اب وزیر داخلہ نے بھی وہی بات کر دی ہے جو بہت پہلے سے واقفان حال اور محبِ وطن حلقے نہایت شدومد سے کرتے آئے ہیں۔ وزیر داخلہ نے واشگاف کہا کہ کراچی میں استعمال ہونے والا اسلحہ اسرائیل سے آ رہا ہے اور کراچی میں دہشت و فساد کی خونریز فضا قائم کرنے میں بھی بیرونی ہاتھ ملوث ہیں۔ اس بات میں کوئی شک و شبہ نہیں کہ عالم اسلام میں کفر کا اگر کوئی متفقہ ہدف اور واضح نشانہ ہے تو وہ پاکستان ہے۔ پاکستان اسلام کی سربلندی کی تحریکوں کے لئے ہر اول دستے کا کردار رکھتا ہے۔ اس لئے یہ ارض وطن روزِ اول ہی سے اہل کفر کی نگاہوں میں کسی کانٹے کی طرح کھٹکتی ہے۔ اسرائیل امریکا اور بھارت کی ٹرائیکا نے پاکستان کی سالمیت و بقا کے خلاف ایک عرصے سے خفیہ معاہدہ کر رکھا ہے۔ پاکستان میں ہوتے بم دھماکوں، دہشت گردی کی وارداتوں اور اس کی نظریاتی سرحدوں پر ہوتی لگا تار یلغاروں کے پیچھے ہمیشہ انہی ارکان ثلاثہ کے نادیدہ ہاتھ ہوتے ہیں۔
اس وقت صورتحال یہ ہے کہ وقت کی ایک اورسپر پاور افغانوں کے ایمانی اور جہادی تھپڑوں کی تاب نہ لاتے ہوئے زمیں بوس ہو چکی ہے۔ اس وقت اوبامہ یہ تقریریں کر رہا ہے کہ امریکا دیوالیہ ہونے سے بچنے کے لئے امریکی قرضے کی حد میں اضافہ کرے گا۔ قرضہ کی حد بڑھا کر وہ وقتی طور پر دیوالیہ ہونے سے بچ تو سکتے ہیں مگر امریکی ماہرین معیشت صاف کہہ رہے ہیں کہ یہ بھی بہرحال تباہی اور زوال ہی کی طرف لے جانے والا راستہ ہے۔ ایک طرف امریکہ معیشت کے بے پناہ بوجھ تلے دبا ہے تو دوسری طرف عسکری اعتبار سے بھی امریکا اپنی واضح شکست تسلیم کر چکا ہے۔ امریکی میگزین ٹائم نے امریکی عوام کے حوالے سے جو سروے شائع کیا اس میں خود امریکی عوام بھی اس بات سے آگہی رکھتی اور اسے وہ علی الاعلان تسلیم بھی کرتی ہے کہ امریکا کی سپر پاوری کے دن گنے جا چکے۔ ماہرین آئندہ کی سپر پاور کے طور چائنہ کو دیکھ رہے ہیں۔ آئندہ کا علم اللہ کے پاس ہے مگر حال کی اور طے شدہ اور پوری دنیا کے ہاں تسلیم شدہ بات یہ ہے کہ امریکا ناصرف یہ جنگ ہار گیا اور افغانیوں کا ناصرف جہاد جیت گیا بلکہ امریکا آئندہ سپر پاور کے طور پر زندہ رہنے کے قابل نہیں رہا اگر وہ باقی رہتا بھی ہے تو ٹوٹے اور بکھرے روس کی طر بیساکھیوں اور سہاروں کے بغیر جی نہ سکے گا۔
افغانستان میں اب عملاً ناٹو افواج کے انخلاءاور واپسی کا عمل شروع ہو چکا ہے۔ کینیڈا کے فوجیوں کے ساتھ ساتھ ترجمان تک ڈر کے بھاگ چکے ہیں، جرمنی اور دیگر کئی ممالک بھی بوریا بستر گول کر چکے ہیں خود امریکہ بھاگنے کے راستے کراچی پورٹ سے متعین کر چکا ہے اور اب تازہ ترین واقعہ یہ ہے کہ افغانستان کا معروف صوبہ بامیان ناٹو افواج نے افغان فوج کے حوالے کر کے وہاں سے مکمل انخلاءکر لیا یعنی اب صوبہ بامیان میں ناٹو افواج کی نہیں افغان فوج کا عمل دخل اور حکومت ہے۔
یہ ایک ایسا منظر نامہ ہے جس کو دیکھنے کی امریکا اور اس کے حواریوں نے کبھی توقع نہ کی تھی۔ وہ اس جنگ کا انجام ایک فاتح کے روپ میں دیکھنے کے متمنی تھے۔ وہ ساری دنیا کو دہشت گردی کی اصطلاح کے پس منظرمیں مسلم کشی کی نوید سنانا چاہتے تھے مگر زمینی حقائق نے ایک بار پھر بے سروسامان اہل جہاد کی فتح کے مناظر دکھا کے غرور و تکبر اور کفر و باطل کا سر نیچا کر دکھایا ہے۔ کہتے ہیں کھسیانی بلی کھمبا نوچے، اب امریکا جو کھسیانی بلی کا کردار نبھا رہا ہے وہ جس کھمبے کو نوچنے کی کوشش کر رہا ہے وہ پاکستان ہے۔
بوکھلائے ہوئے امریکا نے اپنی کچکچاہٹ نکالنے کے لئے پاکستان کو ہدف قرار دے لیا ہے وہ ساری بوکھلاہٹ اور بے بسی پاکستان سے بدلہ لے کر نکالنا چاہتا ہے۔ یہی وجہ ہے کہ ایک طرف جہاں پاکستان پر ہوتے ڈرون حملوں میں بے پناہ اضافہ کر دیا گیا ہے، پاکستان کی افغان سرحد پر بے شمار حملے شروع ہو گئے ہیں، وہیں پاکستان کی اقتصادی شہہ رگ کراچی کا امن و امان غارت کرنے کی پوری منصوبہ بندی کر لی گئی اور اب یہ کوئی ڈھکی چھپی حقیقت نہیں رہی کہ ان سب کے پیچھے بیرونی ہاتھ ہیں۔ اسرائیل کا گھناﺅنا کردار تو وزیر داخلہ نے واضح کر دیا جو نام انہوں نے نہیں لئے وہ امریکا و انڈیا ہیں۔
آثار بتاتے ہیں کہ امریکا ہاری ہوئی جنگ کا جتنا بھی ممکن ہوا غصہ پاکستان پر نکال کے جانا چاہتا ہے۔ اس میں اسے ہندو بنیے کے ساتھ ساتھ اسرائیلی خباثتوں کا بھرپور تعاون حاصل ہے۔ ان حالات میں جبکہ حکومتی عہدیدار اب برملا اس کا اظہار بھی کرنے لگے ہیں پاکستان کا کردار نہایت حساس ہو جانا اور بروقت سامنے آنا چاہئے۔
حکومت پاکستان کو اپنی سرحدات کے تحفظ کے لئے افواج پاکستان کو پوری طرح چوکس اور خطرات سے نمٹنے کے لئے ہر وقت پوری طرح تیار ہوشیار رکھنے کی ضرورت ہے۔ ضروری ہے کہ امریکا کے ساتھ جعلی دوستی اور محبت کی بڑھتی پینگوں کا ڈرامہ کرنے کے بجائے قوم کو اصل صورتحال سے آگاہ کر کے مشکل حالات کی تیاری کروائی جائے۔
واضح طور پر اعلان کر دیا جائے کہ میدان میں ہارے ہوئے اور پاکستان دشمنی پر اترے ہوئے امریکا سے ہماری کوئی دوستی نہیں۔ ہم نے افغانیوں کو وہ اسلامی کمک نہیں پہنچائی جو بطور مسلمان ہمیں پہنچانا چاہئے تھی لیکن اس آخری وقت ہی سہی ہمیں ان کے ساتھ امریکا کے خلاف کھڑے ہو کر اپنی بچی کھچی غیرت کا اظہار کرنا چاہئے۔
اس طرز عمل سے ایک طرف جہاں رب رحمان کی نصرت و تائید پاکستان کی حفاظت کیلئے سایہ فگن ہو گی، وہیں قوم اور فوج کا مورال بھی بلند ہو گا۔ امریکی امداد کے لئے ہمیں پریشان ہونے کی ضرورت نہیں کہ جسے رب کی امداد حاصل ہو جائے اسے کسی دوسرے کی امداد کی ضرورت نہیں رہتی، لیکن جسے رب کی امداد حاصل نہ ہو ا سو امریکا بھی امداد دینے پر تل جائے تو مقدر میں تباہی کے سوا کچھ نہیں۔ اللہ حالات سمجھنے اور دین پر عمل کی توفیق دے۔



بشکریہ ہفت روزہ جرار
والسلام ،،،،علی اوڈراجپوت

__________________
"اگرحق کونہیں پہچان سکتے،تو باطل کےتیروں پر نظررکھو،جہاں پرلگ رہے ہوں وہی حق ہے///شیخ الاسلام،،،امام ابن تیمیہ رحمتہ اللہ علیہ.