السلام علیکم ساتھیو۔
میں پاکستان کے صوبہ پنجاب میں واقع ایک چھوٹے سے شہر ڈنگہ سے تعلق رکھتا ہوں۔ اکثر لوگ ڈنگہ کا نام سن کر ہنس دیتے ہیں کیوں کہ اس کے نام کا پنجابی میں مطلب بنتا ہے "الٹا"۔ لیکن درحقیقت ایسی کوئی بات نہیں ہے ۔ نہ تو ڈنگہ کا نقشہ کہیں سے الٹا سیدھا ہے اور نہ ہی ڈنگہ کے لوگ الٹی کھوپڑی کے ہیں۔ ڈنگہ کے لوگ دیگر پنجابی لوگوں کی طرح ملنسار اور خوش اخلاق ہیں۔ تاہم اچھے برے لوگ تو ہر معاشرے میں موجود ہوتے ہیں۔

کچھ لوگ اس بات پر اصرار کرتے ہیں کہ ڈنگہ کا پرانا نام دین گاہ تھا جو بعد میں بگڑ کر ڈنگہ ہو گیا۔ اور تاریخ کے مطابق ڈنگہ گجر قوم کی ایک شاخ "ڈنگ" نے بسایا اس لیے بعد میں اسے ڈنگہ پکارا جانے لگا۔ تاہم اصل حقیقت کیا ہے وسوخ سے کچھ بھی نہیں کہا جا سکتا۔

ڈنگہ مغربی پنجاب میں واقع ایک چھوٹا تاریخی شہر ہے جو دریائے جہل اور دریائے چناب کے درمیانی خطہ میں واقع ہے۔لاہور سے راولپنڈی جانے والی مرکزی شاہراہ جسے جی ٹی روڈ بھی کہا جاتا ہے کھاریاں کے مقام پر ڈنگہ سے کچھ پینتیس کلو میٹر کے فاصلے سے گزرتی ہے۔ ڈنگہ ایک زمانے میں میٹھی سونف کے لیے بہت مشہور تھا، یہ سونف چینی چڑھا کر تیار کی جاتی تھی، آج بھی ڈنگہ کے بازاروں میں آپ کو اس کی بے شمار دکانیں نظر آئیں گی۔ ایک روایت کے مطابق ڈنگہ سولہویں صدی میں وجود میں آیا۔ برصغیر پاک وہند کی تقسیم سے پہلے یہاں مسلمان ہندو، سکھ اور دوسرے مذاہب کے لوگ قیام پذیر تھے۔ یہاں سکھوں کا ایک گردوارہ نانک سر بھی موجود تھا۔ ابھی بھی ڈنگہ میں تقسیم سے پہلے کی کئی عمارات اور ان کی باقیات موجود ہیں۔

۲۰۰۸ کی مردم شماری کی مطابق ڈنگہ کی آبادی اسی ہزار نفوس پر مشتمل ہے۔ یہاں پر ایک عدد پی ٹی سی ایل ایکسچیج اور تمام موبائل کمپنیوں کے ٹاورز موجود ہیں۔

ڈنگہ کی ایک اور خاص بات ڈنگہ سے بڑی تعداد میں کئی شہروں کو جانے کے لیے براہ راست سڑکیں موجود ہیں۔ اس کے علاوہ درجنوں دیہات ڈنگہ کے قرب و جوار میں ہے جن کو ڈنگہ کی مارکیٹ، اناج، سبزیاں پھل، تعمیرات کا سامان اور بجلی کا سامان مہیا کرتی ہے۔ ڈنگہ میں ایک عدد ڈگری کالج لڑکوں کے لیے اور ایک عدد کالج لڑکیوں کے لیے موجود ہے۔ ڈنگہ کی نمایاں شخصیات میں میجر محمد اکرم شہید نشان حیدر نمایاں ہیں۔

نیچے میں ڈنگہ کی چند تصاویر پیش کر رہا ہوں۔ امید ہے آپ لوگوں کو پسند آئیں گی۔

نقشہ۔

__________________
عرفی تومیندیش ذغوغائے رقیباں - آواز سگاں کم نہ کند رزق گدارا
میرا بلاگ | yasirimran.wordpress.com