عبدالقدوس

کولکتہ(نمائندہ خصوصی) مصباح الحق کا کہنا ہے کہ گراؤنڈ میں اترتے ہوئے میرا مشن میچ کو فنش کرنا ہوتا ہے ،اسی عزم کو لے کر میں ایڈن گارڈنز میں بیٹنگ کے لیے گیا ، پھر وہ ہوا جس کی مجھے آرزو تھی ۔ایک ٹیسٹ کرکٹر ہونے کی حیثیت سے میری ہمیشہ خواہش تھی کہ میں بحران میں سنچری بناؤں یہ خواہش بھارت کے خلاف ایڈن گارڈنز میں پوری ہوگئی اس کا میں نے کبھی سوچا بھی نہ تھا ۔ 33 سالہ مصباح الحق کی پاکستانی ٹیم میں ٹوئنٹی20 ورلڈ کپ میں واپسی ہوئی ۔اس وقت انہیں محمد یوسف کی جگہ ٹیم میں منتخب کیا گیا تھا ،جس پر سلیکٹرز کو شدید تنقید کا سامنا کرنا پڑا ۔تاہم وقت گذرنے کے ساتھ ساتھ مصباح نے اپنے انتخاب کو درست ثابت کردکھایا ۔میانوالی میں پیدا ہونے والے مصباح کے آر ایل اور سرگودھا کی ٹیم سے کھیلتے ہیں ۔ انہوں نے اب تک 9 ٹیسٹ کے علاوہ 22 ون ڈے انٹر نیشنلز میں پاکستان کی نمائندگی کی ہے ۔ مصباح پاکستان کے تعلیم یافتہ کرکٹرز میں سے ایک ہیں ان کے پاس ایم بی اے کی ڈگری ہے ۔ مصباح نے کہا کہ میں جب بھی گراؤنڈ میں جاتا ہوں چاہے وہ انٹر نیشنل میچ ہو ،فرسٹ کلاس میچ ہو یا کلب میچ ،میری خواہش ہوتی ہے کہ میچ کو ختم کروں اور فیصلہ ہونے تک کریز پر رہوں اسی کوشش نے مجھے طویل اننگز کھیلنے کی عادت ڈال دی ہے ۔ مصباح کی یہی عادت پاکستان کو کولکتہ ٹیسٹ میں شکست سے بچا سکتی ہے ۔دوسرے ٹیسٹ میں اب تک ایک ڈبل سنچری اور چار سنچریوں کی مدد سے 974 رنز بن چکے ہیں ۔

__________________