ملک کے 33جید علمائے کرام نے معصوم افراد، کلمہ گو مسلمانوں بلکہ غیر مسلم ہم وطنوں کے خلاف خودکش حملوں کو حرام قرار دینے کے بعد جو سوالات اٹھائے تھے، دو سال بعد بھی ان کا کوئی واضح جواب سامنے نہیں آیا۔ وہ سوال آج بھی جو ں کے توں پھن پھیلائے کھڑے ہیں۔ کیا وجہ ہے کہ نائن الیون سے قبل پاکستان میں ایک بھی خودکش حملے کی واردات نہیں ہوئی؟ کیا وجہ ہے کہ اب ارض وطن کے گوشے گوشے سے یہ فصل اگنے لگی ہے؟ 33علمائے کرام نے کہا تھا کہ …“ مسئلہ صرف ان حملوں کی مذمت سے حل نہیں ہوگا…یقینا اس کے کچھ اسباب ہیں جنہیں دور کئے بغیر محض ایسے لوگوں پر غصے سے دانت پیس کر تشدد کی فضا کو اور ہوا دینے سے یہ صورتحال ختم نہیں ہوسکتی۔ اگر ہم واقعی اس صورتحال کو ختم کرکے ملک میں امن امان بحال کرنے میں مخلص ہیں تو ہمیں پوری حقیقت پسندی کے ساتھ اپنی پالیسیوں پر تنقیدی نگاہ ڈالنا ہوگی اور جو غلط پالیسیاں اس کا سبب بنی ہیں، انہیں تبدیل کرنے کا حوصلہ پیدا کرنا ہوگا“۔ علمائے کرام نے یہ نتیجہ اخذ کیا تھا کہ خودکش حملے حکومت کی سنگین غلط کاریوں کا ردعمل ہیں۔ دستاویز کے آخر میں علمائے کرام نے دس ٹھوس تجاویز بھی پیش کی تھیں جن پر عملدرآمد ان کے خیال میں دہشت گردی کی لہر اور خودکش حملوں کی روک تھام کرسکتا تھا۔
مجھے پختہ یقین ہے کہ یہ دستاویز رحمن ملک صاحب کی نظر سے نہیں گزری ہوگی۔ انہیں اس فتوے کا بھی علم نہیں ہوگا جو کم و بیش پانچ سال قبل مفتی منیب الرحمن کی معیت میں پچاس سے زائد علماء نے جاری کیا تھا اور حکومت کو کچھ صائب مشورے بھی دیئے تھے۔ رحمن ملک نے علمائے کرام سے ملاقاتوں کا آغاز دارالعلوم کراچی سے کیا جہاں ان کی ملاقات مفتی محمد رفیع عثمانی اور مفتی محمد تقی عثمانی سے ہوئی۔ یقینا وزیر داخلہ کو یہ بھی خبر نہیں ہوگی کہ ان دونوں انتہائی محترم اور وقیع علمائے کرام کی نپی تلی رائے کئی بار سامنے آچکی ہے۔ اوپر جس دستاویز کا ذکر کیا گیا ہے اس پر دستخط کرنے والے 33علماء میں یہ دونوں حضرات بھی شامل تھے۔ فروری 2008ء کے انتخابات کے بعد پیپلز پارٹی کی قیادت میں نئی جمہوری حکومت قائم ہوئی۔ ستمبر 2008ء میں زرداری صاحب کے منصب صدارت سنبھالنے کے بعد 9اکتوبر 2008ء کو تمام مکاتب فکر کے 64علمائے کرام نے ارکان پارلیمینٹ سے دردمندانہ اپیل کے عنوان سے ایک مراسلہ ارکان پارلیمینٹ اور اہم حکومتی عہدیداروں کو بھیجا۔ اس مراسلے میں دہشت گردی اور متعلقہ معاملات کا نہایت گہری نظر سے جائزہ لیا گیا تھا اور خودکش حملوں کو ایک بار پھر حرام قرار دیا گیا تھا۔ علاج کے عنوان سے علمائے کرام نے آٹھ تجاویز پیش کی تھیں جن میں سے ایک یہ تھی کہ …”ہر علاقے کے مقامی علماء دین دار حضرات اور محب وطن عمائدین کو ساتھ ملا کر جرائم پیشہ اور ملک دشمن عناصر اور غیر ملکی ایجنٹوں کو پکڑا جائے اور ان کو سرعام عبرت ناک سزائیں دی جائیں“۔ اس مراسلے پر بھی مولانا محمد سرفراز خان صفدر، ڈاکٹر عبدالرزاق سکندر، مولانا سلیم اللہ خان، مفتی محمد رفیع عثمانی، مفتی محمد تقی عثمانی، وفاق المدارس سلفیہ کے ناظم اعلیٰ مولانا نعیم الرحمن، وفاق المدارس شیعہ کے صدر حافظ ریاض حسین نجفی، وفاق المدارس العربیہ کے ناظم اعلیٰ قاری حنیف جالندھری، تنظیم المدارس اہلسنت پاکستان کے صدر مفتی منیب الرحمن اور رابطتہ المدارس الاسلامیہ پاکستان کے صدر مولانا عبدالمالک کے دستخط ثبت ہیں۔ ملک کا شاید ہی کوئی قابل ذکر عالم دین، چونسٹھ علما کی اس فہرست میں شامل نہ ہو۔
اب رحمن ملک جانے کس سفر پہ نکلے ہیں؟ 17دسمبر کو انہوں نے علماء کے ایک اجلاس کا اہتمام کیا ہے۔ ملک صاحب کو شاید خبر نہیں کہ سرکار کے زیراہتمام سجنے والے درباروں کے فتوے زیادہ معتبر نہیں ہوا کرتے۔ پانچ ستارہ ہوٹلوں میں آسائشوں سے مستفید ہوکر سرکار کے سوکھے دھانوں کی برکھا بننے والوں کی کون سنتا ہے؟ بنیادی بات وہی ہے جو علمائے کرام مسلسل سمجھاتے چلے آئے ہیں اور وہ یہ کہ افغانستان پر امریکی حملے اور اس کے اثرات و نتائج کا سنجیدگی سے جائزہ لیا جائے۔ ان محرکات کا ازالہ کیا جائے جو لوگوں کے جذبات بھڑکا رہے ہیں، انتقام اور اشتعال کو ہوا دے رہے ہیں، نوجوان ذہنوں کو گمراہی کے لئے تیار کررہے ہیں اور مرنے مارنے کے جنوں کی تخم ریزی کررہے ہیں۔
رحمان ملک صاحب کو یہ پہلو بھی پیش نظر رکھنا چاہئے کہ مشرف نے علمائے کرام اور دینی مدارس کے خلاف جو مخاصمانہ رویہ اختیار کیا تھا، وہ ابھی تک جاری ہے۔ آج بھی دہشت گردی کی کڑیاں ان مدارس سے ملائی جاتی ہیں۔ آج بھی ان علمائے کرام کو دہشت گردوں کا ہمدرد قرار دیا جاتا ہے جو لگی لپٹی رکھے بغیر خودکش حملوں اور دہشت گردی کی مخالفت کررہے ہیں۔ جو خود اس کا لقمہ بن رہے ہیں۔ کیا رحمن ملک نہیں جانتے کہ مولانا حسن جان اور ڈاکٹر سرفراز نعیمی کا لہو کس کے سر ہے؟ علماء کا کوئی ایک بھی مکتب فکر دہشت گردی کی پشت پر نہیں لیکن ان کی پشت پر پیہم تازیانے برستے رہتے ہیں۔ کراچی میں پریس سے گفتگو کرتے ہوئے رحمان ملک نے انہیں ”ہمارے پیارے علماء“ کہہ کر پکارا۔ یہ پیارے علما حقیقی دہشت گردی کے خاتمے اور خودکش حملوں کی حوصلہ شکنی کے لئے عظیم کردار ادا کرسکتے تھے بشرطیکہ انہیں اعتماد میں لے کر، شریک مشاورت رکھا جاتا۔ انہیں ایک موثر کردار سونپا جاتا، انہیں متحرک کیا جاتا۔ صورتحال یہ ہے کہ ”پیارے علماء“ کے دینی مدارس کی رگ جاں دبوچنے کے لئے آج بھی کئی قدغنیں ہیں۔ وہ شدید مالی مشکلات سے دوچار ہیں اور انتہائی کٹھن حالات میں اپنے چراغ روشن رکھے ہوئے ہیں۔ رحمان ملک صاحب اپنے ”پیارے علماء“ سے خودکش حملوں کے خلاف قرآن و سنت کی رہنمائی چاہتے ہیں لیکن کیا انہیں معلوم ہے کہ قرآن کریم اور اسوہ رسول کی نورانی تعلیمات اور کس کس شعبے میں رہنمائی فراہم کرتی ہیں؟
حالت یہ ہے کہ ہم عملاً امریکی کالونی بن چکے ہیں۔ گزشتہ روز لاہور میں امریکی گاڑیوں کا گشت اور حکومتی بے بسی ہمارے بے چارگی کا ایک اور نوحہ تھی۔ اسلام آباد میں ایسی وارداتیں معمول بن چکی ہیں۔ سہالہ کالج میں تعمیرامریکی قلعے کی طرف کوئی آنکھ اٹھا کر نہیں دے سکتا۔ دو دن قبل ایک ریٹائرڈ پاکستانی جرنیل نے انکشاف کیا کہ مشرف نے فوج کو اعتماد میں لئے بغیر جیکب آباد کا ہوائی اڈہ امریکیوں کو دے دیا تھا۔ آج وہاں بھی پختہ امریکی عمارات بن گئی ہیں اور ہماری فوج بھی ادھر کا رُخ نہیں کرسکتی۔ گزشتہ روزہی وزیر دفاع احمد مختار نے ایک ٹی وی پروگرام میں انکشاف کیا کہ امریکہ، جیکب آباداور پسنی کے ہوائی اڈے کسی باضابطہ معاہدے کے بغیر استعمال کررہا ہے۔ تربیلہ کے آس پاس کیا ہورہا ہے؟ ڈرون حملے ہزاروں پاکستانیوں کا لہو پی چکے ہیں اور پی رہے ہیں۔ ہم ایک امریکی گاڑی کی تلاشی نہیں لے سکتے اور ہماری بیٹی عافیہ صدیقی درندوں کے چنگل میں تڑپ رہی ہے۔
ملک صاحب! ایک آزاد و خودمختار ملک کی حیثیت سے باوقار پالیسی اپنایئے۔ علما فتوے دے چکے سرکاری اہتمام میں کسی نئے درباری فتوے سے کچھ حاصل نہ ہوگا۔ پوری قوم دہشت گردی اور غارت گری سے نفرت کرتی ہے لیکن وہ اس سب کچھ سے بھی محبت نہیں کرتی جو آپ کررہے ہیں۔


عرفان صدیقی
10دسمبر2009
روزنامہ جنگ

__________________
حضور صلی اللہ علیہ وسلم نے فرمایا کہ میں سویا ہواتھا کہ میں نے خواب میں جنت دیکھی ۔ میں نے دیکھا کہ ایک عورت ایک محل کے کنارے وضو کررہی ہے ۔ میں نے پوچھا یہ محل کس کا ہے ؟ تو فرشتوں نے جواب دیا کہ عمر رضی اللہ عنہ کا۔صحیح بخاری