میں نے مستقل پاکستان واپسی اور قیام کا ارادہ کیا ۔ احباب کو علم ہوا تو کچھ نے مجھے بےوقوف کہا ، کچھ نے سمجھانے کی کوشش کی۔ بطور دلیل یہ بات کہی جاتی کہ پاکستان اب ویسا نہیں رہا ۔ اب وہاں امن و سکون نہیں۔ محبت اور بھائی چارہ ختم ہو چکا ہے کوئی کسی کو نہیں پوچھتا وغیرہ وغیرہ
دیگر بے شمار فورمز کی طرح پاک نیٹ پر بھی ایسی مایوسیانہ فضا قائم تھی کہ میں جو بہت مثبت سوچ کی حامل تھی کچھ کچھ مایوس ہونے لگی تھی ۔

لیکن پاکستان واپسی پر جب دوبارہ اپنے کالج گئی اور اساتذہ سے ملاقات ہوئی تو ایک نیا عزم اور حوصلہ ملا اور ایک بار پھر یقین ہو گیا کہ یہاں سب کچھ ہے اگر کچھ کمی ہے تو ہماری محنت میں۔
اپنی بات کو واضع کرنے کے لیے اپنی زندگی کے اوراق پلٹنا چاہوں گی ۔
1999 میں کراچی میں انٹرنیشنل ڈینٹل کانفرنس کا انعقاد ہوا ۔
اس وقت میں فائنل ائیر میں پڑھتی تھی ۔ میں نے انٹرنیشنل کانفرنس میں اپنے کالج کی ترجمانی کی ۔ اس کانفرنس میں میں نے اپنی پریزنٹیشن کے لیے پوسٹ گریجویٹ لیول کا موضوع منتخب کیا تھا۔
میری پریزنٹیشن کو بہت پذیرائی ملی ۔
اویٹھو ڈونک میرا پسندیدہ سیبجیکٹ ۔ جس پر میں نے زمانےطالب علمی میں ہی بہت سی کتابیں اور ریسرچ پیپرز پڑھ ڈالے تھے ۔
یہ پریزنٹیشن بھی اورتھو کے ہی متعلق تھی ۔
ہماری کالج کی اورتھو ڈپارٹمنٹ کی ہیڈ آف ڈپارٹمنٹ نے گریجویشن کے بعد۔مجھے fpsc کا امتحان دینے کا مشورہ دیا اور ایٹیچمنٹ کے لیے اپنے ہی کالج میں آفر کی ۔ اور کہا کہ تم پوسٹ گریجویشن ضرور کرنا اور ریسرچ کی طرف آنا ۔
اسی طرح دوسال گزر گئے ۔ میں نے بی ڈی ایس فرسٹ ڈیویژن میں کیا ۔
2002 کو کراچی میں ایک سیمنار منعقد ہوا ۔ جس میں پاکستان کے تمام ڈینٹل کالجز کے پروفیسرز، ٹیچرز اور ڈینٹل سرجنز کو انوائیٹ کیا گیا ۔
اس سیمنار میں ہمارے کالج کی طرف سے پریزنٹیشن دینے کے لیے مجھے منتخب کیا گیا ۔ اور میں نے پریزنٹیشن کی پوری تیاری کرلی ۔
اتفاق سے وہ سیمنار جس دن منعقد ہوا اسی دن میری مہندی کا فنکشن تھا ۔ میں نے اپنا مسئلہ اپنی میڈم کے سامنے رکھا ۔ انہوں نے کہا ۔ سیمنار تو دن کے وقت ہے اور تمھاری مہندی تو رات کو ہوگی تم پریزنٹیشن دے کر گھر چلی جانا ۔
اور ساتھ میں کہا کہ یہ پریزنٹیشن تمھارے لیے بہت اہم اور کیرئیر اورینٹڈ ہے ۔ اگر یہ سیمینار تم نے اٹینڈ نہیں کیا تو تم اپنے پروفیشن کو اس طرح جاری نہیں رکھ سکتی ہو جیسے کہ تمھاری قابلیت ہے ۔
میں ڈبل مائنڈ ہوکر گھر گئی اور اپنی امی سے مشورہ کیا ۔ امی نے مجھے صاف منع کردیا کہ تم مہندی والے دن پریزنٹیشن دینے نہیں جاو گی۔
میں نے امی کو سمجھایا کہ امی سیمینار صبح کو ہے ۔۔۔۔لیکن امی نے کہا کہ اگر تم اس دن گئی تو تم کبھی اپنی شادی نبھا نہیں پاو گی ، تم کو اپنے پروفیشن اور فیملی لائف میں کسی ایک کو سیلکٹ کرنا پڑے گا ۔
میں نے اپنی امی کی بات مانی اور اپنی میڈم سے معذرت کرلی اور اپنی پریزنٹیشن اپنے ایک سینئیر کو دے دی ۔

اس طرح میری شادی ہوگئی اور میری زندگی کا یہ باب بند ہوگیا کہ میں کبھی پوسٹ گریجوشن کرسکوں اور ریسرچ کی طرف آسکوں وغیرہ وغیرہ

شادی کے بعد میں نے اپنی کلینکل پریکٹس شروع کی ۔
اورتھوڈونکس میرا پسندیدہ مضمون اور اس کے بارے میں میری معلومات بھی کافی تھی ۔ لیکن قانون کے اعتبار سے ایک عام ڈینٹل سرجن اورتھو ڈونٹکس کے کیسس نہیں کرسکتا ہے ۔ اس لیے شوق ہونے کے باوجود میں نے اورتھو کا کوئی کیس کلینک پر نہیں کیا ۔
شاید پاکستان میں میں واحد ڈینٹل سرجن ہوں جس نے اس قانون کی پاسداری کی ہے ۔
میرا اصول یہ ہے کہ غلط کام غلط ہی ہوتا ہے چاہے اس کو پورا ملک ہی کیوں نا کررہا ہو ۔
خیر ۔ وقت گزرتا گیا ۔ میں ملک سے باہر چلی گئی ۔

لیکن وہاں رہ کر جب دنیا دیکھی اور اپنے اور بچوں کے مستقبل کے بارے میں سوچا تو اس فیصلے پر پہنچے کہ پاکستان سے بہتر کوئی جگہ نہیں۔ لیکن لوگوں کی باتیں سن سن کر کچھ مایوسی ہو گئی تھی ۔
اب واپسی کے فیصلے کے وقت میں اپنے دل میں بے شمار خدشات لیے پاکستان واپس آئی ۔

وطن واپس آ کر میں نے اپنے کالج جانے کا فیصلہ کیا۔ پہلے پہل تو کافی ڈر محسوس ہو رہا تھا کہ سب کچھ بدل گیا ہوتا، اور جو پرانے لوگ رہ گئے ہوں گے وہ پہچانیں گے بھی یا نہیں۔ لوگ بھولنے میں ایک دو مہنے لگاتے ہیں ۔ اور میں تو پھر آٹھ سال بعد میں کالج جارہی ہوں ۔
لیکن جب میں میں وہاں گئی تو اپنے اساتذہ اور سیینئرز کا رویہ دیکھ کر حیران رہ گئی ، میرے تمام استاد اور سینیرز جو اب وہاں ٹیچنگ کررہے ہیں انہوں نے بہت گرم جوشی سے میرا استقبال کیا ۔
آورتھو ڈپارٹمنٹ کے موجودہ ہیڈ آف ڈپارٹمنت نے مجھے آج ایٹیچمنٹ کی آفر کی ۔

باتوں کے دوران میں نے اپنے سر سے پوچھا ، کیا واقعی اب پاکستان پہلے جیسا نہیں رہا ؟؟
یہاں قابلیت کو کوئی نہیں پوچھتا ، کیا یہاں انسانیت ، خلوص سب ختم ہوچکا ہے؟
کیا یہاں اب نوکریاں بالکل نہیں ہیں ۔ ؟؟
تو میرے استاد نے جواب دیا
نہیں ۔ایسا نہیں ہے
جو شخص بھی اپنے کام کے ساتھ سنجیدہ ہے اور محنت کرنا جانتا ہے اس کے لیے پاکستان میں بہت کچھ ہے ۔

اپنے استاد کے ان الفاظ نے میرے اندر توانائی بھر دی ۔ میں جو پاکستان کے بارے میں ‌مایوس ہونے لگی تھی ایک بار پھر ایک نئی ہمت کے ساتھ میدان میں اتر آئی کہ نہیں ابھی پاکستان میں بہت کچھ باقی ہے۔ اگر کمی ہے تو محنت اور لگن کی۔ بس ہمیں دگنی محنت کرنی ہوگی ۔ انشاءاللہ حالات بدل جائیں گے۔

__________________
اے اللہ
میرے ہر فیصلے میں تیری رضا ہو شامل
جو تیرا حکم ہو وہ میرا ارادہ کردے