ملک بھر میں شدید سردی کی لہر جاری ہے ۔ لاہور میں سردی کے تمام ریکارڈ ٹوٹ گئے اور درجہ حرارت منفی دو ڈگری سنٹی گریڈ تک گر گیا۔ دوسری جانب 6افراد ٹھٹھر کر جاں بحق ہو گئے۔ محکمہ موسمیات کے مطابق پنجاب کے دارالحکومت لاہور میں سردی نے سابقہ ریکارڈ توڑ دیئے ہیں۔ محکمہ موسمیات کے ایک افسر نے بتایا کہ منگل کو طلوع آفتاب سے کچھ دیر پہلے درجہ حرارت منفی دواعشاریہ دو سینٹی گریڈ ریکارڈ کیا گیا اور ریکارڈ کے مطابق لاہور میں اس سے پہلے اتنا کم درجہ حرارت کبھی نہیں رہا۔ پچھلے برس سات جنوری کو کم از کم درجہ حرارت منفی دو سینٹی گریڈ ہوا تو محکمہ موسمیات نے قرار دیا تھا کہ سردی کا ستر سالہ ریکارڈ ٹوٹ گیا ہے تا ہم اس برس اس سے بھی زیادہ سردی ریکارڈ کی گئی ہے۔ محکمہ موسمیات کے مطابق اس بار بحیئرہ کیسپیئن سے اٹھنے والی سرد ہوائیں ایران سے افغانستان کے پہاڑوں کی طرف جانے کی بجائے درہ بولان سے پاکستان کے میدانی علاقوں میں براہ راست داخل ہوگئی ہیں۔ محکمہ موسمیات کا کہنا ہے ان تمام وجوہات کی بنا پر پنجاب اور سندھ کے کئی میدانی شہروں کا درجہ حرارت منفی میں چلا گیا ہے۔ اسلام آباد، راولپنڈی، میانوالی اور نواب شاہ میں درجہ حرارت منفی تین رہا ہے اس کے علاوہ بھی فیصل آباد، سرگودھا اور سیالکوٹ میں کم از کم درجہ حرارت منفی ایک ریکارڈ کیا گیا ہے۔ سب سے کم درجہ حرارت کالام میں منفی 17ڈگری سنٹی گریڈ ریکارڈ کیا گیا۔ کاغان میں شدید برفباری اور سردی کا تیس سالہ ریکارڈ ٹوٹ گیا کاغان روڈ پر لینڈ سلائیڈنگ اور برفانی تودے گرنے سے کاغان روڈ بند ہو گیا۔ راستے بلاک اور رابطے منقطع ہو گئے۔ وادی چترال میں منگل کے روز بر ف باری اور بارش کا سلسلہ ایک بار پھر شروع ہوگیا چترال سے پشاور کے لئے پی آئی اے کے دو پر واز یں منسوخ ہوگئیں۔ محکمہ موسمیات کے مطابق ملک میں شدید سردی کی لہر مزید ایک ہفتہ جاری رہے گی جبکہ جبکہ کل سے کشمیر اور شمالی علاقوں میں نیا بارشی سسٹم بننے کی بھی توقع ہے۔ ملک کے بالائی علاقوں حصوں اور مشرقی سندھ میں ہلکے بادل رہیں گے۔ آئندہ 24گھنٹوں کے دوران چترال میں بعض مقامات پر بارش اور ملحقہ پہاڑوں پر برف باری کا امکان ہے۔ اوکاڑہ میں چار سالہ نعیم سمیت چار افراد ٹھٹھر کر جاں بحق ہو گئے جبکہ چنیوٹ کے نواحی موضع مل دا برج میں معمر چرواہا دریا کے کنارے سردی کے باعث دم توڑ گیا۔ گوجرانوالہ کے تھانہ سول لائن کے علاقہ جناح سٹیڈیم کے قریب سردی سے ٹھٹھر کہ 35سالہ نامعلوم شخص جاں بحق ہو گیا۔ سردی کی وجہ سے شہریوں کے معمولات میں بھی فرق آیا ہے اورگرم کپڑوں اور ہیٹر کا استعمال بڑھ گیا ہے تاہم بجلی کی لوڈ شیڈنگ اور قدرتی گیس کی قلت نے لوگوں کی پریشانی میں اضافہ کیا ہے۔ مقبوضہ کشمیر میں دراس کا علاقہ جو سائبیریا کے بعد دنیا کا دوسرا سرد ترین مقام ہے گزشتہ رات درجہ حرارت منفی 27ڈگری ریکارڈ کیا گیا جو رواں موسم سرما کی سرد ترین رات تھی۔ کشمیر میڈیا سروس کے مطابق مقبوضہ وادی میں مجموعی طور پر رات کے وقت سخت سردی پڑ رہی ہے جس کے باعث ڈل جھیل جزوی طور پر منجمد ہو گئی ہے۔ دراس میں دن کے وقت بھی درجہ حرارت منفی 13اعشاریہ 5ڈگری رہا جس کے باعث مختلف جھیلوں کا پانی جم گیا۔ قریبی علاقے کارگل میں بھی گزشتہ رات موسم سرما کا کم سے کم درجہ حرارت منفی 21اعشاریہ 5ڈگری ریکارڈ کیا گیا۔ شدید سردی کے باعث روزمرہ کی زندگی متاثر ہوئی ہے اور لوگ زیادہ تر گھروں کے اندر ہی رہے۔