یہ وہ جملہ ہے جو ایک برطانوی شہری نے اپنے خط میں نیوز ویک کے نام لکھا ہے۔ تفصیل اس اجمال کی یہ ہے کہ برطانوی صوبہ ویلز کے ایک شہری برنارڈ ہیون نے امریکی جریدے نیوز ویک کے ایڈیٹر کے نام ایک خط لکھا ہے جس میں اس نے کہا ہے۔
''آپ کے جریدے نے اپنے 16جون کے ایک آرٹیکل میں لکھا کہ افغانستان کا صوبہ کنٹر اسامہ بن لادن کا مسکن ہے۔ امریکی صدر کی اولین ترجیح ملک کا دفاع ہے۔ کتنے افسوس کی بات ہے کہ نائن الیون کے سات سال بعد بھی اسامہ بن لادن ابھی تک آزاد ہیں حالانکہ پوری دنیا نے ان کی گرفتاری کے لئے امریکہ کی مدد کی حتیٰ کہ فرانس نے یہاں تک کہا کہ '' ہم سب اب امریکی ہیں'' لیکن میں خبردار کرتا ہوں کہ امریکہ نے اگر پاکستان کے قبائلی علاقوں پر حملوں کا سلسلہ جاری رکھا تو افغان سرحد کے دونوں طرف آباد قبائلی یہ کہنے پر مجبور ہو جائیں گے کہ ''ہم سب طالبان ہیں''امریکہ کی اس پالیسی کے بہت برے نتائج نکلیں گے۔

برطانوی شہری کی تشویش بالکل بجا ہے۔ جن دنوں امریکہ نے افغانستان پر حملہ کیا تھا ان دنوں طالبان جنگجوئوں کی تعداد چالیس ہزار بتائی جاتی تھی۔ جبکہ امریکی پالیسی یہی رہی تو یہ تعداد چالیس لاکھ سے بھی تجاوز کر سکتی ہے امر واقعہ یہ ہے کہ اس وقت بھی طالبان کی تعداد لاکھوں میں ہے وہ افغانستان میں ہوں یا پاکستان کے قبائلی علاقوں میں اس سے کچھ فرق نہیں پڑتا۔ وہ سواتی ہوں یا وزیرستانی اس سے بھی کوئی فرق نہیں پڑتا۔ فرق پڑتا ہے تو اس بات سے کہ آج وہ لاکھوں میں ہیں۔ درحقیقت امریکہ نے قبائلی علاقوں میں وحشت و درندگی کی ایسی شرمناک کہانیاں رقم کی ہیں کہ اب قبائلی اور طالبان کی تخصیص ہی ختم ہو کر رہ گئی ہے۔ وزیرستان کے ہر دوسرے گھر کا فرد امریکہ کی اس نام نہاد جنگ میں شہید ہوا ہے اور ہر دوسرے گھر سے ہی طالبان کو نفری ملی ہے یعنی جو لوگ امریکہ کے ساتھ نہیں لڑنا چاہتے تھے اور امن پسندانہ زندگی گزار رہے تھے امریکہ نے انہیں بھی ہتھیار اٹھا کر طالبان کی صفوں میں شامل کرا دیا۔

بات بہت واضح ہے قبائلیوں کو ہتھیاروں سے عشق ہوتا ہے یہ ایام نوجوانی میں ہی گن چلانا سیکھ لیتے ہیں۔ بندوق کو اپنا زیور سمجھتے ہیں لیکن اس کے باوجود امن پسندی سے زندگی گزارتے ہیں۔ ان کے علاقوں میں اخلاقی جرائم کی شرح نہ ہونے کے برابر ہے۔ چوری' ڈکیتی اور رسہ گیری کا نام و نشان نہیں۔ زنا کا اور شراب نوشی کا کوئی تصور نہیں۔ مست انداز میں زندگی گزارتے ہیں۔ کسی کو چھیڑتے ہیں نہ کسی کو یہ اجازت دیتے ہیں کہ وہ انہیں چھیڑے۔ پاکستان کی تاریخ میں ہم نے آج تک یہ نہیں سنا کہ ہتھیار بند قبائلی اپنا علاقہ چھوڑ کر پاکستان آئے ہوں اور انہوں نے اسلحے کے زور پر بنک لوٹے ہوں یا ڈکیتی کی وارداتیں کی ہوں' یہ لوگ طالبان کو پسند ضرورت کرتے تھے لیکن خود طالبان نہیں تھے لیکن اب امریکہ نے ظلم اور و حشت سے لاکھوں قبائلیوں کو طالبان بنا دیا ہے ان میں سے ہر ایک کی خواہش ہے کہ وہ امریکیوں سے لڑے اور ان سے اپنا انتقام لے۔ اس انتقام کے لئے انہیں اگر اگلی صدی تک انتظار کرنا پڑا تو کرلیں گے۔

''ہم سب طالبان ہیں'' کا جو تصور پیش کیا گیا ہے وہ حقیقت پر مبنی ہے۔ امریکہ اور پاکستانی فورسز جتنے طالبان ختم کر رہی ہیں اس سے دگنے پیدا ہو رہے ہیں۔ جتنی دفعہ آپریشن کیا جاتا ہے اتنی ہی دفعہ نفرت بڑھتی ہے۔ اوپر سے جو امریکی طیارے بمباری کرنے آتے ہیں وہ جہاں پگڑی اور داڑھی والے دیکھتے ہیں ان پر بم پھنک دیتے ہیں۔ حقیقت یہ ہے کہ داڑھی اور پگڑی تو لاکھوں قبائلیوں کی پہچان ہے۔ ان کا طالبان کے ساتھ کوئی تعلق ہو یا نہ ہو۔ یہ طالبان کی پالیسیوں سے اتفاق کرتیہوں یا نہ کرتے ہوں ، داڑھی منڈوائیں گے اور نہ پگڑی اتاریں گے۔ ان کی نسلیں مٹا کر رکھ دی جائیں پھر بھی یہ اپنا روایتی حلیہ تبدیل نہیں کریں گے۔ نتیجہ یہ کہ امریکہ ان پر بمباری کرتا رہے گا اور ان امن پسند قبائلیوں میں سے لوگ ٹوٹ ٹوٹ کر طالبان کے ساتھ شامل ہوتے جائیں گے اور برطانوی شہری ٹھیک کہتا ہے اگر امریکی حملے جاری رہے تو افغانستان اور پاکستان کے قبائلی علاقوں میں رہنے والے پشتون کسی روز یک زبان ہو کر نعرہ لگا دیں گے۔ ہاں ''ہم سب طالبان ہیں''

امریکہ ان میں سے کتنوں کو مارے گا۔ افغان جہاد کے دنوں میں روس کے خلاف لڑتے ہوئے20لاکھ سے زیادہ افغانوں اور پاکستانیوں نے جام شہادت نوش کیا تھا۔ پشتونوں نے کیا کبھی اس پر ملال ظاہر کیا؟ جان دینا اور جان لینا پشتون کے لئے کوئی معنی نہیں رکھتا اس لئے امریکہ اپنی پالیسی بدلے ورنہ لاکھوں پشتونوں سے یہ جملہ سننے کے لئے تیار ہو جائے کہ ''ہم سب طالبان ہیں''

__________________