سوال: استخارہ کا معنی ومفہوم کیا ہے اور حدیث کی روشنی میں اس کا صحیح طریقہ کیا ہے،کیا ہرمعاملے میں استخارہ کرنا ضروری ہے، کسی کام سے پہلے استخارہ نہ کرنے والایااستخارہ کرنے کے بعد اگر کوئی شخص کسی وجہ سے اس پر عمل نہ کر سکے ،تو گنہگار تونہیں ہوگا؟،(منوراحمد نعیمی ،ملیر کالونی ،کراچی)۔

جواب:
استخارہ کے لفظی معنٰی ہیں: خیر طلب کرنا اور اس کے جامع معنٰی ہیں: وہ معاملہ جس کے نفع بخش یا نقصان دہ ہونے کا انسان اپنی عقل کی روشنی میں فیصلہ نہ کرسکے اور تردُّدمیں مبتلا ہوجائے کہ اسے کروں یا نہ کروں، تو اللہ تعالیٰ سے رہنمائی طلب کرے، اس کا تعلق ماضی کے معاملات سے نہیں ہے، مستقبل میں درپیش ایسے معاملات سے ہے،جن کو کرناہے۔ ایسے تمام معاملات جن کا خیر ہونا ،شریعت میں ثابت ہے، ان کے لئے استخارہ نہیں کیاجائے گا، جیسے نماز، روزہ، حج اور جہاد وغیرہ،فارسی کا مقولہ ہے " درکارِ خیر حاجتِ استخارہ نیست " ۔ہاں البتہ کسی کارِخیر کے لئے شریعت میں وقت مقرر نہیں ہے بلکہ توسُّع ہے،تو تعیینِ وقت کے لئے استخارہ کرسکتے ہیں۔ بنیادی طور پر استخارہ مباح امور میں ہوتا ہے، جیسے نکاح اپنی اصل کے اعتبار سے مشروع ہے اور سنت ہے اور بعض اشخاص کے لئے ان کے بشری احوال کے مطابق واجب کے درجے میں ہے، لیکن نکاح کے لئے کس کا انتخاب کیا جائے،اس کے لئے اگر کوئی پیغام یا پیشکش آئے،تو اس کے لئے استخارہ کیا جاسکتا ہے،
حدیث پاک میں ہے:
عن جابر رضی اﷲعنہ قال کان النبی صلی اللہ علیہ وسلم یعلمنا الاستخارۃ فی الامورکلھا کالسورۃ من القرآن اذاھم احدکم بالامر فلیرکع رکعتین من غیر الفریضۃ ثم یقول اللھم انی استخیرک بعلمک وأستقدرک بقدرتک وأسئلک من فضلک العظیم فانک تقدر ولااقدر، وتعلم ولااعلم، وانت علام الغیوب، اللھم ان کنت تعلم ان ھذالامر خیر لی فی دینی ومعاشی وعاقبۃ امری۔او قال فی عاجل امری واٰجلہ۔ فاقدرہ لی وان کنت تعلم أن ھذاالامرشرلی فی دینی ومعاشی وعاقبۃ امری اوقال فی عاجل أمری واٰجلہ فاصرفہ عنی واصرفنی عنہ واقدرلی الخیر حیث کان ثم ارضنی بہ ویسمی حاجتہ۔

ترجمہ:حضرت جابر رضی اللہ عنہ بیان کرتے ہیں کہ نبی صلی اللہ علیہ وسلم ہمیں تمام امورمیں ’’استخارہ‘‘ کی تعلیم فرماتے تھے، اس اہتمام کے ساتھ ،جیسے قرآن کی کسی سورت کی تعلیم فرمایا کرتے تھے،(تو استخارہ یہ ہے کہ)جب تم میں سے کوئی کسی کام کا ارادہ کرے،تو اسے چاہئے کہ دورکعت نفل پڑھے،پھر کہے:اے اللہ! میں تیرے علم کی روشنی میں خیر کی طرف رہنمائی چاہتا ہوں،اورتیری قدرت سے (حصولِ خیرکے لئے) قدرت کا طلبگارہوں اور میں تیرے فضلِ عظیم سے سوال کرتا ہوں،کیونکہ توقدرت والا اورمیں عاجزوبے بس ہوں،اور تو(ہرمعاملے کے انجام کو) جانتا ہے ،اور میں کچھ بھی نہیں جانتا اور تو تمام غیبی امور کا بہت زیادہ جاننے والا ہے، اے اللہ! اگرتوجانتا ہے کہ یہ معاملہ (جومجھے درپیش ہے)،میرے دین،میرے معاش اورانجامِ کار کے اعتبارسے، اور فوری اوردیرپا فائدے کے اعتبار سے میرے لئے بہتر ہے،تو تو اسے میرے لئے مقدر فرما ۔
اور (اے اللہ!) اگرتوجانتا ہے کہ یہ معاملہ (جو مجھے درپیش ہے)،میرے دین ،میرے معاش اورانجامِ کار کے اعتبار سے،فوری اور دیرپا فائدے کے اعتبار سے میرے لئے برا ہے،تو اسے مجھ سے دور کردے اور مجھے اس سے دور کردے، اور(اس کے بدلے میں ) خیر جہاں بھی ہے،وہ میرے لئے مقدر فرما،پھر اس پر میری طبیعت کو راضی کردے(یعنی مجھے اس کے بارے میں قلبی اطمینان اورقراروسکون نصیب ہوجائے کہ بس یہی میرے لئے خیر ہے)،اور ’’ہذالامر‘‘ (یعنی یہ معاملہ) کے بجائے (چاہے تو) اپنی حاجت کا نام لے کردعاکرے(جیسے شادی،کاروبار،کسی کے ساتھ شراکت وغیرہ، الغرض جو بھی مسئلہ درپیش ہو،اس کا نام لے)،(صحیح البخاری، جلد4 ص: 2004، رقم الحدیث:6382مطبوعہ المکتبۃ العصریہ،بیروت)

۔اس حدیث کوامام مسلم کے سوا محدثین کی ایک جماعت نے روایت کیاہے۔
مثلاً امام ترمذی، امام ابوداؤد، امام نسائی اور امام بیہقی وغیرھم۔
’’علامہ علاؤ الدین حصکفی لکھتے ہیں: ومنھا رکعتاالاستخارۃ۔
اوران مستحب نمازوں میں دورکعت نماز استخارہ ہے،اس کی شرح میں علامہ ابن عابدین شامی لکھتے ہیں:

وفی الحلیۃویستحب افتتاح ھذالدعاء وختمہ بالحمدلۃ والصلٰوۃ وفی الاذکار انہ یقرء فی الرکعۃ الاولیٰ الکافرون وفی الثانیۃ الاخلاص وعن م بعض السلف انہ یزید فی الاولی’’وربک یخلق ما یشاء ویختارُ ط ماکان لہم الخیرۃ ط سبحٰن اﷲ وتعٰلیٰ عما یشرکونo وربک یعلم ماتکن صدورھم وما یعلنون‘‘وفی الثانیۃ وماکان لمؤمن ولامؤمنۃ۔الایہ۔ وینبغی ان یکررھا سبعاکما روی ابن السنی یاانس اذاھمت بأمر فاستخر ربک فیہ سبع مرّات ثم انظر الی الذی سبق الیٰ قلبک فان الخیر فیہ ولو تعذرت علیہ الصلوٰۃ الستخارۃ باالدعاء ا ھ ملخصاوفی شرح الشرعۃ المسموع من المشائخ انہ ینبغی ان ینام علی طہارۃ مستقبل القبلۃبعد قرا ء ۃ الدعاء المذکورفان رایٰ فی منامہ بیاضا او خضرۃ فذالک الامر خیر وان رایٰ فیہ سوادا أو خمرۃ فھو شر ینبغی ان یجتنب ۔

اور’’حلیہ‘‘ میں ہے اور اس دعاء استخارہ کی ابتدا اور آخر میں حمد وصلوٰۃ پڑھنا مستحب ہے، اور ’’الاذکار‘‘ میں ہے: پہلی رکعت میں سورۂ ’’الکافرون‘‘ پڑھے اور دوسری میں سورۂ ’’اخلاص‘‘ اوربعض بزرگوں سے روایت ہے کہ پہلی رکعت میں ’’وربک یخلق ما یشاء ویختارُ ط ماکان لہم الخیرۃ ط سبحٰن اللہ وتعٰلیٰ عما یشرکونo وربک یعلم ماتکن صدورھم وما یعلنونo(القصص:68-69 )
تک ان کلمات کا اضافہ کرے اور دوسری رکعت میں سورۂ احزاب، آیت:36 کا اضافہ کرے۔( اور اگر درپیش مسئلہ کے کرنے یا نہ کرنے کے بارے میں قلبی اطمینان حاصل نہ ہوتو) سات دن تک مسلسل یہ نماز پڑھے ،جیسا کہ ابن السّنی نے روایت کیا ہے: (ترجمہ’’اے انس: ! جب توکسی کام کا ارادہ کرے،تو اپنے رب سے اس میں سات باررہنمائی کی دعا کرتا رہے،پھر غوروفکر کر کہ تیرے دل میں جو بات قرارپا گئی ہے(یعنی اس کام کاکرنا یا نہ کرنا)، بس خیر اسی میں ہے‘‘،اور اگر اس کے لئے نماز پڑھنا دشوار ہو تو صرف دعا کر کے استخارہ کر لے ،(یہ ’’اذکار‘‘ کی عبارت کا )خلاصہ ہے،اور’’ شرح الشرحۃ‘‘ میں ہے کہ(ہم نے اپنے )مشائخ سے سنا ہے کہ مذکورہ دعا پڑھنے کے بعد باوضو ہوکر قبلہ روسوجائے، اگر اپنی خواب میں سفید یا ہرا رنگ دیکھے تو سمجھ لے کہ اس میں خیر ہے،(اور اس کام کو کرلے) اور اگر کالایا سرخ رنگ دیکھے توسمجھ لے کہ اس میں شر ہے،پھر اس کام سے اجتناب کرے،(ردالمحتارعلی الدرالمختارجلدنمبر2صفحات 409-410مطبوعہ داراحیاء التراث العربی،بیروت)‘‘۔

آپ نے ملاحظہ فرمایا کہ حدیث پاک میں خواب میں کسی چیز کے نظر آنے یا نہ آنے کا ذکر نہیں ہے اور نہ ہی خواب کا آنا ضروری ہے۔ یہ بزرگوں اوراہل خیر کے اپنے اپنے تجربات ہیں، لیکن اگرخواب نظرآجائے،تو اس سے رہنمائی حاصل کی جاسکتی ہے۔ مگر اصل چیز یہ ہے کہ اللہ تعالیٰ سے استخارہ کرنے کے بعد جب دل کو کسی ایک جانب سکون و قرار نصیب ہوجائے تو اللہ تعالیٰ کی ذات پر بھر پور اعتماد کرتے ہوئے اس کام کو کرلے، اللہ تعالیٰ اس میں برکت عطا فرمائے گا۔
اور اگرخدانخواستہ اس پر عمل کرنے کے نتیجے میں کسی ناکامی کا سامان ہو،تو یہ جانے کہ اللہ تعالیٰ کی منشاکو سمجھنے میں مجھ سے خطاہوگئی ہے،اور یا یہ سمجھے کہ اگر اس کے برعکس کیا ہوتا توممکن ہے کہ (خدانخواستہ) اس سے بڑی ناکامی یا نقصان کا سامنا کرناپڑتا، اللہ تعالیٰ کا ارشاد ہے:

عسیٰ ان تکرہوا شیئا وھو خیرلکم وعسیٰ ان تحبوا شیئا وھو شرلکم۔

ترجمہ:’’ہوسکتا ہے کہ ایک چیز کو تم اپنے حق میں ناپسندیدہ سمجھو،(مگر)وہ (درحقیقت)تمہارے حق میں بہتر ہو اور (یہ بھی) ہوسکتا ہے کہ ایک چیز کو تم اپنے لئے پسندیدہ سمجھو(مگردرحقیقت) وہ تمہارے لئے بری ہو،(البقرۃ:216)‘‘۔

حضرت عبداللہ بن عمر رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: بے شک دعا کسی نازل شدہ مصیبت کے لئے بھی مفید ہے(کہ اگروہ صبر و تحمل کا پیکربن کر اللہ تعالیٰ سے رجوع کرتا رہے،تو اللہ تعالیٰ اس مشکل سے اسے نجات دے دے گا یا صبر وتحمل پر اسے اجرعظیم سے نوازے گا)، اور ان مصیبتوں کے لئے بھی دعا مفید ہے،جو ابھی نازل نہیں ہوئی ہیں
(یہ دعا ان کے لئے ردِّبلا کا سبب بن جائے گی) سو اے اللہ کے بندو! دعا کو اپنا لازمی شعار بناؤ(مشکوٰۃ بحوالہ ترمذی ،ص: 195 )۔صرف نبی کا خواب یا الہام ، ’’حُجَّتِ قطعیّہ‘‘ہوتا ہے۔ اور غیر نبی کا خواب یا الہام ایک ظنّی امر ہے،لہٰذااگر کسی نے کسی مسئلے میں استخارہ کرلیا اورکسی وجہ سے اس پر عمل نہ کیا،تو اس سے گنہگار نہیں ہوگا، نہ ہی اس پر کوئی وبال آئے گا۔

’’استخارہ ‘‘ کی روح یہ ہے کہ جس بندے کوکوئی مسئلہ درپیش ہے، وہ خود استخارہ کرے،کیونکہ جتنا درد، شکستگیٔ دل، حضوریٔ قلب، تضرُّع وعاجزی کسی شخص کو اپنے معاملے میں ہوسکتی ہے، دوسرے شخص کو نہیں ہوسکتی۔حدیث میں ہے:رب ذوالجلال فرماتا ہے: ترجمہ:میں ان کے پاس ہوتاہوں،جومیری (خشیت ومحبت اور انکسارکی)وجہ سے شکستہ دل رہتے ہیں،(الاسرارالرفوعہ،رقم الحدیث:249،کشف الخفاء ج1ص:232،الشفاء قاضی عیاض مالکی ج1ص:7‘‘۔
جو شخص اپنے درپیش مسئلے میں پانچ سات بار عاجزی سے اپنے رب کے حضورالتجا اورطلبِ خیر و دعا کے لئے ذہنی،فکری اور عملی طورپر آمادہ نہ ہو،وہ استخارے کی روح اورحقیقت کو سمجھا ہی نہیں۔ باقی وہ لوگ جو استخارے کے نام پر ماضی کے احوال بتاتے ہیں کہ کسی پر کالا جادو ہوگیا ہے،سفلی عمل کردیا گیا ہے،چند سیکنڈ میں یہ تمام غیبی امور ان پر منکشف ہوجاتے ہیں اور ایک ہی لمحے میں ان کا حل بھی نکل آتا ہے،اس کامجھے علم نہیں ہے، اس سے لوگ توہُّم پرستی اور تشکیک میں مبتلا ہوتے ہیں، تقدیرِ الہٰی پر رضا جومومن کا شعار ہونا چاہئے، اُس میں کمزوری واقع ہوتی ہے ۔پھر لوگ کسی مشکل صورتِ حال میں ،جب انہیں کوئی فیصلہ کن راہ سجھائی نہ دے،اللہ تعالیٰ کی ذات سے براہِ راست رجوع کرنے اور اس کے حبیبِ کریم علیہ الصلوٰۃ والسلام سے توسُّل کے بجائے، اِس روش کو ترک کرکے، اِس طرح کے عاملوں سے رجوع کرتے ہیں۔استخارہ تومستقبل میں کسی کام کے کرنے یا نہ کرنے کے بارے میںاللہ تعالیٰ سے رہنمائی طلب کر نے کا نام ہے ۔

حدیث پاک سے معلوم ہوتا ہے کہ درپیش معاملات اورمباح امو رمیں سے کسی ایک کے انتخاب کے لئے یاکسی کام کوکرنے یا نہ کرنے کے بارے میں استخارہ کرنا افضل اورمستحب ہے ،لیکن یہ واجب نہیں ہے کہ نہ کرنے پر گنہگارہوگا۔ اورویسے کسی مسئلے کے بارے میں دستیاب معلومات اورقرائن و شواہدکی روشنی میں یا اہل فن واہل نظر اوراہل اللہ سے مشورہ کرنے کے بعد ذہن میں یہ امر واضح ہوجائے کہ یہ کام کرلینا چاہئے،تو اللہ پر توکل کرکے کرلے،اور اللہ تعالیٰ سے اس میں کامیابی اور سرخ رو ہونے کی دعا کرتا رہے۔ واللہ اعلم ورسولہ

(تفھیم المسائل جلد چہارم از مفتی منیب الرحمٰن مد ظلہ العالی )

__________________
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔
پیکرِ دلرُبا بن کے‌ آیا ،روحِ ارض و سما بن کے آیا
سب رسولِ خُدا بن کے آئے ،وہ حبیبِ خُدا بن کے آٰیا