skjatala

موبائل فون کی پاکستان آمد بہت تہلکہ خیز تھی۔ لوگ حیرت سے اس آلے کو دیکھتے تھے جس کے ساتھ نہ کوئی تار تھی اور نہ کوئی سوئچ وغیرہ لگانا پڑتا تھا، اس کا سائز اور اس کا بکس اتنا بڑا تھا کہ رئیس قسم کے ”صاحب موبائل فون“ اپنے ساتھ ایک ملازم رکھتے تھے جو یہ آلہ ان کے ساتھ ساتھ اٹھائے پھرتا تھا۔ میں نے پہلے دفعہ یہ آلہ ایک زمیندار کے پاس دیکھا تھا۔ اس کے ساتھ دو ملازم تھے، ایک نے موبائل فون اور دوسرے نے حقہ اٹھایا ہوا تھا۔ آہستہ آہستہ اس کا سائز کم ہوتا چلا گیا۔ اس کے ساتھ اس کی قیمت میں بھی کمی آئی، اس کے باوجود یہ قیمت اتنی کم نہیں تھی کہ ہر ”ایرا غیرا“ خرید سکتا چنانچہ اس دور کی میری ایک ڈرامہ سریل ”شب دیگ“ میں ایک شخص باغ جناح میں جاگنگ کرتے ہوئے موبائل فون پر کسی سے بات کر رہا ہے۔

جس پر میرا ایک کردار ”انکل کیوں“ سیخ پا ہو کر اس سے مخاطب ہوتا ہے اور کہتا ہے ”تم لوگ اپنی امارت کا اظہار اب سیر گاہوں میں بھی کرنے لگے ہو، تمہارا بس چلے تو تم اپنی دس دس کینال کی کوٹھیوں کو بھی پہیے لگا کر باغ جناح میں لے آو اور انہیں جاگنگ کے وقت بھی اپنے ساتھ رکھو“ مگر اب یہی موبائل فون جو کبھی امارت کی نشانی تھی اور جسے کسی کے ہاتھ میں دیکھ کر ہمارے ہاتھوں کے طوطے اڑ جاتے تھے۔ اب اپنی ”ناقدری“ کا رونا روتا نظر آتا ہے، میں جب اس کا ماضی یاد کرتا ہوں اور اس کے حال پر نظر ڈالتا ہوں تو دھیان مسلمانوں کے عروج و زوال کی طرف چلا جاتا ہے۔ ان دنوں جس طرح مغربی حکمران جس مسلمان حکمران کو خریدنا چاہیں، اس کی ”قیمت“ ادا کرنے کے بعد کسی اور حکمران کو خریدنے آگے نکل جاتے ہیں، اسی طرح جس کی جیب میں چند سکے ہیں وہ موبائل فون خرید سکتا ہے صرف یہی نہیں بلکہ کچھ عرصہ استعمال کرنے کے بعد کوڑے کے ڈبے میں پھینک دیتا ہے جس طرح امریکہ ہمارے حکمرانوں کو استعمال کرنے کے بعد انہیں کوڑے کے ڈبے میں پھینکنے میں تامل نہیں کرتا اس وقت پاکستان کی سب سے بڑی انڈسٹری موبائل فون ہی ہے۔ اعدادوشمار کے مطابق 18 کروڑ کی آبادی میں سے دس کروڑ افراد کے پاس یہ فون موجود ہے۔ یہ وہ سائنسی ایجاد ہے جو خرید کر، چھین کر یا چوری کر کے اپنے استعمال میں لائی جا سکتی ہے بقول شخصے ایک شخص نے اپنے دوست سے شکایت کی کہ تم میرا فون نہیں اٹھاتے، چنانچہ وہ دوسرے روز اس کا فون ”اٹھا“ لایا۔

موبائل فون کی جو رہی سہی عزت تھی وہ بھی اس کے ”فقرے“ قسم کے خریداروں نے ختم کر دی ہے۔ وہ فون تو حاصل کر لیتے ہیں لیکن اسے استعمال کرنے کے لئے اس میں ”بیلنس“ کا ہونا ضروری ہے چنانچہ مجھے اکثر اس مضمون کی ایک ایس ایم ایس وصول ہوتی ہے“ برادران اسلام، میں ایک ہسپتال میں بستر مرگ پر پڑا ہوں میرا اس دنیا میں کوئی نہیں ہے۔ آپ کو خدا اور اس کے رسول کا واسطہ ہے۔ مجھے دس روپے کا بیلنس بھیج دیں“ چنانچہ میں ہر بار اس کے نمبر پر فون کرتا ہوں تاکہ اس کی دوسری ضروریات کے بارے میں بھی دریافت کر سکوں
لیکن ”بستر مرگ“ سے دس روپے کا ”بیلنس“ مانگنے والا وہ شخص فون ہی نہیں اٹھاتا، دراصل اس طرح کے لوگ قناعت پسند ہوتے ہیں۔ انہوں نے آپ سے صرف دس روپے مانگے ہیں۔ وہ آپ بھیج سکتے ہیں تو بھیج دیں۔ انہیں فون کر کے کیوں پریشان کرتے ہیں۔ اگر ایک دن میں اللہ کے ایک سو نیک بندے بھی انہیں دس دس روپے بھیج دیں تو ایک ہزار روزانہ کے حساب سے تیس ہزار روپے ماہوار بنتے ہیں۔

یہ تو اللہ کا شکر ہے کہ میں نے کبھی ایسے اجنبی فون نمبر پر کال نہیں کی جس کے نتیجے میں آپ کا سارا بیلنس ادھر منتقل ہو جاتا ہے۔ کیونکہ واردات کا ایک طریقہ یہ بھی ہے: شنید ہے کہ بیلنس کی بھیک اب خواتین بھی مانگنے لگی ہیں۔ حالانکہ وہ جانتی ہیں کہ آوارہ قسم کے لونڈے بعد میں اس بیلنس کو ”بیلنس“ کرنے کی کوشش بھی کرتے ہیں۔ ایک اعلیٰ درجے کی ایجاد کو اس گھٹیا سطح پر لانے میں موبائل فون کمپنیوں کی اس اشتہاری مہم کا بھی بہت حصہ ہے جو آپ کو زیادہ سے زیادہ فون استعمال کرنے پر اکساتی رہتی ہیں۔ یہ اشتہاری مہم اتنی ”اشتہا انگیز“ ہوتی ہے کہ خواہ مخواہ فون کی طلب محسوس ہونا شروع ہو جاتی ہے۔ ان میں بچت کے نام پر فضول خرچی کا پیغام مضمر ہوتا ہے، چنانچہ ان کی چکنی چپڑی باتوں میں آ کر جب آپ ان کے بتائے ہوئے ”بچت“ کے منصوبے پر عمل شروع کرتے ہیں تو مہینے کے آخر میں اجنبی لوگوں کو پھر اسی قسم کے ایس ایم ایس بھیجنا پڑتے ہیں کہ ”برادران اسلام۔ آپ کو خدا اور اس کے رسول کا واسطہ ہے کہ …“

میں نے ایک دفعہ لکھا تھا کہ مغرب سے جو ایجاد ہمارے ہاں آتی ہے وہ اپنے ساتھ ایسا کلچر بھی لاتی ہے اور میں نے اس کی کچھ مثالیں بھی پیش کی تھیں لیکن یہ واحد ایجاد ہے جو اپنے ساتھ اپنا کلچر نہیں لائی۔ مغربی ادب آداب کے تحت کسی کو فون کرتے وقت پوچھا جاتا ہے کہ آپ اس وقت مصروف تو نہیں ہیں، کیا آپ سہولت سے بات کر سکتے ہیں؟ دوسرا اگر گرین سگنل دے تو گفتگو کا آغاز کیا جاتا ہے لیکن ہمارے ہاں ایسا نہیں ہے۔ آپ شیو کر رہے ہیں، داڑھی کو ”وسمہ“ لگا رہے ہیں۔ بہت بری طرح ٹریفک میں پھنسے ہوئے ہیں۔ آپ کھانا کھا رہے ہیں اور لقمہ آپ کے حلق میں پھنسا ہوا ہے۔ آپ کو کھانسی کا دورہ پڑا ہوا ہے۔ آپ کسی تقریب میں بیٹھے ہیں یا اسی طرح کی کسی اور ”بھسوڑی“ میں پھنسے ہوئے ہیں کہ فون کی گھنٹی بجتی ہے۔ آپ جیسے تیسے اس شریف آدمی کو بتاتے ہیں کہ میں اس وقت اس مشکل میں گرفتار ہوں۔ لہٰذا آپ سے بعد میں بات ہو گی، مگر وہ آپ کو ”سوری سوری“ بھی کہتا جائے گا اور اپنی بے ہودہ گفتگو کا سلسلہ بھی جاری رکھے گا۔

دراصل یہ ایجاد نہیں، ایک نشہ ہے جو آپ کے لہجے کی ترشی بھی نہیں اتار پاتی۔ ہمارے ہاں ان دنوں ایک ایس ایم ایس زوروں پر ہے کہ فون پر یا عام میل ملاقات کے دوران ایک دوسرے کو ”ہیلو“ نہ کہیں کیونکہ یہ ”ہیلو“ دراصل HELL یعنی دوزخ سے نکلا ہے۔ اس نکتہ آفرین پر لاحول کے علاوہ اور کیا پڑھا جا سکتا ہے جبکہ ضرورت اس امر کی ہے کہ شراب، چرس، افہیم اور دوسری نشہ آور چیزوں کے علاوہ موبائل فون کے ”نشے“ کے خلاف مہم چلائی جائے کہ یہ نشہ بھی اب قوم کو اس کی قدروں سے دور اور بداخلاقی کے نزدیک لانے کا باعث بن رہا ہے۔

__________________
اس دور میں تعلیم ہے امراضِ ملت کی دوا
ہے خونِ فاسد کے لیے تعلیم مثل نیشتر

راجہ اکرام

واقعی نشہ ہے۔ اور ظالم نشہ ہے

چھوٹتی نہیں‌ یہ کافر منہ کو لگی ہوئی

محمد یاسرعلی

شکر ہے پیر جی یہ نشہ ابھی تک ہمارے منہ کو نہیں لگا
الٹا موبائل فون بد دعائیں ہی دیتا ہو گا کس کے ہتھ لگ گیا ہوں نہ اسے کوئی فون کرتا ہے نہ یہ کسی کو کسی کو فون کرتا ہے

حیدر

میرا تو موبالئل تین دن سے خراب ہوا پڑا ہے۔
کمپنی والے منتیں کر رہے ہیں کہ یار اللہ کا واسطہ ہے ہمارے خرچے پر موبائل لے لو، سستا لے لو، مہنگا خرید کو ، مگر موبائل خرید لو۔

مگر میں ہوں کہ چین کی بانسری بجا رہا ہوں۔

احمد نذیر

بندر کے ہاتھ میں تلوار دینگے تو زخم تو کھانا ہی پڑے گا۔ اتنا دماغ اگر کسی اچھے کام میں لگائیں تو۔۔۔۔۔۔۔۔۔۔۔۔۔۔۔۔

یہ کمال ہے۔ ایسی کوئی بات تو شاید لفظ Hello ایجاد کرنے والوں کے وہم و گمان میں بھی نہ ہو۔ کمال ہے ہمارے موبائل مفکرین کی اعلٰی سوچ بھی۔

__________________

محمد یاسرعلی

ویسے غور طلب بات ہے کہ hello اگر hell سے نکلا ہوتا تو انگریز کیا کوئی انگریز اسے استعمال کرتا جن کی زبان ہے
افسوس ہے ہم خود السلام علیکم کہتے نہیں ہیں اور دوسروں کی زبان کے بارے میں بھی غلط فہمیاں پھیلا رہے ہیں

محمدعدنان

اب تو یہ نشے سے بھی زیادہ ہوگیا ہے ۔ پاس ہوتو چین نہیں‌اور اگر نہ ہوتو چین نہیں ۔
ہُن دسو بندہ کرے تے کی کرے ؟

__________________

راجہ اکرام

بندہ کجھ نہ کرے ۔۔ موبائل نوں روزانہ صبح شام کھال دے پانی نال غسل دوے ۔۔ ساری بے چینی ایک ہفتے وچ درست ہو جاوے گی، موبائل دی وی تے بندے دی وی

__________________
محتاج اصلاح و دعا

یاسر عمران مرزا

زبردست ،،،، ایسی تحریر عطاالحق قاسمی جیسا بندہ ہی لکھ سکتا ہے۔۔۔۔۔۔۔۔

سیفی خان

اچھی تحریر ہے ۔ ۔ ۔ شئیرنگ کا شکریہ جتالہ بھائی

شمشاد احمد

ميري دقيانوسي سي رائے ہے كہ اس سب ميں نہ قوم كا قصور ہے نہ موبائل كا۔۔۔۔۔۔ اس ميں قدرے قصور موبائل كمپنيوں كا ہے‌اور اس سے‌زيادہ ہمارے حكمرانوں كا ہے جنھوں نے ان كي لگام ڈھلي كي ہوئي ہے۔۔۔۔۔ قوم كا كيا ہے يہ تو وہ موم كي ناك ہوتي ہے اسے جہاں چاہو موڑ دو۔۔۔۔۔۔

__________________
بندے اور اللہ تعالی سے محبت کا فرق یہ ہے کہ۔ بندے کی محبت ہمیشہ انسان کی بڑی کمزوری بن جاتی ہے۔ اور اللہ تعالی کی محبت ہمیشہ انسان کی سب سے بڑی طاقت بن جاتی ہے۔

Miss Khan

خوبصورت تحریر ہے، بہت خوبی سے اور مزاح کے انداز میں سچی بات۔۔۔۔۔

اچھی شئرنگ ہے جناب۔