جدید اور تیز ترین مواصلات کے اس دور میں ہمارا وطن عزیز پاکستان وہ ملک ہے جو دور قدیم کی ایجادوں سے استفادہ کر رہا ہے۔ مندرجہ ذیل مراسلہ اسی سلسلے کی ایک کڑی ہے۔

چک نمبر591 گ ب فیصل آباد کا چھوٹا سا ایک گاؤں ہے۔ اسکو "گنگا پور" کے نام سے بھی پکارا جاتا ہے،۔اسکا یہ نام سر گنگا رام کی وجہ سے پڑا جن کے بارے میں کہا جاتا ہے کہ وہ اس علاقے کے مالک تھے۔ سر گنگا رام ایک اچھے انجینیر کے ساتھ ساتھ انسانیت کے لیے درد دل رکھنے والے شخص بھی تھے۔ انہوں نے اس گاؤں کو ماڈل ولیج بنانے کا ارادہ کر رکھا تھا۔ انہوں نے اس علاقے میں کافی ترقیاتی کام کروائے ۔انہوں نے انیسویں صدی کے اختتام پر اس وقت کی جدید ترین زرعی مشینری بھی اس علاقے میں متعارف کروائی جس میں سے ایک مشین ہیوی دیوٹی الیکٹرک موٹر بھی تھی جو 1898 میں گوگیرا برانچ کینال پر انسٹال کی گئی۔
یہ الیکٹرک موٹر لاہور سے اس گاؤں لائی گئی چناچہ اسی سے ہی اس گھوڑا ٹرام کا آغاز ہوا۔ کیونکہ اس دور میں چھوٹے علاقوں میں سڑکوں کا تصور ہی نہیں تھا اور ہیوی ڈیوٹی موٹر کو لانے کے لیے کسی نہ کسی راستے کی ضرورت تھی۔ چناچہ سر گنگا رام نے حکم دیا کہ ساتھ والے گاؤں سے کہ جو تین کلومیٹر دور تھا،گنگا پور تک ٹرام کی پٹڑی بچھائی جائے اور پھر موٹر کو ٹرالی پر گھوڑو ں کی مدد سے کھینچ کر لایا جائے۔

وہ کام تو ہو گیا لیکن پھر اس پٹڑی نے عوام کی سہولت کا فریضہ سر انجام دیا اور کوئی 100 سال کے لگ بھگ یہ پٹڑی اور گھوڑا ٹرام اپنی قدیمی حالت میں عوام کے لیے سفری سہولیات بہم پہنچاتی رہی۔

1998 میں پٹڑی کی اور ٹرالی کی مناسب دیکھ بھال نہ ہونے کی وجہ سے اس ٹریک کو بند کر دیا گیا۔تاہم 12 سال بعد مارچ 2010 میں اس گھوڑا ٹرام کا پھر سے اغاز کر دیا گیا ہے۔ اس مقصد کے لیے فیصل آباد کی شہری حکومت نے 33 لاکھ روپے کی گرانٹ دی، جبکہ شہریوں نے بھی 11 لاکھ روپے کی امداد دے کر اس روٹ کو بحال کروانے میں اہم کردار ادا کیا۔

PTV اور BBCنے اس پر اپنی اپنی ڈاکومنٹری بنائی ہے جس کو دیکھ کر کافی سیاح اس عجوبے کو دیکھنے بھی آئے ہیں۔





بشکریہ پاکستانیات ڈاٹ کام