یاسر عمران مرزا

آج سے کچھ سال پہلے ویب سائٹ بنانے کے لئے خاص مہارت کے حامل ماہرین کی ضرورت ہوتی تھی جو منہ مانگے معاوضوں کے عوض ویب سائٹس تیار کرتے تھے۔ مگر وقت کے ساتھ ساتھ ویب سائٹ ڈیزائننگ اور ڈیویلپمنٹ سادہ سے سادہ تر ہوتی چلی گئی اور آج یہ کام اتناآسان ہوچکا ہے کہ اسکول کے بچوں کو کمپیوٹر سائنس کی کلاسز میں ویب سائٹ ڈیزائننگ اور ڈیویلپمنٹ پڑھائی جاتی ہے۔

لیکن جہاں ایک طرف عام صارف کے لئے ویب سائٹ ڈیزائننگ اور ڈیویلپمنٹ آسان ہوتی چلی گئی وہیں دوسری طرف انٹرنیٹ پر نئی ٹیکنالوجیز کی آمد نے ویب سائٹس اور ڈیسک ٹاپ اپیلی کیشنز کے درمیان فرق کو تقریباً مٹا دیا ۔ یعنی پہلے جو کام آپ اپنے کمپیوٹر پر کسی سافٹ ویئر کی مدد سے کرسکتے تھے، وہی کام اب آن لائن ویب ایپلی کیشن کے ذریعے دنیا میں کسی بھی جگہ رہتے ہوئے کرسکتے ہیں۔ اس کی ایک مثال گوگل ڈوک اینڈ اسپریڈ شیٹ کی دی جاسکتی ہے کہ آپ آن لائن رہتے ہوئے ایکسل اور ورڈ کی طرح کی ڈاکیومنٹ تیار کرسکتے ہیں اور انہیں بذریعہ انٹرنیٹ کسی بھی جگہ سے ایکسس کرسکتے ہیں۔ یہی وجہ ہے کہ ویب سائٹ ڈیویلپمنٹ کی پیچیدگی میں بھی اضافہ ہوتا چلا گیا۔ اب بھی ایک انٹریکٹیو ویب سائٹ بنانے کے لئے لامحالہ آپ کو پروگرامنگ جیسے پیچیدہ کام انجام دینے پڑتے ہیں۔ ایک اور مسئلہ جو ویب سائٹ بنانے اور بنوانے والوں کو درپیش رہتا ہے وہ ویب سائٹ کو اپ ڈیٹ کرنا ہے۔ اگر ویب سائٹ ایک کارپوریٹ یا انٹر پرائز نوعیت کی ویب سائٹ ہے تو یقینا یہ کام صرف ایک ماہر ویب ڈیویلپر ہی انجام دے سکتا ہے۔

ایسے ہی کئی دیگر مسائل کو مد نظر رکھتے ہوئے مائیکروسافٹ سمیت کئی دیگر کمپنیوں نے نئی قسم کے سافٹ ویئر تیار کئے ہیں جو CMS یا Content Managment Systems کہلاتے ہیں۔ کانٹینٹ منیجمنٹ سسٹم کے ذریعے آپ اپنی ویب سائٹ کو ایک آسان یوزر انٹرفیس کے ذریعے ہر طرح سے مدون کرسکتے ہیں۔ اس کام کے لئے کسی بھی قسم کی مہارت درکار نہیں ہوتی ۔ مائیکروسافٹ کی جانب سے جو کانٹینٹ منیجمنٹ ٹول متعارف کروایا گیا وہ مائیکروسافٹ شیئر پوائنٹ سرور کہلاتا ہے۔ اسی طرح کئی دیگر کمپنیوں نے بھی کانٹینٹ منیجمنٹ ٹولز متعارف کروائے ہیں جو بلاشبہ ایک سے بڑھ کر ایک اور اعلیٰ کارکردگی کے حامل ہیں مگر ان میں سے اکثر کا سب سے بڑا مسئلہ یہ ہے کہ یہ قیمتاً دستیاب ہیں۔ اس کے علاوہ ان میں کسی بھی قسم کی ترمیم کی اجازت بھی نہیں ہوتی۔ دوسرا بڑا مسئلہ ہوسٹنگ کا ہے۔ مثلاً اگر آپ شیئر پوائنٹ سرور استعمال کرتے ہیں تو ہوسٹنگ سرور پر بھی آپ کو اس کی سپورٹ درکار ہوگی۔ تمام کانٹینٹ منیجمنٹ سسٹمز کو چلنے کے لئے کوئی نہ کوئی ڈیٹا بیس سسٹم ضرور درکار ہوتا ہے۔ اگر کانٹینٹ منیجمنٹ سسٹمز کسی کمرشل ڈیٹا بیس سسٹم جیسے اوریکل یا مائیکروسافٹ ایس کیو ایل سرور وغیرہ پر بنیاد رکھتا ہو تو ہوسٹنگ کی قیمت میں بھی اضافہ ہوجاتا ہے۔ مزید براں ہوسکتا ہے کہ یہ ڈیٹا بیس سسٹم ہوسٹنگ سرور پر دستیاب ہی نہ ہوں۔

اگر آپ ایک چھوٹی ویب سائٹ بنانے اور اسے بغیر کسی پریشانی کے اپ ڈیٹ بھی کرنا چاہتے ہیں تو یقینا قیمتاً سی ایم ایس خریدنا اور پھر اس کے لئے مخصوص ہوسٹنگ خریدنا ایک مہنگا سودا ہوگا۔ایسے ہی تمام تر مسائل کا حل اوپن سورس اور فری سی ایم ایس کی صورت میں موجود ہے۔ اور جب بات اوپن سورس سی ایم ایس کی ہو تو سب سے آگے جو سی ایم ایس نظر آتا ہے وہ ”جملہ“ (Joomla )ہے۔

جملہ

جملہ جنرل پبلک لائسنس کا حامل ایک مفت اور اوپن سورس سی ایم ایس ہے جو کہ پی ایچ پی میں لکھا گیا ہے۔ پی ایچ پی کے بارے میں آپ کو یقینا علم ہوگا کہ یہ ایک اسکرپٹنگ لینگویج ہے جس کے ذریعے ڈائنامک ویب سائٹس تیار کی جاتی ہیں۔ جملہ اپنے بیک اینڈ پر بطور ڈیٹا بیس مائی ایس کیو ایل کو استعمال کرتا ہے جو بذات خود ایک اوپن سورس اور مفت ڈیٹا بیس سسٹم ہے۔ اس طرح کہا جاسکتا ہے کہ جملہ ایک مکمل طور پر مفت سی ایم ایس سسٹم ہے جسے انسٹال کرنے کے لئے آپریٹنگ سسٹم کی بھی کوئی قید نہیں۔ جی ہاں، آپ جملہ کو ونڈوز ، لینکس ، یونکس اور ہر اس آپریٹنگ سسٹم پر چلا سکتے ہیں جس پر پی ایچ پی اور مائی ایس کیو ایل انسٹال کیا جاسکتا ہو۔ جملہ میں دیگر بہت سے ان گنت فیچرز موجود ہیں۔ ان میں سے چند ایک یہ ہیں۔

• تیز رفتار پیچ پروسیسنگ کے لئے پیچ کیشنگ
• آر ایس ایس فیڈز
• خود کار پرنٹ ایبل ورژن برائے تمام ویب پیجز
• نیوز فلیشس اور پولز
• بلاگز ، سرچنگ اور مقامیانے کی سہولت

اس کے علاوہ اس میں ٹمپلیٹس اور ایکسٹیشنز کی سہولت بھی موجود ہے جس کے ذریعے جملہ کی صلاحیتوں میں بے پناہ اضافہ کیا جاسکتا ہے۔ جملہ دراصل سواحلی زبان کا ایک لفظ ہے جس کا مطلب ”مشترکہ“ یا ”مل جل کر“ ہے۔ یہ نام رکھنے کا مقصد جملہ کی ڈیویلپمنٹ ٹیم کا اس پروجیکٹ کے ساتھ لگاؤ کی عکاسی کرنا ہے۔ جملہ کا پہلا ورژن 1.0.0 تھا جسے 16ستمبر 2005ءکو ریلیز کیا گیا۔ یہ پہلا ورژن دراصل ”مامبو“ نامی اوپن سورس سی ایم ایس کی تبدیل شدہ شکل تھا۔ مگر بعد میں جملہ کے مرکزی ڈیویلپرز نے فیصلہ کیا کہ جملہ کا نیا ورژن ، بالکل نئے سرے سے پی ایچ پی کے ورژن 5 کے مطابق لکھا جائے گا۔ اس کا تازہ ترین ورژن 1.5 ہے۔

جملہ کیوں استعمال کیا جائے؟

جملہ استعمال کرنے کا مشورے دینے کی بہت سی وجوہ ہیں۔ سب سے اہم وجہ تو اس کا آسان اور سادہ ہونا ہے۔ جملہ ایک ایوارڈ یافتہ اور طاقتور سی ایم ایس ہے جسے دنیا بھر میں بڑے پیمانے پر استعمال کیا جارہا ہے۔ پی ایچ پی اور مائی ایس کیو ایل جیسی بنیادوں پر کھڑا ہونے کی وجہ سے جملہ کی کارکردگی بیشتر کمرشل سی ایم ایس سافٹ ویئر سے بھی بہتر ہے۔ مفت ہونے کے ساتھ ساتھ چونکہ یہ اوپن سورس بھی ہے اس لئے آپ اس میں ہر طرح کی تبدیلی کرنے کے لئے بالکل آزاد ہیں۔ جملہ کے لئے کوئی خاص ہوسٹنگ بھی درکار نہیں ہوتی۔ پی ایچ پی اور مائی ایس کیو ایل دونوں ہوسٹنگ کے ساتھ بالکل مفت فراہم کئے جاتے ہیں۔
اس کے علاوہ جملہ کی ایک اور خاصیت اس کا ٹمپلیٹس کو سپورٹ کرنا بھی ہے۔ آپ اپنی پوری ویب سائٹ کی شکل و صورت صرف چند سیکنڈز میں ٹمپلیٹ تبدیل کر کے کر سکتے ہیں۔ ایک اور اہم خاصیت جملہ کے سولہ سو سے زائد دستیاب ایکسٹیشنز بھی ہیں جو کہ آپ کی ویب سائٹ کو چار چاند لگانے میں کوئی کسر نہیں اٹھا رکھتے۔

اس کے علاوہ جملہ کے حوالے سے کسی بھی قسم کی مدد کے لئے کمیونٹی موجود ہے جس پر اب تک (2007ء) ڈیڑھ لاکھ سے زائد تھریڈز، ساڑھے آٹھ لاکھ سے زائد پوسٹس اور ایک لاکھ کے لگ بھگ یوزرز موجود ہیں جو جملہ کے حوالے سے آپ کی مدد کو ہمہ وقت تیار ہیں۔ جملہ کی کمیونٹی پر 40 سے زائد زبانوں کی سپورٹ موجود ہے۔ اور سب آخری مگر سب سے اہم بات .... جملہ پر اردو کی سپورٹ بھی موجود ہے۔

جملہ کا حصول اور انسٹالیشن بہت ہی سادہ اور آسان ہے۔ خاص طور پر اس وقت جب پی ایچ پی اور مائی ایس کیو ایل ڈیٹا بیس درست طورپر کنفیگر ہوں۔ آپ اگر چاہیں تو جملہ کو براہ راست اپنے ہوسٹنگ سرور پر اپ لوڈ کرکے اس وہیں انسٹال کرلیں۔ اس طرح آپ کو پی ایچ پی اور مائی ایس کیو ایل کی انسٹالیشن اور کنفیگریشن نہیں کرنی ہوگی۔

لیکن میرے خیال میں جملہ سیکھنے کا سب سے اچھا طریقہ یہ ہے کہ پہلے اسے اپنے کمپیوٹر پر انسٹال کیا جائے اور اس کے تمام فیچرز اور فنکشنز سے واقفیت حاصل کی جائے۔ اس کے بعد ہی اسے ہوسٹنگ سرور پر اپ لوڈ کرکے اس کے ذریعے ویب سائٹ تیار کی جائے۔ فیچرز اور فنکشنز سے ناواقفیت کی وجہ سے آپ ویب سائٹ درست طریقے سے منظم نہیں کرپائیں گے۔

جملہ کا حصول
جملہ کا تازہ ترین ورژن آپ جملہ ڈاٹ آرگ سے ڈاؤن لوڈکرسکتے ہیں:
www.joomla.org

جملہ تین مختلف فارمیٹس (.tar.bz2، tar.gz اور zip)میں دستیاب ہے۔ آپ اپنی سہولت کے مطابق ان تینوں فارمیٹس میں سے کوئی بھی ایک ڈاؤن لوڈ کرلیں۔ چونکہ یہ تینوں فارمیٹ کمپریس فارمیٹ ہیں اس لئے ان فائلوں کو پہلے اَن کمپریس کرنا ہوگا۔ ZIP فارمیٹ کی فائل کو اَن کمپریس کرنے کے لئے آپ کو وِن زپ یا وِن رار درکار ہوگا۔ اس کے علاوہ ونڈوز کا اپنا اَن کمپریسر بھی اس کو اَن زپ کرسکتا ہے۔ لیکن tar.bz2 اور tar.gz کو اَن کمپریس کرنے کے لئے آپ کو سیون زپ یا وِن رار ہی درکار ہوگا۔ آپ یہ دونوں سافٹ ویئر بالترتیب مندرجہ ذیل ویب سائٹس سے ڈاؤن لوڈ کرسکتے ہیں۔
7-Zip | Download 7-Zip software for free at SourceForge.net
WinRAR archiver, a powerful tool to process RAR and ZIP files

tar.bz2 فارمیٹ کی فائل سب سے کم سائز یعنی 2.8 میگا بائٹس کی ہے۔ جبکہ ZIP فائل کا سائز سب سے زیادہ یعنی 4.81 میگا بائٹس ہے۔ جملہ ڈاؤن لوڈ کرنے کے بعد اب آپ اسے کسی فولڈر میں ان کمپریس کرلیں۔ جملہ حاصل کرلینے کے بعد باری آتی ہے جملہ انسٹالیشن یا تنصیب کی۔ جس کے متعلق کسی اگلے سبق میں بتایا جا ئے گا۔

اردو نامہ فورم سے چاند بابو کی کاوش

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com

عبدالقدوس

میرے خیال سے یہ کمپیوٹنگ کا مضمون ہے اردونامہ کا نہیں

یاسر عمران مرزا

ہو سکتا ہے کمپیوٹنگ کا ہی ہو اور اردونامہ والوں نے شئر کر رکھا ہو ۔

عبیداللہ عبید

یاسر بھائی اس آرٹیکل کے بارے میں دو باتوں کی وضاحت چاہتاہوں اگر آپ کے علم میں ہو تومہربانی فرماکر جواب سے نوازیں :

1: کیا مائیکروسافٹ شیئر پوائنٹ سرور کسی لنک سے یا مارکیٹ میں مل سکتا ہے ؟؟

2: اس آرٹیکل کے آخر میں مضمون نگار نے آئندہ سبق پیش کرنے کا جو وعدہ کیاتھا کیا وہ اس نے پورا کیاہے ؟ اور کہاں ہے وہ سبق ؟؟

یاسر عمران مرزا

عبید بھائی، شئر پوائنٹ کے متعلق میری معلومات صفر سے بھی کچھ نیچے ہی ہیں۔
اور مضمون نگار نے اپنا وعدہ فی الحال تو نہیں پورا کیا۔ اگر کیا تو میں ضرور شئر کر دوں گا۔

عبیداللہ عبید

جزاک اللہ یاسر بھائی ۔

اللہ تعالیٰ آپ کے علم میں اضافہ فرمائے ۔شکریہ

ویسے حسن مغل بھائی اس سلسلے میں کچھ درک رکھتے ہوں گے یا نہیں کیونکہ ویب ایکسپریشن اور دیگر ایم ایس پروڈکٹس برتتے چلے آرہے ہیں ۔؟؟کیا خیال ہے ان کو ایک ذاتی پیغام ارسال کروں اس سلسلے میں ؟

یاسر عمران مرزا

بالکل اگر کوئی معلومات ملے تو اسے ضرور فورم پر شئر کریں تا کہ سب کا بھلا ہو سکے۔

عبیداللہ عبید

ضرور ، جس سے کچھ سیکھا جائے اس کا بھی حق بنتا ہے

حسن مغل

السلام علیکم،

اس دھاگے کی طرف میری توجہ عبیداللہ بھائی نے مبذول کروائی ہے۔ شیئرپوائینٹ سرور بنیادی طور پر انٹرانیٹ کے لیئے بنایا گیا ہے۔ لیکن اسے انٹرنیٹ پر بھی استعمال کیا جاتا ہے۔ یہ صرف سی ایم ایس نہیں ہے پورا سرور ہے جوکہ آفس فائلز شیئرنگ، ویب پیجز اور اس طرح کے کئی کام سرانجام دینے کے لیئے بنایا گیا ہے۔ اس سرور کے استعمال کنندگان بڑی بڑی فرمز ہیں۔ اسکو استعمال کرنے کے لیئے آپکو ونڈوز سرور انسٹال کرنا ہوگی۔ تازہ ترین ورژن 2010 ہے جوکہ ونڈوز سرور 2008 آر2 پر انسٹال ہوتا ہے۔ مطلب یہ کہ 64بٹ۔ اسی کا ہم پلہ سافٹ ویئر ایکسچیج سرور ہے جو کہ کام ایسے ہی کرتا ہے لیکن اسکا استعمال ای میلز وغیرہ کے لیئے ہے۔


مزید معلومات کے لیئے ربط ملاحظہ فرمائیں Collaboration Software for the Enterprise - SharePoint 2010

__________________

کام / نیٹ / او آر جی

حسن مغل

مجھے بھی یہی شک پڑرہا ہے۔ جہاں تک میری یادداشت کام کررہی ہے یہ تو امانت بھائی کا مضمون ہے۔

عبیداللہ عبید

حسن بھائی ! وہ تو یاسر صاحب نے آرٹیکل کے آخر میں اس فورم کا حوالہ دیا ہے جہاں سے اس نے یہ نقل کیا ہے ۔خود ان کو بھی علم نہیں تھا کہ یہ کس کا ہے

یاسر عمران مرزا

دراصل یہ مضمون عجیب کچول مچول کا شکار ہوا ہے۔ مجھے نہیں پتہ اس کا اصل ماخذ کونسا ہے۔ تاہم میں نے اسے اردو نامہ سے لیا۔ اور میں نے دیکھا کہ اس میں کچھ بے ربطگی ہے تو میں نے اسے خود بھی کچھ ایڈجسٹ کیا۔۔۔۔

یاسر عمران مرزا

جی شکریہ حسن بھائی مفید معلومات کے لیے۔
لیکن اگر ہم شئر پوائنٹ سرور سیکھنا چاہیں تو کیا ایسا ممکن ہے کہ ہم بغیر اسے اپنے پاس انسٹال کیے سیکھ سکیں ؟
مائکروسافٹ والے ورچوئل لیب کی سہولت دیتے تھے کچھ پراڈکٹس کے لیے ، پتہ نہیں اس کے لیے دستیاب ہے کہ نہیں۔
اگر شئر پوائنٹ کے لیے پہلے انوائرمینٹ بنانا پڑتا ہے تو مطلب اکیلا بندہ اس سے کوئی فائدہ نہیں اٹھا سکتا۔ فرم نے انسٹال کیا ہو تب ہی یہ کام آ سکتا ہے۔

محمدخلیل

آپ کے پاس بہت سی معلومات ہیں ۔۔۔۔۔۔۔۔تو پلیز پاک نیٹ پر لازمی شئیر کریں

عبیداللہ عبید

شکریہ حسن بھائی ۔ امید ہے کہ آپ وقتا فوقتا اس پر روشنی ڈالتے رہیں گے