skjatala

(عثمان فاروق۔ یو۔ کے)
رمضان المبارک کا مہینہ آتے ہی مسلمان پھر سے تازہ دم ہو کر رب کے حضور سجدہ ریز ہو جاتے ہیں۔مساجد کی رونقیں بڑھ جاتی ہیں۔ قرآن کی تلاوت اور ذکرواذکار کا اہتمام پورے ذوق سے کیا جاتا ہے۔ بازاروں میںایک خاص گہما گہمی ہوتی ہے۔ یہ صرف پاکستان یا مسلمان ممالک کی بات نہیں ہے بلکہ برطانیہ میں بھی ایسا دلکش منظر ہوتا ہے کہ رمضان مسلمانوں میں نئی زندگی اور حرارت پیدا کرتا ہے۔ وہ علاقائی اور لسانی فرق سے بالا تر ہے بلکہ برطانیہ میں مسمانوں کے سپر اسٹور تک پر اسپیشل رمضان آفر ہوتی ہے اور اس کے علاوہ بھی جتنے بڑے اسٹور ہیں ان پر بھی قیمتوں میں نمایاں کمی کی جاتی ہے۔ جن میں پھل، سبزیاں، گھی، دودھ، بیسن، آٹا سب کے نرخ رمضان میں کم کر دیئے جاتے ہیں اور یہ دو ہفتے پہلے ہی رمضان سے شروع ہوجاتا ہے۔ مسلمانوں کے اسٹورزپر تو اتنا رش بڑھ جاتا ہے کہ فروخت میں عام دنوں کے مقابلے میں دگنا اضافہ ہوتا ہے۔ لمبی لمبی قطاریں لگی ہوتی ہیں بعض اوقات تو ایک ہی صاحب 3 ٹرالیاں لیے سامان سے لبا لب بھرے گھر کی ضروریات کا انتظام کر رہے ہوتے ہیں۔لیکن صدافسوس اپنے ملک کے باسی جہاں ملک عزیز کے سربراہ مملکت سے عام شہری تک مسلمان ہونے کا دم بھرتے ہیں وہاں رمضان کا مہینہ صرف عبادت کے لیے مخصوص نہیں ہوتا بلکہ کساد بازاری، ذخیرہ اندوزی، دھوکہ، دجل اور مہنگے داموں اشیاءکا فروخت ہونا معمول سے زیادہ ہوتا ہے۔

جس طرح پاکستان میں اخلاق انحطاط اور خراب رویے دیکھنے کو ملتے ہیں اس کی شرح رمضان میں اسی طرح جاری رہتی ہے بلکہ اس میں کوئی کمی نہیں ہوتی۔ ایک مرتبہ میرے دوست کی بائیک تھانے کی نذر ہو گئی۔ اتفاق سے وہ رمضان المبارک کا با برکت نیکیوں بھرا مہینہ تھا ۔ بائیک نکالنے کی کوئی صورت نہیں بن رہی تھی بالآخر کچھ دے دلا کر ہی معاملات حل ہوتے محسوس ہو رہے تھے لیکن ہم ڈر رہے تھے۔
وہ سنت رسول سے مزین چہرہ اور ٹوپی اور تسبیح پر مستقل اپنے ایمان کی بڑھوتری کا سامان کررہے تھے خوف یہ تھا کہ ان صاحب سے تو بات بننے کی نہیں ہے۔ پھرہوا بھی یہی جب تک انہوں نے پوری ظہر کی نماز ختم نہیں کرلی مجال ہے کہ رشوت کو ہاتھ لگایا ہو وہ یقینا پچھلے گناہوں کی معافی مانگ چکے ہوںگے اور پھر عصر تک یہ گناہ بھی ختم ہو جاتاہو گا۔ رمضان المبارک ہمیں برداشت کا درس دیتا ہے اور ہماری حالت لوگوں کو دیکھ کر برداشت سے باہر ہونے لگتی ہے کسی بس میں سوار ہونے کے بعد سب سے پہلے کنڈیکٹر سے کرائے پر تبادلہ خیال ہوتا ہے اور اس میں آواز کی پچ بلند رکھنا ضروری ہوتی ہے کہ آس پاس شور ہو رہا ہوتا ہے بس تھوڑی رینگنے لگے تو ڈرائیور کو ان القابات سے نوازہ جاتا ہے اگر وہ بھی ہماری طرح حساس ہو تو رات اسے جاگ کر گذارنا پڑے۔

کچھ بے روزہ دار لازمی سگریٹ اور پان کے رسیا ہوتے ہیں۔ پان کی جگالی کے دوران گلا اتنا موٹا کر لیتے ہیں کہ چہرے پر سب سے نمایاں ان کے گال ہوتے ہیں کبھی ایسا بھی ہوتا ہے کہ وہ کھڑکی سے اپنے منہ کی باقیات کو جب نیچے پھینک رہے ہوں تو ساتھ میں موٹر سائیکل سوار کے سفید کپڑوں کو خوب رنگ برنگی کر دیتے ہیں۔ اکثر میں نے دو لوگوں کو آپس میں گالیاں دیتے سنا اور ساتھ میں یہ بھی کہ اگر میرا روزہ نہیں ہوتا تو پھر بتاتا۔ اس طرح سارا وقت لڑتے جھگڑتے روزہ گذر جاتا ہے۔ ان سارے واقعات کے باوجود بھی بہت سے لوگ ایمان و احتساب سے روزہ رکھتے ہیں لیکن ان کی تعداد محدود ہے لہذا ضرورت اس امر کی ہے کہ اخلاقی گراوٹ کا حل نکالنا ہوگا۔ ورنہ تباہی کے اس دہانے سے بھی آگے نکل جائے گا کہ تاریخ کے صفحات ہماری بد نماباتوں کا تذکرہ سن کر آ نے والے کے لیے عبرت کا سامان پیدا کریں گی۔
بشکریہ : کراچی اپڈیٹس ڈاٹ کام

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر