اسلام آباد (محمد صالح ظافر : خصوصی تجزیہ نگار) حکمران اتحاد نے کراچی میں جوا کھیلا لیکن پانسہ یوں پلٹا کہ اس کے ”اکابرین“ کو ابھی تک سمجھہ نہیں آرہی کہ اسکرپٹ میں بنیادی غلطی رہ گئی تھی یا کہانی پر عملدرآمد میں سقم رہ گیا۔ سندھ کے البیلے سینئر وزیر ڈاکٹر ذوالفقار مرزا کا بیان ہرگز گرمئ جذبات یا وقتی جوش کا شاہکار نہیں تھا بلکہ اس کیلئے پیشگی بہت سوچ بچار کیا گیا تھا۔ بدھ 13 جولائی کی شب ڈاکٹر ذوالفقار مرزا نے آتش فشانی کرکے دراصل اگلے دن 14 جولائی بروز جمعرات کیلئے کراچی اور سندھ کے شہری علاقوں میں ایک بڑے ڈرامے کی منصوبہ بندی کررکھی تھی جس کے ذریعے جمعرات کو طلوع آفتاب کے ساتھ ہی ان تمام علاقوں میں متحدہ قومی موومنٹ کے الگ ہوئے کارکنوں کی شکل میں جلوس نمودار ہونے تھے اور انہوں نے مہاجر قومی موومنٹ (حقیقی) کے اسیر رہنما آفاق احمد کیلئے فضا پیدا کردینا تھی اور اس کے ساتھہ ہی پیپلزپارٹی نے اپنے گلے کی پوری قوت اور اپنے پسندیدہ ذرائع ابلاغ کو استعمال کرتے ہوئے اعلانات جاری کرنے تھے کہ متحدہ کا طلسم ٹوٹ گیا ہے، سندھ کے شہری علاقوں اور کراچی میں اس کے قائد کے خلاف بغاوت ہوگئی ہے۔ اسی ہنگامے اور شوروشغب میں آفاق احمد کی رہائی عمل میں آتی اور انہیں ”عظیم الشان“ جلوس کی قیادت سونپ کر کراچی ان کے حوالے کردیا جاتا۔ متحدہ قومی موومنٹ کے ارکان نے بدھ کی شب کے پہلے پہر کو بھی نہیں گزرنے دیا اور کراچی ہی نہیں پورے صوبے کو سر پر اٹھا لیا۔ ان کے کارکنوں نے تیزی کے ساتھہ کارروائی کرکے اس منصوبے کو ناکام بنا دیا جو قصر صدارت میں تیار کیا گیا تھا۔ اس میں مجرمانہ عاجلانہ ذہن سمیت چابکدستی کا ہر ہتھکنڈہ استعمال کیا گیا تھا۔ بغاوت کیلئے کارکن اے این پی اور پیپلزپارٹی نے فراہم کرنے تھے، ان پر لیبل متحدہ کے منحرفین کا لگا ہوتا۔ پورے ملک سے کوئی ایک آواز بھی ایسی سامنے نہیں آئی جس میں ڈاکٹر مرزا کے فرمودات کو سندتائید عطا کی ہو۔ حماقت سے لبریز اس شاہکار کی بدولت متحدہ قومی موومنٹ کو اپنی اسٹریٹ پاور کے مظاہرے کا نادر موقع فراہم کیا ہے، اس قوت کا اس کے مخالفین کو شاید گمان بھی نہیں تھا۔ پورے ملک میں احتجاجی مظاہروں نے اس امر کا ثبوت فراہم کردیا کہ متحدہ اب ملک گیر پارٹی ہے اور الطاف حسین کو پورے ملک میں چاہنے والے میسر ہیں۔ پیپلزپارٹی کیلئے بہترین راستہ یہ تھا کہ وہ متحدہ کو باوقار طور پر حزب اختلاف کا حصہ تسلیم کرلیتی، اس کے ساتھ تعلقات کار استوار کرتی اور سیاسی حوالے سے اس کا مقابلہ کرتی۔ یہ رویہ اختیار کرنے کیلئے شائستگی اور فہم کی ضرورت ہے جس سے ان دنوں ایوان صدر میں بیٹھی پیپلزپارٹی نے اپنا ناطہ توڑ رکھا ہے۔ موجودہ حکمران اگر اسی سیاسی بصیرت کا مظاہرہ کرتے رہے تو ملک میں استحکام کا تصور ہی ختم ہوجائے گا اور پھر عام انتخابات جو اب نوشتہ دیوار بن رہے ہیں، ان میں کامیابی کیلئے یہ عاقبت نااندیش حکمران کیا گل کھلائیں گے، اس کے تصور سے بھی کراہت محسوس ہونے لگتی ہے۔



http://ejang.jang.com.pk/07-15-2011/...images/912.gif

__________________