خرم شہزاد خرم

کراچی (اسٹاف رپورٹر) پاکستانی کرکٹ ٹیم کے سابق کپتان انضمام الحق کا یارکشائر کاؤنٹی سے ایک ماہ کے لئے معاہدہ ہوگیا ہے وہ پاکستان کے تجربہ کار مڈل آرڈر بیٹسمین یونس خان کی جگہ نمائندگی کرینگے جنہیں ٹوئنٹی 20 ورلڈ کپ کرکٹ ٹورنامنٹ میں شرکت کے لئے ریلیز کیا گیا ہے پاکستان کے اسٹار کرکٹر انضمام الحق نے جنگ سے بات چیت کرتے ہوئے کہا کہ میں پانچ چھ ماہ سے بڑی کرکٹ سے دور ہوں مجھے جنوبی افریقا کے خلاف ہوم سیریز سے قبل پریکٹس کی ضرورت تھی کاؤنٹی کرکٹ میں شرکت سے مجھے اپنی فٹنس لیول کو بہتر بنانے میں مدد ملے گی انضمام الحق نے بتایا کہ وہ دو تین روز میں انگلینڈ روانہ ہورہے ہیں جہاں وہ ایک ماہ کے سیزن میں تین چار روزہ اور تین ایک روزہ میچوں میں یارکشائر کی نمائندگی کریں گے انضمام الحق نے مزید کہا کہ میں نے انڈین کرکٹ لیگ کے لئے ابھی معاہدہ نہیں کیا معاملات زیر غور ہیں ا گر مجھے انڈین لیگ کھیلنے میں دلچسپی ہوتی تو کسی سے ڈھکے چھپے نہیں علی الاعلان معاہدہ کروں گا انہوں نے ٹوئنٹی 20 ورلڈ کپ کے حو الے سے کہا کہ یہ مقابلے آسان نہیں اس میں کسی بھی ٹیم کی جیت کے بارے میں پیشگی دعوے نہیں کئے جاسکتے ہیں جنوبی افریقا میں پاکستان کو ہمیشہ سے مشکلات کا سامنا رہا ہے وہاں کی وکٹیں ہمارے لئے خطرہ ثابت ہوتی ہیں۔ تاہم انہوں نے کہا کہ پاکستان کی ٹیم کمزور نہیں ہمارے پاس بڑے باصلاحیت کرکٹرز موجود ہیں جو کسی بھی وقت اپنے کھیل کی مہارت اور خوبصورت صلاحیتوں کے ذریعے میچ کا نقشہ بدل سکتے ہیں۔انہوں نے کہا کہ پاکستان میں ڈومیسٹک کرکٹ میں ٹوئنٹی 20 مقابلوں کو اہمیت دی جانی چاہئے جونیئر سطح پر بھی اس کے مقابلے کرائے جائیں اور اسے ڈومیسٹک کیلینڈر کا حصہ بنایا جائے انضمام الحق نے کہا کہ ٹوئنٹی 20 مقابلے اب زیادہ مقبول ہورہے ہیں انضمام الحق نے کہا کہ یہ خبریں درست نہیں کہ مجھے کسی ملک کی جانب سے کوچنگ کی آفر ملی ہے میں کسی کے ساتھ کوچنگ کا معاہدہ نہیں کرنا چاہتا اور نہ ہی اس میں دلچسپی رکھتا ہوں میری اولین کوشش یہ ہے کہ ٹیسٹ کرکٹ میں اپنے ملک کی نمائندگی کروں اور کم از کم دس ہزار رنز مکمل کرکے منفرد ریکارڈ حاصل کروں انہوں نے کہا کہ ورلڈ کپ میں ناکامی کے باوجود قوم کی محبت اور ہمدردوں کو کبھی بھول نہیں سکتا یہ میرا قیمتی اثاثہ ہے۔

__________________