طالبان کی حقیقت کے بارے میں رائے عامہ یکسو نہیں ہے۔ کیا پاکستان اور افغانستان کے طالبان ایک ہیں۔ ان کے مقاصد کیا ہیں۔ کیا یہ بیرونی آلہ کار ہیں، کیا یہ اسلامی شریعت کو نافذ کرنا چاہتے ہیں، کیا یہ سب ایک ہی فکر کے حامل ہیں یا مختلف الخیال گروہ محدود مقاصد کے لئے آپس میں مل گئے ہیں۔ سوات، دیر، باجوڑ اور دوسرے قبائلی علاقوں سے تقریباً پچاس لاکھ لوگوں کا انخلاء اور ان کو دوبارہ اپنے گھروں میں آباد کرنے کی مشق کے نتیجے میں صوبہ سرحد کا نصف سے زیادہ علاقہ شدید معاشی بحران کا شکار ہو گیا ہے۔ ہزاروں بے گناہ لوگ فوت ہوچکے ہیں، اربوں روپے کی جائیداد اور فصلیں تباہ ہوچکی ہیں اور آپریشن اب تک جاری ہے اور اس کے خاتمے اور علاقے کے دوبارہ پر امن ہونے کے امکانات اب تک مفقود ہیں۔

سوات کے بعد اب وزیرستان میں بڑے پیمانے پر آپریشن کی تیاریاں ہو رہی ہیں۔ جس کی تباہ کاریوں اور مشکلات کا تصور بھی رونگھٹے کھڑے کرنے والاہے۔ کتنی بدنصیبی ہے کہ جس علاقے کو پاکستان کی حفاظت کے لئے ایک مضبوط قلعہ کے طور پر استعمال کیا جاسکتاہے ہماری حکومت کی عاقبت نااندیشی کی وجہ سے وہاں کے لوگوں کو خود اپنی فوج سے لڑانے کے منصوبے سوچے جا رہے ہیں۔ وزیرستان میں سطح زمین کی ناہموار ی اور دشوار گزاری اجنبی کے لئے پھندا ،دام اور جال ثابت ہوسکتاہے اور مقامی جنگجو قبائل کے لئے کمین گاہ ہے، ایسے قبائل کا مسکن ہے جن کے خون میں گوریلا جنگ کے طور طریقے نسل در نسل منتقل ہوتے چلے آ رہے ہیں۔ جنگ میں نقصانات برداشت کرنے کے حوصلے میں ان کی پوری دنیا میں کوئی مثال نہیں ہے۔

آج تک انہیں اپنے علاقے میں کوئی شکست نہیں دے سکا۔ اسی علاقے کے وزیر اور محسود قبائل نے بھارتی فوج سے لڑکر کشمیر کے ایک حصے کو آزاد کرا لیا تھا اوراگر انہیں واپسی کا حکم نہ ملتا تو یہ سرینگر کے ایئرپورٹ تک پہنچ چکے تھے۔ ان سے لڑنے اور انہیں دشمن کا آلہ کار بنانے اور اپنی فوج کو ان سے لڑا کر امریکا، بھارت اور اسرائیل کی آرزو پوری کرنے کی بجائے یہ معلوم کرنے کی ضرورت ہے کہ ان کے مقاصد کیا ہیں اور کیا ان کے ساتھ ہم آہنگی ملک و قوم کے مفاد میں ہے یا ان کے ساتھ لڑائی ملک و قوم کے مفاد میں ہے۔ ہمارے ملک کے ایک طبقے کا خیال ہے کہ طالبان دہشت گرد ہیں اور دہشت گردی کے خلاف جنگ پاکستان کے اپنے مفاد میں ہے اور ان سے لڑنے کے سوا ہمارے پاس کوئی چارہ نہیں ہے اور اگر ان کے سامنے ذرا کمزوری دکھائی گئی تو یہ ہماری پوری طرز زندگی کو بدل ڈالیں گے۔ اپنے طرز حیات اور تہذیب اور تمدن کو بچانے کے لئے اور خود پاکستان کو بچانے کے لئے ہمیں ان کے ساتھ جنگ کی بھرپور تیاری کرنی چاہئے اور ہر حال میں ہمیں اس جنگ کو جیتنے کی پوری منصوبہ بندی کرنی چاہئے۔ جہاں تک میں اس پورے علاقے اور اس کے لوگوں کو جانتا ہوں۔ پاکستانی فوج کے لئے ممکن نہیں ہے کہ وہ اس علاقے کے لوگوں کو مکمل طور پر زیر کر سکے اور پھر اس علاقے میں امن قائم کرسکے جب تک کہ وہ قوت کی بجائے سیاسی طریقے استعمال نہ کرے جن میں اولین ضرورت یہ ہے کہ اپنی خارجہ پالیسی تبدیل کر دے۔

اس میں شک نہیں کہ طالبان کو کہیں نہ کہیں سے ضرورمالی مدد اور وسائل مل رہے ہیں لیکن یہ کہنا صحیح نہیں ہے کہ طالبان اور ان کے پشتیبان قبائل سب کے سب بیرونی آلہ کار ہیں اور ان کے اپنے کوئی مقاصد نہیں ہیں۔

طالبان امریکہ اور امریکہ کی عریاں تہذیب کے دشمن ہیں۔ ہم میں سے جو لوگ کہتے ہیں کہ یہ ہمارے طرز زندگی اور بود وباش کے دشمن ہیں انہوں نے دراصل مغربی طرز زندگی اپنائی ہوئی ہے اور وہ مغربی طرز زندگی کو اپنا تمدن سمجھنے لگے ہیں۔ اگر ہمارا حکمران طبقہ اپنی یہ ذہنیت ترک کردے اور پاکستان کو ایک سیکولر ،لادین اور ایک خاص مراعات یافتہ طبقے کے مفادات کی حفاظت کرنے والی ریاست کی بجائے صدق دل سے ایک اسلامی ، جمہوری ، فلاحی ریاست بنانے کے لئے اقدامات کرنے کے لئے آمادہ ہوجائے تو طالبان کی مخالفت ختم کی جاسکتی ہے یا کم ازکم ان کی عوامی تائید میں کمی آسکتی ہے۔

امریکا کی منافقانہ دہری پالیسی اب کسی سے ڈھکی چھپی نہیں رہی ۔ تقریباً ایک ہزار امریکی میرینز کے لئے اسلام آباد میں قلعہ بند رہائش کا انتظام، ان کے لئے بلٹ پروف بکتر بند گاڑیاں اور اسلام آباد کے اردگرد حساس علاقوں میں ان کی سرگرمیاں، بدنام زمانہ بلیک واٹر تنظیم کے لئے کمانڈوزکی بھرتی، پشاور اور قبائلی علاقوں میں ان کی سرگرمیاں امریکا کی بدنیتی کو ظاہر کررہا ہے۔ امریکہ جتنی مد د کررہا ہے اس سے زیادہ ان کی جنگ کا ساتھ دے کر ہم اپنے ملک کی ترقی کی رفتار کو نقصان پہنچا رہے ہیں۔ سوات ،باجوڑ اور دیر میں جو تباہی ہوئی ہے کوئی بھی امریکی امداد کتنی بھی بڑی ہو اس کی تلافی نہیں کرسکتی۔

بھارت، اسرائیل اور امریکا کا گٹھ جوڑ اب کھل کر سامنے آ گیا ہے۔ یہ گٹھ جوڑ اسلام اور مسلمانوں کے خلاف ہے۔ یہ کسی بھی اسلامی ملک کو دفاعی لحاظ سے خود کفیل نہیں دیکھنا چاہتا۔ یہ ہمارے نیوکلیئر اور میزائل پروگرام کا مخالف ہے۔ یہ ہمیں آپس میں لڑا کر کمزور کرنا چاہتے ہیں۔ ہمارے عوام اور ہماری فوج کو ایک دوسرے کے خلاف صف آراء کرنا چاہتے ہیں اور اس کشمکش میں بالآخر پاکستان میں براہ راست مداخت کرکے ہمارے ٹکڑے کرنا چاہتے ہیں۔اس انجام سے بچنے کے لئے ہمیں اپنے عوام اور قبائل کو ساتھ لے کر ایک متحدہ قومی حکمت عملی اختیار کرنی پڑے گی۔

اگر ہم اسلامی نظریاتی کونسل کی سفارشات پر صدق دل سے عملدرآمد کرلیں اور ان سفارشات کی روشنی میں اپنے اداروں کی اصلاح اور تربیت کا انتظام کرلیں تو حکومت کے خلاف عوام میں بڑھتے ہوئے ردعمل کو کم کیا جاسکتاہے۔ ہمارے ملک میں تیزی سے دو طبقے تہذیبی تصادم کی طرف بڑھ رہے ہیں۔ اس تصادم کے نتیجے میں ہمارے ادارے بھی ٹوٹ پھوٹ کا شکار ہیں ، دونوں طرف انتہا پسندی ہے ۔ایک طبقہ مغرب کی عریاں تہذیب کو پاکستان میں زبردستی ٹھونسنے کی کوشش کررہاہے۔ اس طبقے کو ملٹی نیشنل کمپنیوں ،غیر ملکی این جی اوز اور ذرائع ابلاغ کا تعاون حاصل رہاہے۔

دوسری جانب ایک اور طبقہ پوری قوت سے اپنا اثر و رسوخ بڑھا رہاہے جس کو مسجد ،مدرسے ،دینی جماعتوں ،خطیبوں اور واعظوں کا تعاون حاصل ہے ۔ ملک کے غریب عوام معاشی تنگی اور بے روزگاری کا شکار ہیں۔

تعلیم یافتہ ذہین طبقے میں مغربی استعمار اور اس کی تہذیب کے خلاف ردعمل موجود ہے اور اس ردعمل اور اضطراب کی وجہ سے اس طبقے کی ایک بڑی تعداد بھی مغربی تہذیب کے مقابلے میں آ رہی ہے۔ قومی فوج کے اندر بھی یہ دونوں میلانات عروج پر ہیں۔ ملک کوایک خوفناک تصادم سے بچانے کے لئے ضروری ہے کہ عوام کے ساتھ پاکستان کی تحریک میں جو وعدے کئے گئے تھے حکمران ان پر پورے اترنے کی کوشش کریں ۔ یہ کہنا کہ محمد علی جناح پاکستان کو ایک جدید سیکولر ریاست بنانا چاہتے تھے مفید نہیں ہوگا کیونکہ محمد علی جناح کے ساتھ برصغیر ہندو پاک کے کروڑوں عوام نے سیکولر ریاست قائم کرنے کے لئے تعاون نہیں کیا بلکہ ان کو اسلام کا وکیل سمجھ کر ان کے ساتھ تعاون کیا۔ عوام کے ساتھ دھوکہ کرنے کی بجائے عوامی امنگوں اور تمناؤں پر پورا اترنے کی ضرورت ہے اور قرارداد مقاصد پر صدق دل سے عمل کرنے کی ضرورت ہے ۔ اس طرح پاکستانی فوج اور پاکستانی عوام میں ہم آہنگی اور یکجہتی پیدا کی جا سکتی ہے۔ امریکہ کے ساتھ ہماری حکومت کا اتحاد غیر فطری ہے ۔

ہمارے قومی مفاد ات اور مصلحتیں امریکہ کے مفادات کے ساتھ ٹکراتی ہیں۔ ہماری قیادت جتنی جلد اس کا ادراک کرے اور اپنی سمت کو درست کرلے اتنا ہی ملک کے مفاد میں ہے۔ اپنے ہر مخالف کو ملک دشمن اور وطن دشمن قرار دینا اورحقائق سے آنکھیں چرانا ہمیں تباہی کی طرف لے جا رہا ہیں۔ وزیرستان میں آپریشن کے لئے لنگر لنگوٹ کسنے کی بجائے متبادل پالیسیوں پر غورکرنا وقت کی آواز ہے۔

http://www.alarabiya.net/views/2009/09/04/83892.html

__________________
محتاج اصلاح و دعا