ایم نے سوال کیا تھا کہ آخر یہ خود مختاری ہوتی کدھر ہے ۔ مجھے مل جائے تو میں ہی اسکو مار ڈالوں




میں تو آپکو "لو پروفائل ٹارگٹ" دے رہا تھا ۔ سوچا کہ آپ پریکٹس کر لیں۔
ورنہ سوچ لیں کہ یہ جس مختاری کے پیچھے آپ ہیں۔ ۔۔۔۔ آئی مِین مارنے کے لیے۔۔۔۔امریکہ کب سے اسکے پیچھے ہے۔ اسکے روزانہ کے ڈرون حملے، میزائل حملے، کمانڈوز کے حملے، ریمنڈ ڈیوسوں کے حملے بھی اب تک اس "مختاری" کا کُچھ نہیں بگاڑ پائے۔ یہ بڑا "ہائی پروفائل ٹارگٹ" ہے۔ اس کو مارنا اتنا آسان ہوتا تو اب تک امریکہ افغانستان میں اپنے ہزاروں فوجی نہ مروا چُکا ہوتا۔

خیر میں اس خود"مختاری" اور "سالمیت" کو ڈھونڈنے نکلا۔ اسکی تلاش میں خیزاں و افتاں جب میں بلوچستان پہنچا تو وہاں بھیڑ بکریاں چراتے ایک چرواہے سے پوچھا کہ بھائی تم نے پاکستان کی خود"مختاری" اور سالمیت کو کہیں دیکھا ہے۔ مجھے اسکا پتا چاہئیے۔ اُس چرواہے نے مجھے اوپر سے نیچے تک گھورا اور اپنے پہلو میں لٹکتی بندوق کو اتار کر چلایا "اوئے ماڑا تم پھاکستان کی بات کرتا ہے۔ ام کو بتاؤ امارا خؤد مختاری کِدر ہے ۔ تم لوگوں نے امارا بچے مارا، اماری عورتوں کو بے عزت کیا۔ام کو بے عزت کیا۔امارا مال کھایا۔ ام تم کو نہیں چھوڑے گا۔ام تم کو گولی مارے گا۔ پہلے بتاؤ ہمارا خود مختاری کدھر ہے ۔پھر اپنا بات کرنا"۔ مجھے تو لینے کے دینے پڑ گئے۔ بمشکل تمام وہاں سے منت سماجت کر کے میں نے اپنی جان بخشی کروائی اور سندھ کو عازم سفر ہوا۔

راہ چلتے مفلوک الحال دِکھتے،خاموش طبع اور چہرے سے پیار چھلکتے ایک سندھی بھائی کو روکا۔ اُس سے پوچھا کہ بھائی کسی کو پاکستان کی خود"مختاری" اور سالمیت کی اشد ضرورت ہے ۔ اگر تم کو اسکا کوئی اتا پتا معلوم ہو تو میری رہنمائی کرو۔ یکایک اُس کے چہرے کے تاثرات بدل گئے۔ جس چہرے پر پیار چھلکتا تھا ، وہاں نفرتوں نے بسیرا کر لیا، اور پھر وہ گھٹی گھُٹی آواز میں بولا "سائیں۔ تم ہمارا مہمان ہو۔ ہم تمہاری عزت کرتا ہے۔ پر اس کا مطلب یہ نہیں ہے کہ تم ہمارے گھر آ کر ہمارے دشمنوں کا پتا پوچھو۔ سائیں یہ پاکستان نے اب تک ہم کو دیا کیا ہے سوائے غربت کے۔ اس نے تو سائیں پھر سے ہم کو ہمارے وڈیروں کے کتوں کے سامنے لا پھینکا ہے سائیں۔ سائیں انگریز کے دور میں کوئی وڈیرا ہم پر ظلم کرتا تھا تو پھر بھی انگریز انصاف کرتا تھا۔ سائیں تمہارے پاکستان نے تو ہم کو کدھر کا بھی نہیں رہنے دیا۔ تم کو اسکی خود"مختاری" اور سالمیت کی تو بڑی فکر ہے۔ میری بیٹیوں اور بہنوں کی خود مختاری اور سالمیت تم کو نظر نہیں آتی۔ جاؤ چلے جاؤ سائیں۔ ہم بڑی مشکل سے برداشت کر رہا ہے۔ ورنہ تم کو بتاتا"

میں شرمندہ اور خوفزدہ ہو کر کراچی پہنچا۔ سوچا کہ پاکستان کا سب سے بڑا شہر ہے۔ کروڑوں انسان بستے ہیں۔ سب سے زیادہ تعلیم یافتہ ہیں۔ انڈسٹری ہے ۔ یہاں تو ضرور پاکستان کی خود"مختاری" اور سالمیت کا پتا چل جائے گا۔ سندھی اور بلوچ تو ویسے ہی پاکستان سے جلتے ہیں، انہوں نے مجھے خاک بتانا تھا۔ جیسے جیسے میری ٹرین کراچی میں داخل ہوتی گئی، مجھے فائرنگ کی آوازیں سُنائی دینا شروع ہو گئیں۔ کہیں کہیں سے دھواں بھی اُٹھتا دکھائی دے رہا تھا۔ کہیں سے فلک شگاف نعرے سُنائی دے رہے تھے۔دیواریں نفرت آمیز وال چاکنگ سے بھری ہوئی تھیں۔ میں ڈرگ روڈ کے سٹیشن پر ہی نیچے اُتر گیا۔ میں ادھر اُدھر متلاشی نظروں سے دیکھنے لگا کہ کس سے وہ سوال پوچھوں جس کے لیے میں در در کی خاک چھانتا پھر رہا ہوں۔ اچانک میری نظر نوجوانوں کے ایک گروہ پر پڑی جو دائرے کی شکل میں کھڑے خوش گپیوں میں مصروف تھے۔میں نے سوچا ان میں سے تو کسی نہ کسی کو ضرور علم ہو گا۔ میں نے ان کے پاس پہنچ کر وہی سوال دوہرایا۔ اچانک ہی ایسا لگا جیسے مجھے دن میں تارے نظر آنا شروع ہو گئے ہوں۔ بڑی بڑی بلڈنگز گھومنا شروع ہو گئیں اور پھر تاریکی چھا گئی۔ جب ہوش آیا تو خود کو رسیوں میں جکڑا ہوا پایا۔ ایک نوجوان میرے منہ پر پانی کے چھینٹے مار کر پیچھے ہٹ رہا تھا۔ ساتھ ہی ایک کرسی پر 30،32 سال کا آدمی سیگریٹ کے کش لیتا میری طرف غور سے دیکھ رہا تھا۔ پھر وہ مجھے ہوش میں دیکھ کر غرایا
"بول بے۔ کون ہے تُو۔ کس ایجنسی کا ہے"
میری کپکپی چھوٹ گئی۔ لرزتی آواز میں بولا "جناب میرا تعلق کسی ایجنسی سے نہیں ۔ میں ایک عام پاکستانی ہوں۔ بس ایک سوال کا جواب تلاش کرنے کے لیے در در گھومتا پھر رہا ہوں"
"ابے ہمارے ساتھ جھوٹ بولتا ہے۔ تیری تو۔۔۔۔ اور اس کے ساتھ ہی مجھے کافی سارے نوجوان مل کر مارنا شروع ہو گئے۔ میں آہ وزاری کرتا رہا ، چلاتا رہا منتیں کرتا رہا ۔ آخر باس کا دل پسیجا اور اس نے پوچھا کہ "نام کیا ہے" میں نے جواب دیا "حیدر بلوچ"۔ اس پر وہ پھر گرم ہو گیا۔ "ابے لیاری کا ہے تُو"
خیر بڑی مشکل سے انکو یقین دلایا کہ میرا تعلق نہ تو کسی ایجنسی سے ہے اور نہ ہی میرا تعلق ادھر کی کسی سیاسی جماعت سے ہے۔ تو انہوں نے یہ کہہ کر میری جان بخشی کر دی کہ "شکر کر ۔تجھ پر رحم آ گیا ۔ ورنہ کھوپڑی میں سوراخ کر کے بھیجتے۔ تیری اور پاکستان کی خود مختاری اور سالمیت کی تو۔۔۔۔(گالی)"۔ میں ہانپتا کانپتا انکی کمین گاہ سے باہر آیا۔ جسم کا جوڑ جوڑ درد کر رہا تھا۔لیکن ہمت نہیں ہاری تھی۔ بس پکڑ کر میں کراچی کے ایک اور علاقے میں آ گیا۔بڑے بڑے پلازوں اور کھُلی کھُلی سڑکوں کو دیکھتے ہوئے حیران ہو کر چل رہا تھا کہ کراچی کتنا بدل گیا کہ اچانک ہی ایک طرف سے ایک گروہ نمودار ہوا۔ ہر کسی کے ہاتھ میں گنیں تھیں۔ وہ لوگ ہوائی فائرنگ کر رہے تھے۔ ہر طرف بھگدڑ مچ گئے۔ دکانیں دھڑا دھڑ بند ہونا شروع ہو گئیں۔ اچانک ایک بم بھٹا اور ہر طرف خون ہی خون ہو گیا۔
میرے حواس ہی کھو گئے۔ میں جلدی سے ایک ٹیکسی میں بیٹھا اور واپسی کی ٹرین پکڑ کر سیدھا پنجاب پہنچ گیا۔
چند دن گھر میں آرام کیا۔ امی کی گالیاں کھائیں اور پھر سے سوال کے جواب میں نکل پڑا۔ میں نے سوچا کہ لاہور لاہور اے۔ اور ویسے بھی وہاں کا وزیر اعلیٰ آج کل بڑا محب وطن ہے۔ اور انقلاب کی باتیں کرتا ہے وہاں کسی نہ کسی کو ضرور علم ہو گا۔
لاہور سٹی سٹیشن کے پُر ہجوم پلیٹ فارمز سے خود کو نکالتا میں باہر پہنچ گیا۔ ہر طرف دھواں اور مٹی تھی۔ ساتھ ہی موجود بسوں والے مختلف علاقوں کے نعرے بلند کر رہے تھے۔ گرمی کی شدت کی وجہ سے جان ہلکان ہو رہی تھی۔ میں نے ٹیکسی کروائی اور سمن آباد پہنچ گیا۔ جب کرائے کا پوچھا تو ہاتھوں کے توتے اُڑ گئے۔ 1000 روپے میں تو میں اہنے شہر سے یہاں پہنچا تھا اتنا ہی کرایہ وہ مجھ سے مانگ رہا تھا۔ جب تھوڑی سی بحث کی تو وہ گرم ہونا شروع ہو گیا۔ گالیاں بکنے لگا۔ میں بھی گرم ہو گیا۔ پولیس آ گئی اور مجھے اُٹھا کر تھانے میں لے گئی۔ ڈرائینگ روم کی سیر کرنے کے بعد میں اسکو اپنی ساری جمع پونجی دینے کو تیار ہو گیا۔ اسے کہتے ہیں ایثار اور قربانی کا جذبہ۔

لاہور میں کوئی لفٹ ہی نہ کروائے۔ کبھی میں مزنگ گیا ، کبھی چوبرجی، کبھی داتا دربار تو کبھی چوک یتیم خانہ، کبھی فورٹریس تو کبھی برکت مارکیٹ، کبھی مون مارکیٹ تو کبھی جوہر ٹاؤن۔ایک ایک علاقہ پھر ڈالا ۔ لیکن ہر کوئی ایک سے بڑھ ایک جواب دے۔ لیکن موضوع پر کوئی نہ آئے۔ ہر کسی کے چہرے پر بورڈ لکھا ہوا تھا "کہ سانُوں فکر تے بڑی اے، پر سانُو کی ۔ جدوں نواز شریف صاب حکم دئین گے اسی لب لواں گے"

مایوس ہو کر میں اسلام آباد پہنچا۔ میرا یہاں کے شہریوں سے پوچھنے کا کوئی ارادہ نہیں تھا۔ کیونکہ یہاں کے باسیوں کی وجہ سے ہی تو یہ گم ہوئیں تھیں۔

وہاں سے میں ٹکٹ کٹوا کر پشاور پہنچا۔ پشاور کا بس ٹرمینل مجھے بہت پسندآیا۔ پاکستان کے چند ہی بس ٹرمینل اتنے صاف ستھرے ہوں گے۔ شہر آوارہ گردی کرنے نکلا۔ ہر کسی کے چہرے پر ایک نا معلوم خوف تھا۔ اُمید اور خوف کا یہ امتزاض مجھے سمجھ نہ آیا۔ میں سالمیت اور خود مختاری کو بھول کر اس خوف اور امید کے بارے میں پوچھنے لگ پڑا۔ بڑی مشکل سے ایک پٹھان مجھ سے گفتگو کرنے پر آمادہ ہوا۔ گفتگو کے دوران بھی وہ خوفزدہ نگاہوں سے ادھر اُدھر دیکھ رہا تھا۔ میں نے اسکی وجہ پوچھی تو بولا کہ "خوچا۔۔۔اُمید اس بات کا اے کہ ام گھر پہنچے گا۔ اور خوف اس بات کا کہ ابھی کہاں دھماکہ ہو جاوے اور کس کا لاش کتنے ٹکڑوں میں بٹ جاوے کوئی پتا نئیں۔ لگتا اے تم نے کبھی خود کش حملہ ہوتے نئیں دیکھا۔ اِدر بچ کے رہنا" ابھی اُس نے یہی کہا تھا کہ اچانک کان پھاڑ دھماکہ ہوا۔ ہر طرف گرد و غبار کے بادل چھا گئے۔ چیخ و پکار اور آہ فغاں سے کان بہرے ہونے لگ پڑے۔کافی دیر تک تو میں سڑک پر پڑا، لوگوں کو آنسوؤں سے تر ادھر اُدھر بھاگتے دیکھتا اور یہی سوچتا رہا کہ ہوا کیا ہے۔ اور جب سمجھ آیا کہ کیا ہوا ہے ۔ ۔ ۔ ۔ ۔ ۔ ۔ ۔ ۔ ۔ ۔ ۔

تب مجھے ایم کے سوال کا جواب مل گیا۔
مجھے اُمید ہے دوستو کہ آپ کو بھی "ایم" کے سوال کے جواب کا معلوم ہو گیا ہو گا ۔ ۔۔ کہ پاکستان کی خود"مختاری " اور سالمیت کہاں ہے۔