وہ اپنی مسکین سی صورت لیئے میری میز کے پاس آکر کھڑا ہوگیا۔
(میں وضو کرکے نماز جمعہ کے لیئے جانے کی تیاری کررہا تھا)
"اؤے آ مر کی ہویا"
(میں نے اپنی ٹوٹی پھوٹی پنجابی میں اُسے چھیڑتے ہوئے کہا)
اُس کا نام دراصل "عامر" تھا میں اُسے پیار سے " آ مر" کہا کرتا تھا۔ وہ اختر کالونی کا ایک رہائشی تھا۔ مذھباً عیسائی تھا اور میری آفس میں "چھوٹے" کی نوکری کرتا تھا۔ میں اُس کے ساتھ شفقت سے پیش آتا تھا اس لیئے وہ مجھ سے قدرے "فری" تھا۔اُس کی عمر تقریباً 18 سال کے لگ بھگ ہوگی۔

سر جی آ پ سے کچھ پوچھنا ہے!
(وہ ممیاتے ہوئے بولا)
جلدی جلدی بول کیا بات ہے؟
(میں نے موزے پہنتے ہوئے پوچھا)
یہ "مسلم لوگ" جوتے آگے رکھ کر نماز کیوں پڑھتے ہیں؟
ہائیں!
(میرے منہ سے نکلا)
اچھا اور کیا پوچھنا ہے؟میں نے مُسکراتے ہوئے پوچھا۔
یہ "نبیّا" کون ہیں؟
"نبیّا" کون؟ میں نے حیرت سے پوچھا؟
وہ جی وہ قوالی نہیں ہے "نبیّا، نبیّا، نبیّا"
(اُس کا اشارہ مشہور قوالی "یانبی، یا نبی، یانبی صلی اللہ علیہ وسلم" کی طرف تھا)
اچھا!، میں پھر مُسکرایا، اور کچھ!
آپ لوگ جمعے کی نماز کے بعد "پھل فروٹ" کیوں خریدتے ہیں؟

میں نے جلدی جلدی اُسے اُس کی عقل کے مطابق جوابات دیئے اور جمعے کی نماز کے لیئے مسجد کی طرف چل دیا۔
مسجد پہنچ کر میں نے دیکھا کے درجنوں چپلیں، جوتے عین مسجد میں صفوں کے درمیان میں رکھے ہوئے ہیں۔ میں نے بھی ایک خالی جگہ دیکھ کرصف میں اپنی جگہ بنا لی اور اپنے نئے "اتوار بازار" سے خریدے ہوئے جوتوں کو اپنے سامنے رکھ لیا کیونکے مجھے اُن کے گم ہوجانے کا خطرہ تھا۔
جمعے کی سُنتوں سے فارغ ہوکر بچوں کے لیئے کچھ فروٹ خریدا اور ایک آئسکریم خرید کر چوستا ہو آفس کی طرف چل دیا۔