اطلاعات کے مطابق سینٹ کے رکن سینیٹر پروفیسر ابراہیم خان نے چئیرمین سینٹ فاروق ایچ نائیک کے نام ایک خط نما درخواست لکھی ہے جس میں انہوں نے دعویٰ کیا ہے کہ 10 جون کو مہمند ایجنسی کی تحصیل لکڑے شیخ بابا میں قانون نافذ کرنے والے اداروں کے اہلکاروں نے 38 افراد کو بیدردی سے قتل کر کے ایک ہی گڑھے میں دفن کر دیا تھا۔ جبکہ اس واقعہ سے چار روز قبل بھی اسی علاقے کے ایک گاؤں میں 10 افراد کا اجتماعی قتل کیا گیا۔ اس خط میں انہوں نے اُمید کا اظہار کیا کہ چیرمین سینٹ اپنے اختیارات استعمال کرتے ہوئے مظلومین کے لواحقین کی داد رسی کریں گے۔

جب اُن سے اخبار کے نمائندے نے سوال کیا کہ کیا آپ یہ نہیں سمجھتے کہ آپ نے یہ ایشو اُٹھانے کے لیے غلط موقع کا انتخاب کیا ہے؟ کیونکہ سیکیورٹی ادارے پہلے ہی امریکہ کے شدید دباؤ میں ہیں۔ ایسے میں امریکہ ایسے ایشوز کو اُٹھا کر اپنے فوائد حاصل کر سکتا ہے۔ اس کے جواب میں انہوں نے کہا کہ اس بات کا احساس خود سیکیورٹی اداروں کو ہونا چاہیے کہ وہ اس قسم کے واقعات کیوں رونما ہونے دیتے ہیں۔ یہ کوئی منطق نہیں کہ ہم اتنے سنگین واقعہ پر محض اس لیے خاموش رہیں کہ سیکیورٹی اداروں کے لیے مسائل پیدا ہوتے ہیں۔ کیا انکو محض اس لیے 100 قتل معاف کر دئیے جائیں کہ ا ن پر پہلے ہی بہت دباؤ ہے۔ اور ویسے بھی یہ لوگ تو اب تک امریکہ کا ساتھ ہی دیتے رہے ہیں۔ اب بھی تھوڑا بہت امریکہ کے خلاف اس لیے بولتے ہیں کہ اُس نے انکی امداد بند کر دی ہے۔ جس دن امداد بحال ہو گئی پھر سے مفاہمت ہو جائے گی۔ انکا کہنا تھا کہ سیدھی سی بات ہے کہ اگر سیکیورٹی ادارے قانون و آئین کی حدود میں رہ کر کام کریں گے تو ہم انکا ساتھ دیں گے اور دفاع کریں گے۔ ۔لیکن اگر ہمارے ہی سیکیورٹی ادارے ہم پر ہی حملہ آور ہو جائیں گے تو ہم انکے جرائم پر پردہ نہیں ڈال سکتے۔

جب اُن سے پوچھا کہ کہ سانحہ خروٹ آباد اور کراچی کے قتل کی ویڈیوز تو موجود ہیں۔ کیا آپ کے پاس بھی کوئی ثبوت موجود ہیں؟ اس پر انہوں نے کہا کہ ہمارے پاس ناقابل تردید شواہد موجود ہیں۔ ااور اگر ہم کو کسی ادارے میں انکو پیش کرنے کے لیے بلایا گیا تو ہم انکو پیش کریں گے۔ انکا کہنا تھا کہ اس سانحے کی ویڈیو بھی موجود ہے۔ اور اس میں اہلکاروں کو فائرنگ کرتے بھی دکھایا گیا ہے۔

جب اُن سے پوچھا گیا کہ آپ سینٹ کیوں گئے، آپ نے عدالت سے رابطہ کیوں نہیں کیا۔ اس کے جواب میں انکا کہنا تھا کہ یہ علاقے پاکستانی عدالت کے دائرہ کار میں نہیں آتے۔ آئین کی رُو سے ہم اس واقعہ کے خلاف کسی عدالت میں نہیں جا سکتے۔ اس کے برعکس پارلیمنٹ اس معاملے کو دیکھ سکتی ہے اور داد رسی کر سکتی ہے اسی لیے ہم نے پارلیمنٹ سے رجوع کیا ہے۔ دوسری بات یہ ہے کہ اس کی ویڈیو ہم کو کافی دیر بعد ملی ہے اور اُس علاقے پر شدید خوف و ہراس کی فضا قائم ہے۔ لواحقین شدید سہمے ہوئے ہیں اور کوئی بھی بات کرنے کو تیار نہیں۔ یہ تفصیلات بھی ہم کو اپنی جماعت کے نمائندوں کے ذریعے ہم تک پہنچیں۔ جنہوں نے پھر ویڈیوز حاصل کر کے ہم تک پہنچاہیں۔ اور مزید یہ کہ مہمند ایجنسی جہاں کاروائیاں ہو رہی ہیں ، وہاں کے لوگوں کو علاقہ چھوڑنے کی اجازت نہیں دی جا رہی ہے۔

اس سوال پر کہ ہو سکتا ہے کہ وہ لوگ دہشت گرد ہوں یا اس قسم کی تنظیم سے تعلق رکھتے ہوں ۔ اس پر انکا کہنا تھا کہ قتل ہونے والوں میں ایک 12 سال کا لڑکا اور ایک 82 سال کا بزرگ بھی تھا۔ سارے کے سارے آپس میں رشتہ دار تھے۔ اور آپریشن کی وجہ سے علاقہ چھوڑ کر جا رہے تھے کہ راستے میں انکو قتل کر دیا گیا۔

نوٹ:ساٹھ سالہ پروفیسر ابراہیم کا تعلق جماعت اسلامی سے ہے یہ سینٹ کے ممبر ہونے کے ساتھ ساتھ جماعت اسلامی صوبہ خیبر پختونخواہ کے امیر کی ذمہ داریاں بھی ہیں۔ جماعت اسلامی آغاز سے ہی ہر قسم کے فوجی آپریشن کے مخالف رہی ہے۔ راقم

تلخیص از:روزنامہ امت