مسجد نبوی صلی اللہ علیہ وسلم کے احاطے میں داخل ہوں تو ٹھنڈے فرش ، بلندیوں کو چھوتی ہوئی عمارت اور چکاچوند کردینے والی روشنیاں ، انسان کو ایک لمحے کو بہت متاثر کرتی ہیں ۔ اس مسجد میں جانے والا ہر شخص اس عمارت کی خوبصورتی ، نقش و نگاری کی دل آویزی اور ٹیکنالوجی کے استعمال کی تعریف کیے بغیر نہیں رہتا ہے ۔ مسجد نبوی کے اندرونی حصہ میں سونے کے پانی سے مذین فانوس آویزاں ہیں ۔ مسجد نبوی میں حضور اکرم صلی اللہ علیہ وسلم کا روضہ مبارک ہے جو اس مسجد کی اصل اساس ہے ۔ روضہ مبارک کی جالی بھی سونے سے بنی ہوئی ہے ۔ روضہ اطہر کے اطراف سونے چاندی کے نقش ونگار سے مزین کیا ہوا ہے ۔ مسجد کی چھت اور دیواروں بھی نقش ونگار سے مذین ہیں ۔ ریاض جنت میں جابجا بے شمار فانوس لگے ہیں ۔ مسجد نبوی خوبصورتی کے اعتبار سے ایک بے مثال عمارت ہے ۔
لیکن
حضور اکرم صلی اللہ علیہ وسلم کی زندگی سادگی اور وقار کی اعلیٰ مثال ہے ۔ اگر حضور اکرم صلی اللہ علیہ وسلم کی خواہش ہوتی تو اللہ تعالیٰ آپ صلی اللہ علیہ وسلم کو سونے چاندی کے پہاڑ سے نوازدیتا ۔ لیکن آپ صلی اللہ علیہ وسلم نے اپنے لیے سادگی کی زندگی کو پسند فرمایا ۔ حضور اکرم صلی اللہ علیہ وسلم کے گھر میں کہیں سے ہدیہ آتا جو آپ صلی اللہ علیہ وسلم کی ضرورت سے ذیادہ ہوتا تو جب تک اس کو باقی مومنین میں تقسیم نا کردیتے سکون نہ پاتے ۔ حضور اکرم صلی اللہ علیہ وسلم کے گھر کی دیورایں کچی مٹی کی بنی تھیں ۔
ایک مرتبہ حضرت عائشہ رضی اللہ عنہ نے چاندی کا چھلا اپنی انگلی میں پہن رکھا تھا ۔ تو اس کو آپ صلی اللہ علیہ وسلم نے ناپسند فرمایا اور اس کو اتارنے کو کہا ۔ حضور اکرم صلی اللہ علیہ وسلم کا جب انتقال ہوا تو ان کے گھر میں اسلحہ کے سامان کے سوا کچھ بھی نہ تھا ۔
ہم نے روضہ مبارک صلی اللہ علیہ وسلم کے ساتھ ان چیزوں کی بھرمار کردی یعنی سونے چاندی کی جن کو حضوراکرم صلی اللہ علیہ وسلم نے ناپسند فرمایا ۔ حضور اکرم صلی اللہ علیہ وسلم کی شان سونے چاندی کی محتاج نہیں ، ہم سمجھتے ہیں کہ اس سونے چاندی سے حضوراکرم صلی اللہ علیہ وسلم کو خوش کرلیں گے تو یہ ہماری حماقت سوا کچھ نہیں ۔
بلکہ ان سونے چاندی کے فانوس سے ہم حضور اکرم صلی اللہ علیہ وسلم کی روح کو تکلیف پہنچارہے ہیں ۔
اور اگر حضور اکرم صلی اللہ علیہ وسلم ہم سے خوش نہیں تو اللہ بھی ہم سے راضی نہ ہوگا ۔ حضور اکرم صلی اللہ علیہ وسلم اپنی امت کے لیے ایک مشفق باپ کی طرح تھے ۔ اگر اولاد فاقے کررہی ہو تو کوئی باپ یہ پسند نہین کرے گا کہ اس کے گھر میں سونے کے فانوس لگے ہوں ۔ بلکہ ایسے فانوس اس باپ کو تکلیف میں مبتلا رکھیں گے ۔ آج حضور اکرم صلی اللہ علیہ وسلم کی امت ہر طرح کی تکالیف میں مبتلا ہے ۔ تو یہ سونے کے فانوس حضوراکرم صلی اللہ علیہ وسلم کو خوشی دینگے یا تکلیف ۔
حدیث نبوی صلی اللہ علیہ وسلم ہے جس کا مفہوم ہے
قیامت سے قریب لوگ اونچی اونچی عمارتیں بنائیں گے اور خوبصورت مسجدیں بنانے میں مقابلہ کریں گے ۔
آج اس مقابلہ کی شروعات مسجد نبوی صلی اللہ علیہ وسلم سے کی گئی ہے ۔
آپ خود سوچیں ۔
حضرت عمر رضی اللہ عنہ کے دور میں مسلمانوں کے پاس بےپناہ دولت اور عروج تھا لیکن حضرت عمر رضی اللہ عنہ نے مسجد نبوی کو سونے چاندی سے نہیں بھرا کیوں ؟
کاش ہم مسجد نبوی صلی اللہ علیہ وسلم کو سونے چاندی سے بھرنے کے بجائے اعلیٰ کردار کے مومنین اور اللہ اور اس کے رسول صلی اللہ علیہ وسلم پر اپنی جان قربان کرنے والے مسلمانوں سے بھر سکتے ۔

__________________
اے اللہ
میرے ہر فیصلے میں تیری رضا ہو شامل
جو تیرا حکم ہو وہ میرا ارادہ کردے