حمید نظامی ہال میں ہونے والا مذاکرہ انسانی ہمدردی اور دفاع پاکستان کا عملی نمونہ پیش کر رہا تھا۔ میں وہاں پہنچی تو ہال کھچا کھچ بھرا ہوا تھا، تل دھرنے کی جگہ نہ تھی لوگ کھڑے ہو کر خطاب سن رہے تھے۔ یہ سب لوگ دفاع پاکستان، جذبہ حب الوطنی اور شہیدوں کے ورثا کے ساتھ اظہار یکجہتی کرنے کے لئے جمع تھے، فضا نعروں سے گونج رہی تھی۔ نعرہ تکبیر، اللہ اکبر، بھارت اور امریکہ کا جو یار ہے غدار ہے، غدار ہے، پاکستان زندہ باد۔ ہال میں موجود ورثاءشہداءاور قیدیوں کے لواحقین کے تاثرات سن کر مذہبی و سیاسی قائدین اور سینکڑوں حاضرین مجلس اپنے جذبات پر کنٹرول نہ رکھ سکے اور زار و قطار رو دیئے۔ ایک مرتبہ پھر فضا نعروں سے گونج اٹھی، سربجیت سنگھ کو پھانسی دو، سربجیت سنگھ کو پھانسی دو۔
سوال اٹھتا ہے یہ سربجیت سنگھ ہے کون؟
سربجیت سنگھ ”را“ کا ایجنٹ اور پاکستان میں دہشت گرد بم دھماکے کرنے والوں کا ماسٹر مائنڈ ہے۔ بھارتی جاسوس، بیسیوں لوگوں کا قاتل اور 4 بم دھماکوں کا مجرم! یہ ہے وہ دہشت گرد جس نے 1990ءکو پہلا بم دھماکہ لاہور کے پررونق بازار انار کلی کے بھاٹی گیٹ میں پچھلے پہر کیا، اس وقت رش ہونے کی وجہ سے بچوں اور عورتوں کے چیتھڑے اڑ گئے اور کئی لوگ زخمی ہو ئے۔ دوسرا بم دھماکہ بیرون دہلی دروازہ عین افطاری کے وقت ہوا، افطاری کے وقت رش کی وجہ سے 5 افراد شہید اور 50 افراد زخمی ہوئے۔ تیسرا بم دھماکہ لاہور ریلوے اسٹیشن سے غازی آباد جانے والی بس میں ہوا جس میں 8سالہ بچہ شہید اور 30 افراد زخمی ہوئے۔
یکے بعد دیگرے ان ہونے والے بم دھماکوں سے خفیہ ایجنسیاں اور حکومتی ادارے سرگرم عمل ہوئے، بالآخر ان بم دھماکوں کا مجرم قصور بارڈر کراس کرتے ہوئے پکڑا گیا۔ تحقیقات پر پتہ چلا کہ یہ سربجیت سنگھ ہے ،جسے بھارتی ایجنسی ”را“ نے خصوصی مشن دے کر بھیجا ہے۔ اس کے دہشت گرد ثابت ہونے پر انسداد دہشت گردی کی خصوصی عدالت نے اسے سزائے موت دینے کا حکم دیا، اس کے بعد لاہور ہائی کورٹ اور سپریم کورٹ نے بھی دلائل و شواہد کی وجہ سے سزائے موت کو برقرار رکھا اور اب 20سالوں سے وہ لاہور کی کوٹ لکھپت جیل میں قید ہے۔
سربجیت سنگھ کا یہ معاملہ اس وقت پھر سے جاگ اٹھا جب اس دہشت گرد کی بہن دلبیر کور اسے چھڑوانے پاکستان آئی۔ زخمی دلوں سے پھر خون رسنے لگا، خون سے رنگین گلیاں بازار پھر سے چیخ اٹھے، بے گناہ اور معصوم لوگوں کی جانوں سے کھیلنے والا ان کے خون سے ہاتھ رنگنے والا یہ بھارتی خونی درندہ کیسے چھوڑ دیا جائے، اس کی بہن دلبیر کو رکے حوالے کیوں کیا جائے؟ کیا وہ جانتی ہے؟ ہاں وہ جانتی ہے! کہ اس کے بھائی نے کتنی بہنوں کے بھائی چھین لئے، کتنی ماﺅں کی گودیں خالی کر دیں، کتنے بچے شفقت پدری سے محروم ہو گئے، کئی گھروں کے چراغ گل ہو گئے۔ اے دلبیر کور! اس ماں کی دکھ بھری کہانی سن جس کا گیارہ سالہ چاند جیسا معصوم بچہ بلال مصطفی اس بم دھماکے کی نذر ہو گیا جو تیرے اس سفاک بھائی نے کیا۔ بلال مصطفی کی والدہ محترمہ شازیہ بی بی سے اس کے لخت جگر کے بارے میں سوال کیا تو اس کی آواز کانپ رہی تھی الفاظ زبان کا ساتھ نہیں دے رہے تھے۔ گلوگیر لہجے میں بات کرتے ہوئے کہنے لگیں ہم رات کو ہونے والے فنکشن کی تیاریاں کر رہے تھے۔ میں نے بچے کے جوتے پالش کئے، کپڑے تیار کئے، میرا بچہ اپنے باپ سے باہر جانے کی اجازت مانگ رہا تھا۔ باپ نے منع کیا، بیٹے کے اصرار کرنے پرباپ نے اجازت دے دی، ڈرتے ہوئے دل سے باپ نصیحتیں کر رہے ہیں بیٹا ادھر نہ جانا ادھر رش والا علاقہ ہے۔
کچھ دیر تک میرا لعل واپس نہ لوٹا تو تشویش لاحق ہوئی ڈھونڈنے نکلے تو پتہ چلا کہ بھاٹی کے بازار میں بم دھماکہ ہوا ہے لوگ اپنے عزیزوں کو دیکھنے کے لئے ادھر ادھر بھاگ رہے تھے، قیامت صغریٰ برپا تھی، میرا بچہ کہیں نہ ملا، ہسپتال کا رخ کیا وہاں کٹی پھٹی لاشیں پڑی تھیں، یہ دیکھ کر دل غم سے پھٹ گیا، حوصلہ مجتمع کرتے ہوئے گویا ہوئیں، میں نے اپنے بیٹے کی لاش کو پاﺅں سے دیکھ کر پہچانا، میں رنجور دل اور پھٹی ہوئی آنکھوں سے اس شہید کی ماں کو دیکھ رہی تھی، اس عزم و ہمت کی چٹان کو جس نے اپنے لخت جگر کو اس حالت میں دیکھا، پھر بھی زندہ ہے۔ جی ہاں! یہ صبر مومن کی پہچان ہے اس نے اسے زندہ رکھا آخرت میں اجر پانے کے لئے۔
لیکن ان کا مطالبہ ہے کہ میرے معصوم بچے اور کئی لوگوں کے قاتل سربجیت سنگھ کو فی الفور پھانسی دی جائے۔ اعلیٰ تعلیم یافتہ شازیہ بی بی بلال مصطفی شہید کی والدہ لاہور کالج کی سابقہ پرنسپل ہیں۔ پیپلز پارٹی آف وومن کی صدر اور ناظم کی حیثیت سے بھائی کے علاقے میں اپنی خدمات پیش کر چکی ہیں۔آج بیٹے کے غم نے انہیں دل کی مریضہ بنا دیا ہے۔ دلبیر کور آج بھائی سے ملاقات کے وقت تو اپنے بھائی کی کلائی پر راکھی باندھ رہی ہے۔ وہ راکھی کا دھاگہ جو تیرے مذہب کے مطابق حفاظت کا ضامن سمجھا جاتا ہے۔ اس کچے دھاگے سے تو اپنے بھائی کی زندگی کی ڈور باندھ رہی ہے اور زرداری سے اس کی رہائی کی بھیک مانگ رہی ہے۔ انصاف کا تقاضا چاہتی ہے تو سن! کان کھول کر سن!
بلال مصطفی شہید اور ان جیسے کئی معصوم شہیدوں کی بہنیں جو اپنے بھائیوں کے لئے سلامتی کی دعائیں کیا کرتی تھیں، وہ بھی انصاف مانگ رہی ہیں، جنہیں تیرے دہشت گرد اور سفاک بھائی نے بم دھماکہ کر کے خاک و خون میں ڈبو دیا، ان کے بھائی انہیں گوشت بھری گٹھڑیوں میں وصول ہوئے کیا قصور تھا ان کا؟
بتا کیا قصور ہے؟
ہاں تجھے انصاف دینا چاہتے ہیں، تیرا بھائی تجھے لوٹاتے ہیں، اسی صورت میں جس صورت میں تیرے بھائی نے ہمارے بھائیوں کو لوٹایا۔ تمہارا ہی نہیں یہ ہمارا بھی مطالبہ ہے، زرداری سے اور تمام حکام سے کہ وہ انصاف کے تقاضے جلد از جلد پورے کریں۔
جناب زرداری صاحب! کہیں وہ کشمیر سنگھ والا کردارنہ دہرانا، جسے پرویز مشرف کے دور میں ہیومن رائٹس کے وزیر انصاف برنی نے پھول کے ہارپہنا کر 4 مارچ 2008ءکو رہا کر دیا۔ کشمیر سنگھ بھارتی دہشت گرد اور جاسوس تھا۔ اسے بھگاتے ایک ہفتہ بھی نہ گزرا تھا کہ 11 مارچ 2008ءکو بھارت نے خالد محمود میو کی لاش پاکستان کو تحفے کے طور پردی، بھارتی حکومت نے گھناﺅنا اور شرم ناک مذاق کیا جو حقوق انسانی کے علمبرداروں کے منہ پر طمانچہ تھا۔
خالد محمود کی بوڑھی اور بزرگ والدہ رو رو کر اپنے بیٹے کے ساتھ ہونے والے بھارتی ظلم کی داستان سنا رہی تھی کہ میرا بیٹا کرکٹ میچ دیکھنے کے لئے انڈیا گیا، وہاں اسے گرفتار کر لیا گیا، کوئی جرم ثابت نہیں ہوا پھر بھی اسے مار دیا گیا۔ لاش کی صورت میں لوٹا دیا گیا، اسے دیکھا تو گلہ کٹا ہوا تھا میرے لخت جگر کے ناخن پلاس کے ساتھ کھینچ لئے گئے تھے اور ان کے مردہ جسم سے دماغ نکال لیا گیا، آنکھیں نکال لی گئیں جگر اور دیگر عضو نکال لئے گئے تھے۔ خالد محمود میو شہید کی والدہ کریمن بی بی نے کہا کہ بھارت ہمارے بے گناہ بچوں کی لاشیں پاکستان بھیجتا ہے، ہمارے سینے چھلنی ہیں، وہ اپنے بیٹے کی تصویر کو سینے سے لگائے انصاف مانگ رہی ہے، اس کا درد ناقابل بیان ہے۔ جی ہاں! یہ ہیں امن کی آشائیں جن کا ڈھنڈورہ پیٹتے ہوئے یہ بھارت کی طرف سے ظلم و بربریت سے بھرے تحفے انسانی حقوق کی تنظیموں کو تو منظور ہوں گے لیکن ان ماﺅں اور بہنوں کو منظور نہیں جن کے لخت جگر اور ویراس ظلم کا شکار ہو گئے۔ ان دکھی ماﺅں اور بہنوں کے ساتھ ”جرار“ کی قارئین مائیں اور بہنیں بھی اس ظلم کے خلاف آواز بلند کرتی ہیں، جو پاکستان دفاع فورم کے حوالے سے ہے جس کے کنونیئر امیر حمزہ صاحب ہیں۔ آج اس پلیٹ فارم سے ہم سب یہ کہتی ہیں کہ سربجیت سنگھ کو فی الفور پھانسی دو جو حالیہ تاریخ کا سب سے پہلا دہشت گرد ہے پاکستان میں ہونے والی تمام دہشت گردی کا سرا اسی سے جڑا ہوا ہے، پاکستان میں اب تک 7000 لوگ دہشت گردی کی وجہ سے لقمہ اجل بن چکے ہیں اور 48 بے گناہ پاکستانی اپنی سزا ختم ہونے کے باوجود بھارت کی جیلوں میں پڑے اذیت سے دوچار ہیں۔ اے زرداری تیرے پاس دلبیر کور آئی ہے، انصاف کی بھیک مانگنے، اسلامی جمہوریہ پاکستان کے صدر آصف علی زرداری تیری پیپلز پارٹی کے لئے اپنی خدمات پیش کرنے والی محترمہ شازیہ بی بی کا دل چکنا چور ہے، اس ظلم کی وجہ سے جو سربجیت سنگھ نے ڈھایا بلال مصطفی کی بہنیں دروازہ کھولے راہ تک رہی ہیں اپنے بھائی کا، مگر دلبیر کور کے بھائی نے اسے ایسی جگہ پہنچا دیا جہاں جانے والے لوٹ کر آیا نہیں کرتے۔
اب دیکھنا یہ ہے! آصف علی زرداری صاحب دلبیر کا ساتھ دیتے ہیں یا ان مظلوم ماﺅں اور بہنوں کا جن کے بچے اور بھائی اس ظالم نے ان سے چھین لئے اور وہ تڑپتی سسکتی رہی گئیں، اگر ان مظلوموں کا ساتھ دیا تو دنیا و آخرت میں سرخرو ہو جائے گا۔ اسلام میں دہشت گرد اور قاتل کی کوئی معافی نہیں اور تو کسی صورت اسے معاف نہیں کر سکتا۔ دلبیر کور اور دہشت گرد کا ساتھ دینے کی صورت میں دنیا اور آخرت میں ذلیل و رسوا ہو جائے گا۔ قیامت والے دن ان متاثرہ ماﺅں اور بہنوں کے ساتھ انسانی ہمدردی رکھنے والی دفاع پاکستان فورم کی تمام بہنیں تیرا گریبان پکڑیں گی۔ کوئی چھڑانے والا نہ ہو گا، وہ قیامت والا دن جس دن ہر ظلم کا حساب چکانا ہو گا اور جہاں تک ہماری بات ہے تو ہم ظلم کے خلاف آواز اٹھاتے رہیں گے، اللہ تو ہماری مدد فرما، اے اللہ ہماری مدد فرما، آمین ثم آمین۔




بشکریہ۔۔۔ ہفت روزہ جرار
والسلام ۔۔۔۔۔ سعد اوڈراجپوت
saad oadrajput