عبدالقدوس

کراچی (اسٹاف رپورٹر) بورڈ آف انٹرمیڈیٹ ایجوکیشن کراچی کے زیراہتمام منعقدہ انٹر کالجیٹ کرکٹ چیمپئن شپ کے سلسلے میں ال منصورہ گراؤنڈ پر پری کوارٹر فائنل میں گورنمنٹ کالج ملیر کینٹ نے دلچسپ مقابلے کے بعد گورنمنٹ پریمیئر کالج کو 43رنز سے شکست دیکر آخری آٹھ ٹیموں میں جگہ بنالی ملیر کینٹ کالج کی ٹیم 34ویں اوورز میں 225رنز بناکر آؤٹ ہوئی،راشد عزیز 46، صبیح الدین 44، خیام قاضی 34رنز عمدہ بیٹنگ کی۔ زوہیب علیم چار، فہیم احمد اور بلال عباسی نے بھی ایک ایک وکٹ حاصل کی۔ گورنمنٹ پریمیئر کالج نے سخت مقابلہ کیا اور 29.4 اوورز میں 182رنز بناکر آل آؤٹ ہوئی اوپنر فہیم احمد نے جارحانہ بیٹنگ کرتے ہوئے 78رنز دس چوکوں اور 2چھکوں کی مدد سے اسکور کیے کاشان علی 31رنز بناکر آؤٹ ہوئے۔ جناح کالج گراؤنڈ پر ایس ایم سائنس کالج 33ویں اوورز میں 180رنز بناسکی طارق 47، عمران 30رنز بناکر آؤٹ ہوئے۔ زین اور شفیع الرحمن نے 2-2 کھلاڑیوں کو آؤٹ کیا۔ گورنمنٹ کامرس کالج صرف 52رنز بناسکی محبوب اور اویس نے چار چار وکٹیں حاصل کیں اس طرح میچ ایس ایم سائنس کالج نے جیت لیا۔ تیسرے میچ میں اورنگی ٹاؤن کالج نے 34ویں اوورز میں 190رنز بنائے نور اسلام 8چوکوں کی مدد سے ناقابل شکست 98رنز بناسکے ۔یوسف علی اور محمد اویس نے 3-3 وکٹیں حاصل کیں۔ گورنمنٹ کالج لیاقت آباد 168رنز بناکر آؤٹ ہوئی اس طرح یہ میچ اورنگی ٹاؤن کالج نے جیت لیا۔ یوسف علی 27، ساجد خان نے 24رنز بنائے شیراز تین اور سردار 2کھلاڑی آؤٹ کرسکے ۔ ان میچوں میں سید سعادت علی، زاہد اقبال، شبیر خان، اکبر خان، نسیم شیخ اور حسن عالم امپائرز جبکہ وسیم عباس، مبشر نسیم اور وسیم صلاح الدین اسکورر تھے۔

__________________