The Great

میں تیرا شہر چھوڑ جاؤں گا

اس سے پہلے کہ گھر کے پردوں سے، کاچھا ۔ پتلوں کوئی سِلوا لوں
اس سے پہلے کہ تجھ کو دل دے کے، تیرے کوچے میں خود کو پِٹوا لوں
اس سے پہلے کہ تیری فرقت میں، خود کشی کی سکیم اپنا لوں
اس سے پہلے کہ اک تیری خاطر، نام پگلوں میں اپنا لکھوا لوں

میں تیرا شہر چھوڑ جاؤں گا

اس سے پہلے کہ وہ عُدو کم بخت، تیرے گھر جا کے چغلیاں کھائے
اس سے پہلے کہ دیں رپٹ جا کر ، تیرے میرے " شریف ہمسائے"
اس سے پہلے کہ تیری فرمائش ، مجھ سے چوری کے جرم کروائے
اس سے پہلے کہ موٹا تھانیدار ، مرغ تھانے میں مجھ کو بنوائے

میں تیرا شہر چھوڑ جاؤں گا

تجھ کو آگاہ کیوں نہ کر ڈالوں، اپنے اس انتظام سے پہلے
مشورہ بھی تمھی سے کرنا ہے ، اپنی مرگِ حرام سے پہلے
کوئی ایسی ٹرین بتلا دے، جائے جو تیز گام سے پہلے
آج تجھ سے یہ " ڈیٹ " بھگتا کر ، کل کسی وقت شام سے پہلے

میں تیرا شہر چھوڑ جاؤں گا