پاکستانی فوج نے وزیرستان میں آپریشن شروع کردیا- لوگوں نے اپنے گھروں سے نقل مکانی شروع کردی ہے- ڈیرہ اسماعیل خان میں آنے والوں نے انتظامات ناقص ہونے کی شکایت کی ہے۔
ایسے حالات میں جب ملک بھر میں خودکش حملوں کا اور فوج پر حملوں کا سلسلہ جاری ہے، کیا وزیرستان آپریشن مطلوبہ نتایج حاصل کرسکتا ہے، جبکہ شدت پسند ایک سے دوسرے علاقے بھاگ کر پناہ لے لیتے ہیں۔ نقصان صرف عام لوگوں کا ہوتا ہے جن کا اس سارے معاملے سے کوئی تعلق ہی نہیں ہوتا- یہ بھی عجیب ستم ظریفی ہے کہ دو تین ہفتے پہلے سے آپریشن کا ڈھنڈورا پیٹا جاتا ہے جس سے شدت پسند ہوشیار ہوجاتے ہیں۔
اس سے پہلے بھی وزیرستان میں آپریشن کیے گیے، لیکن نہ تو شدت پسندوں کے ٹھکانے ختم کیے جاسکے نہ ان کے حملے روکے جا سکے۔ ہر بار آپریشن سے پہلے یہ لوگ دوسری ایجنسی میں چھپ جاتے ہیں۔
کیا یہ بہتر نہ ہوگا کہ روایتی طریقوں کی بجایے انٹلیجنس کو بہتر بنا کر ان شدت پسندوں پر قابو پانے کی کوشش کی جایے- کیونکہ یہ لوگ روایتی طریقوں سے جنگ نہیں لڑ رہے-

دوسری اہم بات جس کی طرف ہماری حکومت توجہ نہیں دے رہی، وہ یہ ہے کہ افغان سرحد عبور کر کے پاکستان کے قبائلی علاقوں میں آجاتے ہیں- لیکن کوئی بھی افغان حکومت کے سامنے اس معاملے کو نہیں اٹھارہا-