فرحان دانش

یہ خبر ARY ONE WORLD کے انٹرنیٹ ایڈیشن سے لی گئی ہے.



اسلام آباد: پاکستان ٹیلی کمیونیکیشن اتھارٹی (پی ٹی اے) نے صارفین کے کوائف کی تصدیق کے بعد نئی موبائل سمز چالو کرنے کیلئے 31 جنوری 2009ء سے نیا نظام رائج کرنے کا فیصلہ کیا ہے۔ موبائل فون کمپنیوں کیلئے نئی سم جاری کرنے کے حوالہ سے نظام کا جائزہ لینے کے حوالہ سے منگل کو پی ٹی اے ہیڈ کوارٹرز میں موبائل کمپنیوں کے چیف ایگزیکٹو آفیسرز اور ریگولیٹری افیئرز کے انچارج افسران کا اجلاس چیئرمین پی ٹی اے محمد یاسین کی صدارت میں منعقد ہوا۔

اجلاس میں پی ٹی اے کے متعلقہ افسران نے بھی شرکت کی۔ اجلاس سے خطاب کرتے ہوئے چیئرمین پی ٹی اے نے کہا کہ 31 جنوری 2009ء سے جو سمز فروخت کی جائیں گی وہ نان ایکٹویٹیڈ ہوں گی اور انہیں نادرا کے ذریعے صارفین کے کوائف کی تصدیق کے بعد ایکٹیویٹ کیا جائے گا اور اس کے بعد پری ایکٹیویٹیڈ سمز کی فروخت بند کر دی جائیں گی۔ چیئرمین پی ٹی اے نے کہا کہ پی ٹی اے دو ہفتوں کے بعد ایس او پی کی خلاف ورزی کا جائزہ لینے کیلئے سروے کرے گا۔ خلاف ورزی کی صورت میں اتھارٹی موبائل کمپنیوں کو شوکاز نوٹس جاری کرے گی اور جرمانے عائد کئے جائیں گے۔

اجلاس میں یہ فیصلہ بھی کیا گیا کہ صارفین کی آگاہی کیلئے پی ٹی اے اور موبائل کمپنیاں اشتہاری مہم چلائیں گی تاکہ صارفین کنکشن اپنے نام رجسٹر کرائیں۔ اجلاس میں تمام موبائل آپریٹرز نے صارفین کے کوائف کی تصدیق کے بعد نئی سمز چالو کرنے کے بارے میں اپنی تجاویز پیش کیں۔ قبل ازیں کمپنیوں سے کہا گیا تھا کہ وہ پی ٹی اے سٹینڈرڈ آپریٹنگ پروسیجرز (ایس او پی) اور وزارت انفارمیشن ٹیکنالوجی اور ٹیلی کمیونیکیشن پالیسی احکامات برائے آن لائن تصدیق کے مطابق اپنی تجاویز پیش کریں۔

واضح رہے کہ اب تک کل ایک کروڑ 5 لاکھ ایسی سموں کو بلاک کیا گیا ہے جو یا تو رجسٹرڈ نہیں تھیں یا ایک شناختی کارڈ پر دس سے زائد کنکشن کے زمرے میں آتی تھیں جن میں سے 79 لاکھ سمیں غیر رجسٹرڈ تھیں۔ کمپنیوں کو ایک کمپیوٹرائزڈ قومی شناختی کارڈ پر زیادہ سے زیادہ 10 کنکشنوں کو جاری کرنے کی اجازت ہے۔

اس حوالہ سے اب تک 26 لاکھ سموں کو بلاک کیا گیا ہے جبکہ دیگر کو 21 اکتوبر 2008ء تک بلاک کر دیا جائے گا۔ اسی طرح 31 اگست 2008ء تک فروخت کردہ غیر تصدیق شدہ کنکشنز کو بھی 21 اکتوبر تک بند کر دیا جائے گا۔

__________________