کدی تے پیکے (میکے) جا نی بیگم
آوے سکھ دا ساہ نی بیگم

اکٹھیاں رہ رہ اک گئے آں ہن
لاگے بہہ بہہ تھک گئے اں ہن
تے ٹینڈیاں وانگوں پک گئے آں ہن
بھر وی نکو نک گئے آں ہن

ہن تے سینے ٹھنڈ پا نی بیگم
کدی تے پیکے جا نی بیگم

اکو چھپڑ دے وچ تر کے
کی لبھیا اے شادی کر کے
جندڑی لنگ چلی مرمر کے
ادھے رہ گئے آں ڈر ڈر کے

مل گئے بڑی سزا نی بیگم
کدی تے پیکے جا نی بیگم

کی کی رنگ وکھا دتے نیں
سجن یار چھڈا دتے نیں
پچھلے پیار بھلا دتے نیں
بینگن تک کھوا دتے نیں

ترس کوئی ہن کھا نی بیگم
کدی تے پیکے جا نی بیگم

شام منان نوں دل کردا اے
سگرٹ پان نوں دل کردا اے
بارہوں کھان نوں دل کردا اے
تازے نان نوں دل کردا اے

کردے پورے چا نی بیگم
کدی تے پیکے جا نی بیگم

اپنی مرضی آئیے جائیے
منڈیاں ورگے کپڑے پائیے
راتاں نوں شبرات منائیے
کجھ دن اسی وی عید منائیے

بدلے ذرا ہوا نی بیگم
کدی تے پیکے جانی بیگم
آوے سکھ دا ساہ نی بیگم