رات کی تاریکی میں سڑک پر مسجد سے واپسی پر اچانک کالے شیشے والی گاڑی سے چار پانچ گم نام افراد مجھ پر جھپٹ پڑے۔ مکّے دھکے مارتے آنکھوں پر پٹی، ہاتھوں میں ہتھکڑیاں لگا کر مجھے گاڑی میں پھینکا اور چل پڑے۔موبائل، بٹوا، جیبوں سے ہر چیز چھین لی۔ میری گردن کو ٹانگوں میں دبوچے رکھا۔ گاڑی کئی موڑ اور چکر کاٹتی طویل سفر کے بعد گیٹ کے اندر داخل ہو گئی، میرے گھر والے کھانے پر میرا انتظار کرتے بے حال ہو چکے ہونگے۔سوچتے ہوں گے کہاں گیا بیٹا؟ نہ موبائل کا جواب نہ کوئی اتا پتا! ادھر میں تھا اور سلاخیں۔ دروازہ پار کرتے ہی تھپڑوں، ڈنڈوں، لتّروں اور گالیوں کی برسات سے میرا استقبال ہوا۔ گالیاں ایسی غلیظ اور گندی کہ پہلے کبھی سنی نہیں۔ لہولہان ہو کر بند کمروں کوٹھریوں سے گزرتے ہوئے مجھے ایک قطار میں فٹ کر دیا گیا، جہاں ہتھکڑیوں، آنکھوں پر سیاہ پٹیوں والی مجھ جیسی ہی مخلوق زمین پر بیٹھی ہوئی تھی۔ اس عقوبت خانے میں دیکھانہیں صرف سنا جا سکتا تھا یا بہ مشکل آنکھیں پھاڑ پھاڑ کر سیاہ پٹیوں کے بیچ اندازہ لگایا جا سکتا تھا۔ بینائی سے محرومی پر قوّت سماعت کچھ بڑھ گئی تھی یہاں آپس میں بات چیت پر مکمل پابندی تھی۔ اس پر شدید پٹائی ہوتی لیکن عملے سے چھوٹی موٹی بات، کھانسنے، آہ بھرنے وغیرہ سے اندازہ ہوا وہاں اکثر نوجوان اور کم عمر بچّے موجود تھے ۔ جب کوئی تکلیف کی وجہ سے بے چین ہوتا اور کچھ بولنے کی کوشش کرتا تو اس کے جواب میں اس کوگالیاں اور لتّرملتے اور کہا جاتا کہ منہ بند رکھو۔ دن اور رات کو مخصوص اوقات میں باضابطہ پٹائی کے لئے متعلقہ افراد لے جاتے۔ کرکٹ بیٹ نما ٹھوس پلاسٹک کے جدید لتّر، کئی قسم کے ڈنڈے، ہائی وولٹیج شاک اور دیگر ٹارچر کے جدید آلات کو ٹارچر کے لیے استعمال میں لایا جاتا۔ ٹارچر کے دوران دروازے کھول دیے جاتے تاکہ باقی زیر حراست لوگ چیخیں اور تڑپنا سن سکیں اور ان پر خوف طاری رہے۔ ایمان نہ ہوتا تو یہ سب کچھ انسان کو اندر سے ختم کر دینے کو کافی تھا۔صرف ایمان استقامت دیتا رہا، نماز بھی بیڑیوں، ہتھکڑیوں، پٹیوں سمیت پڑھتے رہے۔ باتھ روم بھی دن میں ایک دفعہ جانے کی اجازت تھی، جس کی وجہ سے کئی مرتبہ پاخانہ شلوار میں ہی نکلتا۔ پانی نہ ملتا تو تیمّم کر کے اللہ کو خاموشی سے یاد کرتے۔ عقوبت خانے کے ساتھیوں کے ٹارچر پر آوازوں پر بھی اللہ ہی کو پکارتے اس کے سوا ہم بے گناہوں کی آواز اس پاکستان میں سننے والا کون تھا۔نہ کوئی جرم، نہ عدالت، نہ قانون، نہ ثبوت، بس ماریں کھاتے رہو اور جو جرم وہ ہمارے منہ میں ڈال کر نکلوانا، اگلوانا چاہیں وہ قبول کر لو! لیکن ان حالات میں انتہائی تکلیف دہ چیز ان خواتین کی چیخیں تھیں جو اسی جگہ قریب کوٹھڑیوں میں بند تھیں۔ صاف محسوس ہوتا تھا کہ چند ایک چھوٹے بچّے بھی وہاں موجود تھے۔ ان پر لتّروں کی بارش اور ناقابل برداشت چیخیں رات کو سنتے اور ہم اپنی بے بسی پر آہیں بھر بھر کے ان کے لئے اللہ کی مدد کی دعا کرتے۔ ان ماؤں کے ساتھ ان کی بچیاں بھی تھیں۔ یہ چھوٹی چھوٹی بچیاں اپنی ماؤں کے لیے چیخ و پکار کرتیں اور گھر واپسی کے لئے دیوانہ وار روتیں۔ بعض اوقات وہ گھنٹوں لگا تار روتی رہتیں۔ عملے کی موٹی موٹی گالیاں انہیں چب کرانے میں ناکام رہتیں۔ خواتین کی چیخ و پکار بہت شدیدہوتی۔ بچیوں کو چپ کرانے میں ناکامی پر انہیں نیند کا ٹیکا لگا کر خاموش کر دیا جاتا۔ یہ سب سن کر مجھے لاہور میں کسی تہہ خانے میں لڑکیوں کے رونے اور قرآن پڑھتے رہنے کی خبریں یاد آنے لگیں۔گمشدہ افراد ( missing persons) کی کہانیاں بہت سن رکھی تھیں مگر جب یہ سب گزرتے دیکھا تو احساس ہوا کہ یہ کس قدر بڑا ظلم ہے۔ سوچتا نہ جانے ملک بھر میں کتنے ایسے عقوبت خانوں کے جال ہوں گے جہاں کتنے افراد کے ساتھ بغیر عدالت میں پیش کیے کیسے کیسے ظلم کیے جا رہے ہوں گے اور کتنے کتنے عرصہ کے لیے ان کو اس نوعیت کی غیر قانونی قیدوبند میں رکھا جاتا ہو گا۔ رنج تو اس بات کا تھا کہ امریکا میں عافیہ صدیقی پر ڈھائے جانے والے مظالم پر رونے والے پاکستانیوں کے اپنے ملک میں عورتیں بچّے بھی محفوظ نہیں۔ قانون، دستور کی دھجیاں اڑ رہی ہیں۔ پولیس کے لتروں پر سب نے شور مچایا لیکن اس ظلم پر سب بے بس۔ میری طرح کے کچھ خوش قسمتوں کوہفتوں، مہینوں کی اذیت کے بعد چھوڑ دیا جاتا مگر کسی کے پاس کوئی ثبوت نہ ہوتا کہ کس نے اٹھایا، کہاں رکھا اور کب چھوڑا۔ یہ تنبیہ کی جاتی کہ زبان نہیں کھولنی ورنہ پھر اٹھا لیا جائے گا۔ یہ کیسا المیہ ہے کہ پاکستانی نژاد فیصل شہزاد کو مبیّنہ ٹائم اسکوائر دہشتگردی کے الزام پر امریکہ میں پکڑا جاتا ہے اور وہاں کے قانون کے مطابق عدالت میں پیش کیا جاتا ہے مگر اس کے مبینہ رابطوں کو اسلام آباد اور ملک کے دوسرے علاقوں سے اس انداز میں اٹھایا جاتا ہے جیسا میرے ساتھ ہوا۔ خدا جانے ان پر کیا گزر رہی ہو گی۔ بلوچستان، سوات، قبائلی علاقوں سے نہ جانے کتنے ایسے افراد انصاف کے منتظر ہیں مگر ہماری ایجنسیوں کا اپنا انصاف کا طریقہ ہے۔ ایسا انصاف جو قانون کو مانتا ہے اور نہ ہی آئیں کو۔ وہ انصاف جس نے مشرقی پاکستان میں مکتی باہنی کو پیدا کیا ، بلوچستان میں نفرت کی آگ کو سلگایا اور پاکستان مین دہشت گردی اور عسکریت پسندی کو ہوا دی۔جو دہشت گردی میں شامل ہو اسے ضرور پکڑیں، سخت سے سخت سزا دیں مگر قانون کے دائرہ میں رہ کر، عدالتوں کے ذریعے اور انصاف کے تقاضے پورے کرکے۔کاش اس پر حکومت، سیاسی پارٹیاں، پاکستان آرمی، ایجنسیاں سوچیں اور کچھ کریں اس سے پہلے کہ بہت دیر ہو جائے۔"
یہ کہانی ہے ایک ایسے نوجوان کی جو پراسرار طور پر غائب ہوا اور ایک عرصے کے بعد چھوڑ دیا گیا۔

بشکریہ جنگ

میرا سوال یہ ہے کہ عافیہ صدیقی کو رونے والے مذہبی راہنما اور سوشل گروپس کے پیٹ‌میں پاکستانی خواتین کے لیے کیوں مروڑ نہیں اٹھتے؟

__________________
تم سپاہی نہیں ہو پیشہ ور قاتلو!