کر بیٹھے ہیں نہ کہ مسلمانوں کو نقصان پہنچانا یا کفار کی مدد کرنا ان کے پیش نظر ہو ۔سیدنا فاروق اعظم رضی اللہ تعالی اس موقعہ پر موجود تھے اور یہ واقعات آپ رضی اللہ تعالی کے سامنے ہوئے۔ آپ کو بہت غصہ آیا اور فرمانے لگے یا رسول اللہ صلی اللہ علیہ وسلم مجھے اجازت دیجئے کہ اس منافق کی گردن اڑا دوں آپ صلی اللہ علیہ وسلم نے فرمایا: کیا تمہیں معلوم نہیں کہ یہ بدری صحابی ہیں اور بدر والوں پر اللہ تعالیٰ نے جھانکا اور فرمایا جو چاہو عمل کرو میں نے تمہیں بخش دیا۔ یہ روایت اور بھی بہت سی حدیث کی کتابوں میں موجود ہے۔
(تفسیر ابن کثیر)

میری انتظامیہ سے گزارش ھے کہ وقت کی کمی کے باعث جب تک یہ مکمل نہیں ہوتا تب تک کوئی بھی مراسلہ آگے لگے اسے حذف کر دیا جائے شکریہ۔

(جاری ھے)

__________________