گوہر

تحریر : محمد الطاف گوہر
فراق کی وادیاں اب میری قربت کی ہمراز ہوئیں اور زندگی نے موسم خزاں کی را ہ تکنی شروع کردی ، آہ و قاہ مسرتوں سے نا آشا ہوئے اور ہجر کی تنی دھوپ اب سائے کو ترسنے لگی ، درختوں پر پتے اب اپنا چہرہ زردی میں چھپانے لگے اور دریا کی گھاٹیا ں اب پانی کی بوندوں کو ترسنے لگیں ،موجوں کی جگہ اب ریت کے ننگے ٹیلوں نےلے لی اور ہواؤں کے دوش محو رقص ہونے لگے ۔
ایک پری زاد اور ایک انسان ، کیا یہ محبت کی راہوں کے ہمراہی رہ سکتے ہیں ؟ پیار کا کشتی میں سوار کر کے عشق کی تند و تیز موجوں کے رحم و کرم پر مجھے چھوڑ کر میری راتوں کی نیند چرانے والی نہ جانے کہاں چلی گئی؟ ہجر کی ظلمتیں ، کالی گھٹاؤں کیطرح برس رہی تھیں اور پیار کے سمندر میں عشق کے مدوجزر اٹھنے لگے تو صبر نے آگے بڑھ کر تھام لیا ۔جب آنکھوں نے دل و جاں سے نظارہ جاناں کیا تھا وہ موتی پرونے ختم کئیے ، اب ہجر کا طوفان تھما تو معاملات معمول پر آنے لگے ، وہی معمولات اور وہی سلسلہ تعلیم مگر اب طبعیت میں ایک ٹھہراؤ سا آ چکا تھا جیسے کسی سمندر میں مدوجزر آنے کے بعد خاموشی چھا جاتی ہے ۔
اس سلسلہ کے دوران مجھے معلوم نہ ہو سکا کہ کوئی اور میری طرف متوجہ بھی ہے ، میں اپنے آپ میں کھویا رہتا تھا لہذا کچھ احساس نہ ہوا کہ تم ایک "خاموش محبت" بن کر میرے سامنے آئی اور مجھے جھنجھوڑ کے رکھ دیا ، ان آنکھوں میں اپنے لئیے تیرتا پیار دیکھ کر میری سوچیں تھم گیں ، آہ ! مگر کبھی بھی تجھ سے اظہار محبت نہ کر سکا ، نہ معلوم مجھ میں اتنی جرات کیوں نہ ہو سکی ، تیری گہری نیلی آنکھوں نے میرے اندر محبت کی بجھتی چنگاریوں کو سلگا دیا اور پیار کا دریا اپنی آن و شان میں پھر سے موجزن ہو گیا۔
پیار اور محبت کا یہ رنگ پہلے رنگوں سے جدا تھا ، الفت کی زرد مرجھا تی پتیاں اب پھر سے ہری ہونے لگیں ، مروت کی کونپلیں پھوٹنے لگیں اور مسرت کی تتلیاں پھر سے وصل کے گلوں پر آنے لگیں اور فضائیں تیرے سانسوں کی مہک سے لبریز ہونے لگیں ۔
روزانہ تیرا انتظار صرف اک جھلک دیکھنے کو دل بے تاب رہتا تھا ، نظروں سے نظریں ٹکراتی تو پیمانہ دل چھلک جاتا، گھنٹوں اپنے دروازے پر تیری اک جھلک دیکھنے کو کھڑا رہتا کہ کب تو کتابیں سنبھالے گھر واپس آئے اور دیدار کی اک جھلک نصیب ہو اور جب بغور دیکھا تو پری زاد میں اور تیرے چہرے میں کوئی فرق تلاش نہ کر پایا ، تیری ہر ادا دلربا ہو گئی ۔ چلتے چلتے جب تو اپنی سہیلیوں کے ساتھ تو خوش گپیوں میں مصروف ہوتی تو میر ی اشتیاق بھری نگاہیں تیرا تعاقب کرتیں نہ تھکتیں ، تو نے اک نئے ولولے سے آشکار کیا ورنہ میں تو ہجر کی کھائی میں دھنستا چلا جا رہا تھا ، آہ! مگر کبھی تجھ سے اپنی محبت کا اظہار نہ کر پایا۔

جاری۔۔۔

نیلم خان

بہت خوب