::: فٹا فٹ :::
خواہش ہو اگر تیری کہ ہو کام فٹا فٹ
اے دوست مری میز پہ رکھ دام فٹا فٹ
دولت بھی عجب چیز ہے اس دور میں بھیا
محبوب بھی آتا ہے لب بام فٹا فٹ
جو یار کی فرمائشیں پوری نہیں کرتے
وہ عشق میں ہو جاتے ہیں ناکام فٹا فٹ
گفتار کے غازی ہو تو بن سکتے ہو لیڈر
تقریروں سے پبلک کو کرو رام فٹا فٹ
کھانے میں نمک کم ہو کہ وہ مرچ زیادہ
میں گھر میں مچا دیتا ہوں کہرام فٹا فٹ
عید آئی کہ آئی ہے مری شامتِ اعمال
ہر شخص طلب کرتا ہے انعام فٹا فٹ
تنقید تو کرتے ہو ضیاء یہ بھی سمجھ لو
ہو جاؤ گے تم شہر میں بدنام فٹا فٹ

::: ضیاء الحق قاسمی :::