خرم شہزاد خرم

برسبین (جنگ نیوز) سری لنکن کرکٹ ٹیم کے کپتان ماہیلا جے وردھنے نے پہلے ٹیسٹ میں آسٹریلیا کے ہاتھوں اپنی ٹیم کی شکست کا ذمہ دار بیٹسمینوں کو ٹھہرایا ہے۔ میڈیا سے بات چیت کرتے ہوئے جے وردھنے نے کہا کہ آسٹریلیا کے خلاف دو ٹیسٹ میچوں پر مشتمل سیریز کے پہلے میچ میں سری لنکن بیٹسمین ان سے وابستہ توقعات پر پورے نہیں اتر سکتے۔ یہی وجہ ہے کہ ٹیم کو عالمی چیمپئن کے ہاتھوں اننگز کی شکست کی ہزیمت کا سامنا کرنا پڑا۔ انہوں نے امید ظاہر کی کہ ٹیم میں شامل تمام کھلاڑی اپنی ذمہ داری کا احساس کرتے ہوئے دوسرے کرکٹ ٹیسٹ میچ میں بہتر کارکردگی کا مظاہرہ کریں گے۔ جے وردھنے نے کہا کہ انہیں آسٹریلیا کے ہاتھوں اننگز کی شکست کے باعث افسوس ضرور ہوا ہے لیکن وہ اپنی ٹیم کی کارکردگی سے مایوس نہیں ہیں اور سری لنکا کی ٹیم دوسرے ٹیسٹ میچ میں شاندار کارکردگی کا مظاہرہ کرتے ہوئے اپنا روایتی کھیل پیش کرے گی اور یہ سیریز 1-1 سے برابر کرنے میں کامیاب ہو جائے گی۔ واضح رہے کہ دونوں ٹیموں کے درمیان دوسرا ٹیسٹ جمعہ 16 نومبر سے ہوبارٹ میں کھیلا جائے گا۔

__________________