سیپ

السلام علیکم ورحمتہ اللہ و برکاتہ
خوبصورت لوگ دنیا کی رونق کو دوبالا کرنے آئے ہیں۔ یہ نہ ہوں تو کائنات کا حُسن بکھر جائے۔ ان کے ہونے سے کائنات میں زندگی کی رمق باقی ہے۔ خوبصورتی کے دم ہی سے کائنات میں کائناتی حُسن موجود ہے ورنہ یہ کائنات بہت عام سی بن جاتی، جیسے غاروں میں رہنے والا انسان بہت ہی عام زندگی گزارتا تھا مگر اُس کے پیش نظر وسیع کائنات کا تخیل تو نہ تھا اور نہ ہی وہ کسی ایسی چیز کی تلاش میں گُم تھا جسے حُسن سے تعبیر کیا جا سکے۔ وہ حُسن میں رہتا تھا مگر حُسن کی طبیعت سے ناواقف تھا۔ جو منظر اُس انسان کو میسر تھے آج ہم اُن مناظر کی تلاش میں بہت دُور کا سفر کرتے ہیں۔ جن مقامات پر اُس انسان نے زندگی گزاری ہم اُن مقامات کی سیروسیاحت کا لطف اُٹھا کر خوش ہوتے ہیں اور اپنی قسمت پر رشک کرتے ہیں۔ دراصل وہ انسان بہت پہلے گزر گیا لیکن اپنے پیچھے اپنی اولاد چھوڑ گیا۔ ہم اُنہی انسانوں سے جُڑے ہوئے ہیں۔ ہمارے اندر بھی ویسا ہی انسان بستا ہے لیکن فرق صرف اتنا ہے کہ وہ انسان خوبصورتی میں جیتا تھا اور ہم خوبصورتی کی تلاش میں جیتے ہیں۔

کائنات مزید ترقی کی جانب قدم بہ قدم سفر کر رہی ہے۔ ٹیکنالوجی نے کائنات کے حُسن کو چار چاند لگا دیے اور انسان نے کائنات کے تخیل کو پھر سے پختہ کیا، زندہ کیا اور غار میں رہنے والے انسان کا سُراغ ڈھونڈ نکالا۔ غار آج بھی آباد ہیں مگر مہذب دنیا بہت آگے نکل چکی۔ اب وقت ہے کہ مزید خواب دیکھے جائیں ، مزید بستیاں آباد کی جائیں اور مزید خوشی کا اظہار کیا جائے۔ لیکن یہ خوشی، یہ حُسن اور یہ لوگ سبھی پُرانی یادوں کو ازسرنو تازہ کرنے میں مصروف ہیں۔ ان کا حُسن غاروں کی پناہ گاہوں سے جنم لیتا ہے اور ان کی زندگی کسی ویران محل کے درو ویوار کو دیکھ کر خوش ہوتی ہے۔

خوبصورتی کی تلاش ہمیں جسم جسم لیے پھری، پھر قریہ قریہ پھرنے والے لوگ چل نکلے اب سافٹ ویر کی دنیا میں حُسن دیکھا جا رہا ہے۔ حُسن محفوظ کرنا آج کے انسان کا سب سے بڑا کارنامہ ہے۔ یہی حُسن کائنات میں بکھرا ہوا تھا اور اب یہی حُسن ہر جگہ عام نہیں ہے۔ بہت خواص کی اس حُسن تک رسائی ہے۔ لیکن بہت ہی عام لوگ اس حُسن کی قیمت سے ناواقف ہیں۔ یہ لوگ اب بھی غاروں کی زندگی جی رہے ہیں۔ ان کے تخیل میں اب بھی غار آباد ہیں مگر ان کے تخیل سے ایک چیز نکل گئی۔۔۔ خواب۔۔۔

ہمیں پھر سے خوابوں کی تلاش ہے۔ ایسے خواب جن سے حُسن کو مزید تقویت ملے، ایسے خواب جنہیں اگر کاغذ پر اُتارا جائے تو آرٹ نہ کہا جائے بلکہ ایک نئی تخلیق کے نام سے یاد کیا جائے۔ ہم کاپی کی کاپی کرتے آئے ہیں۔ مگر اب ہمیں ایک اورجنل حُسن کی تلاش ہے۔ گو آج کا انسان ایسے حُسن کو دیکھنے کی تاب نہیں رکھتا اور نہ ہی اُس کے تخیل میں ایسے حُسن کے لیے کوئی جگہ باقی ہے۔ مگر انسان کا اصل مقصود کائنات کے حُسن کو احسن طریقے سے دیکھتے ہوئے کسی ایک کی تلاش ہے۔ جو مکمل حُسن ہو اور جس میں مکمل ذہانت موجود ہو۔ پارہ پارہ تخلیق کسی یکتائی کی طرف اشارہ کرتی ہے۔ بکھرے موتی کسی ایک لڑی سے گزر چکے ہیں۔ اُس ایک لڑی کی ڈھونڈنا ہے، موتی کو پھر سے لڑی کی زینت بنانا ہی حُسن ہے۔

__________________

عروج

کم صورت کہاں جائیں؟اگر خوبصورتی ھی حُسن ھے تو۔۔۔۔۔۔؟

زارا

السلام علیکم

دل کی خوبصورتی سے بڑھ کر کوئی خوبصورتی نہیں۔ شکریہ

مون

اچھی تحریر ہے ، شیرنگ کا شکریہ